miércoles, 28 de diciembre de 2016

Cuevas de Mar (Llanes)

8 d'Ochobre de 2016

Seguimos aprovechando el bon tiempu que tenemos n'Asturies en Setiembre y Ochobre, yendo esta vegada a pasar el fin de selmana al conceyu de Llanes. Tenemos un día mediánamente soleyeru y con una temperatura correuta asina que tiramos hasta la sablera de Cuevas de Mar a trepar un ratín y metenos l'últimu bañín del añu si la cosa pinta bien.

Por dalgún motivu, el chigre ya ta pieslláu a estes altures y eso fai que pierda un puntín trepar equí, pero con sol y esta roca tan increyible, nun poder echar una cervecina a la hora'l vermú tampoco ye pa tanto.

Visita caballar a la sablera de Cuevas de Mar

Personalmente, nun me vuelvo nin mediu llocu, se cual ye'l seutor que más presta y tiramos pal del mar, onde ponémonos a apretar faciendo les víes que más-y paecen prestar así a la vista a Marie, que múevese pente'l 6c como si nun costare.

Asína voi repitiendo Las Barqueronas (6b+/c), El Retornu del Coxu (6c) y Que buenos son en la Federación (6b+/c) toes al primer pegue, quedándome más que contentu, ya que'l pié nun me duel nestes víes tan desplomaes.

Apretando nes prestoses víes del seutor del mar

Marie, enchúfales tamién si nun ye al primer pegue al segundu y eso que según ella nun ye'l so estilu y tien razón porque muévese como naide nes víes llargues y de placa onde puede navegar a un lláu u otru pero vamos, cero problemes p'apretar en desplome.

Prestóme muncho volver a facer, Que buenos son en la federación (6c) ya que fuera de los primeros 6c qu'encadené fai años y la verdá que repitiéndolo pasélo en grande, esfrutando como un guah.e de la salida desplomada de la cueva y del pasín en travesía d'arriba... preciosa vía.

Richar esguilando perbien y faciéndose un pocu más a Cuevas

Mientres tanto, Richar y Jose seguían dando caña a los sextos baxos del paré, pegándose por turnos coles víes, qu'hai que dicir que dalgunes tienen unos alloñes feos y hai qu'andar sollerte de nun volar en dalguna qu'otra vía.

Pepa y Zori, esta vegada tan de descansu, por mancaures varies y dedíquense a asoleyar con tranquilidá y de pasu a sacanos estes semeyuques, qu'amuesen a la perfeición lo guapu d'esti paré de Cuevas.

Marie y yo compartiendo víes y pegues

Dicir que volví a pegáme colos Templarios (7a) pero nun soi a ver como sacar los movimientos d'esta vía y eso que tenía l'aida de Marie, pa intentar buscar dalgo distinto, pero nin con eses, tampoco yera ella a sacar el pasu.

Asína que la próxima vegada, paezme que siguiré avanzando nesta escuela colos otros séptimos porque esti atragántaseme, nun le veo manera o me paez un pasu demasiáu duru pa la mió estatura, ya que la chorrerina a la que tengo que grapáme veóla mui fina y pequeña pa tirar p'arriba.

Día d'acabar cansaos coles apretaes y pequeños desplomes de Cuevas

Y así, pente pitos y flautes fuimos pasando'l día, un día que fué ñublándose poquín a pocu, lo que nun quitó pa dase un bañín y recoyer trastos pa dir preparar la tienda campaña nel camping de Niembru onde teníemos pensáu durmir pal día siguiente colar pa Picos a facer monte.

Pero enantes de durmir tocaba parrillear y esta vegada Jose resarcióse, poniéndonos finos de comer y beber, hasta que'l cuerpu pidió dirse a descansar. Al día siguiente tocaba madrugar y al menos había que durmir unes cuantes hores.

Llueu parrillada en Barru y al camping a sobar
 
 -------------------------------------------------------------------------


2, 28 de Mayu y 1 de Setiembre de 2016

Tornamos a la sablera  de Cuevas de Mar menos vegaes de les que me prestaríen, pero ye que como en branu ta la prohibición pa los perros, cuando tengo a Kíla nun pueu pasame a apretar per ellí. Aún así, les poques visites siempre pagan la pena y préstame pola vida tastiar esa roca porosa y abrasiva enforma.

El primer día, xuntáramos unos cuantos dempués d'una entamada sidrera de les d'alcordanza, poro lo más que fuimos a facer aquel día, fué montar víes cencielles pa facer espoxigar el picor esguilador a xente nuevu (Noe, Wifre y Gael) n'esto de trepar peles peñes.

Apretando un día soleyeru enforma

Aquel xerme dió resultáu y esti añu ficimos un grupín curiosu pa xuntanos a escalar y echar unes rises nos terceros tiempos. Ciertamente, esti branu, fué ún de los meyores branos na escalada, los findes d'acampada y la folixa en xeneral.

El segundu día, averámonos per ellí, mi hermanu, Haritz y yo, un sábadu col día pelín repunantucu, aguantándonos el tiempu hasta la hora de xintar, la cual ficimos baxo les cueves del paré del mar, onde personalmente, camiento que tan les más guapes víes de la escuela.

El paré más guapu de Cuevas del Mar... grandísimes víes

Una vegada más, anduve repitiendo víes, montando les cintes y caleciendo deos pa probar coses más dures pero tampoco llegué a bon puertu nes miós intentones a Zumo de Presa (7a). La verdá ye que nun tengo tomada la midía a esta vía ya nun acabo de ve-y el métodu correctu pa llibrar el pasu hasta algamar la parte más gordina de chorrera.

L'últimu día, una tarde cualesquiera del branu, saliendo de Xixón dempués de trabayar tiramos Richar, Zori y yo hasta Cuevas, onde pasamos una tarde estupenda, repitiendo víes mítiques del seutor oculto aprentando un pocu coles sos entraes gafes a vía.

Haritz nun guapu 6a... del seutor onde'l chiringuito

Llueu, col día tapecíu del too, pero con bona temperatura, acabé la sesión trepadora encadenando a vista Las Barqueronas (6b+/c), la cual paecióme una vía d'una calidá ablucante, anque la salida a cadena ye pocu prestosa con tola trave espuesta hasta la reunión.

Una vía tan guapa, bien pagaba la pena que xubiera direuta a una propia reunión. De toes formes, quedando bien a gustu con este pegue provechosu sólo quedaba pegase un bañín y dir tomar un par de birres nel chigre col atapecer como telón de fondu.

Con ganes de tornar... a ver si tenemos oportunidá... nesti final de Setiembre y Ochobre

Finando'l día nel chigre relaxádamente


Cuevas de Mar (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue Escalada en Llanes, Entretenimiento Vertical  y de Piratas Free. Gracies y col so permisu.


 -------------------------------------------------------------------------


19 de Setiembre de 2015

Un día más... alborez soleyeru y averámonos nel final del branu hasta Cuevas de Mar, onde fuera de toda prohibición perruno podemos esfrutar de sol, playa, agua y escalada. Como siempre, nun se puede pedir más y nesta sablera alcuéntrome na gloria los díes que podemos esfrutar toos xuntos.

Anque'l día nun taba tolo caliente que diba prestanos, aguantamos tol día per ellí, faciendo unos más y otros menos, anque personalmente tengo que dicir qu'alcontreme cansáu y a dicir verdá nun escoyí mui allá les víes a facer.

Día de perros nunca meyor dicho... una pasada anque pelín fríu

Tuve pegándome un ratín col Pasu Residual (6c), esa vía con entrada a bloque total na que gasté de más pa nun salir p'arriba y llueu ya, magar de poner delles víes al restu de xente, ya nun tuve tampoco fuercies p'alcontrar la solución a un pasu de Las Barqueronas (6b+/c).

Asína que coles manes vacíes pero cola espalda caliente de tar al sol, pude marchar feliz, como siempre, de pasar el día al aire llibre y de facer lo que m'apasiona nesta vida.... sólo falta entrenu y motivación y los resultaos tornarán.

Kíla esfrutando de lo sablera favorita


 ------------------------------------------------------------------------- 
12 Abril y 21 de Xunu 2015
Llego'l tiempu de pisar les sableres y que meyor que tornar al sable con mayor ambiente montañeru d'Asturies: Cuevas de Mar. Nesta playa, podemos esfrutar del sol, bañanos y trepar pelos parés que formen la estructura de la sablera... que por mor de los temporales d'iviernu ye más bien una pedrera.

Personalmente, lo que lleva la mar... ya lu devolverá... asína qu'importame pocu que tenga menos sable qu'otros años, ya que na realidá, pa min, lo grande de Cuevas ye esi paré vertical nel que tan bonos momentos pasamos... y el chigre pa tomar un cerveces bien fríes.

Caleciendo cola mítica vía H.iyus del Metal

Nestos dos díes d'esta primavera-branu nos que fuimos, hasta que prohibese l'accesu a los perros, tuviemos intentando garrar un pelín de puxu pa cola escalada, asina qu'aparte de repetir dalguna clásica, metíme a conocer les víes que nel paré más averáu a la mar quedábanme por encadenar.

Nun fice grandes graos... pero si qu'esfruté sacando a vista Retorno a Ítaca (6a+) y Mikelonidas el Pacificador (6a+) nel primer día, nel que vinieron a probar esto de la escalada, Richar y Zori, que tuvieron apretando un ratín tamién.

Pasando un día estupendu en Cuevas de Mar

El segundu día, en Xunu ya, fíceme con otru par de víes que ronden tamién el 6a, anque según mires unos croquis u otros mónteste un enguedeyu de coyones. El casu ye que metíme a buscar les que me faltaben de grau baxu y probé lo que yo creo que ye un V+/6a y un 6a/+ apróximádamente.

Estes víes tendríen que coincidir que Psylocibe Semilanceta, que nunos croquis pon de 6b y n'otros de V+ y pa min ye más bien lo segundu anque una migaya más dura quiciás y Chupa que me voy que marquen de 6a+, nun sitiu y V+ n'otru y anda tamién pela metá.

Kíla dándose mil y un baños na sablera... más bien pedrera de Cuevas

El casu ye que pasamos mui bonos díes de playa, quedándonos cola pena de nun meteme ya a facer graos curiosos de 6c p'arriba, na paré por escelencia averada a la mar y por primer vegada dar pegues serios a Paso Residual (6c) con esa entrada a vía tan espeutacular...

Será pa Setiembre...

Cuevas de Mar (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue Escalada en Llanes, Entretenimiento Vertical  y de Piratas Free. Gracies y col so permisu.


 -------------------------------------------------------------------------

22 de Xunu de 2014

Esti branu namás que ficimos una visita a la escuela de Cuevas de Mar y ye qu'al tener a Kíla, los meses de temporada playera, tenemos prohibíu'l pasu a los perros, anque vayas tenela atada na zona d'escalada.

Asina que lo meyor ye dir tol añu, menos Xunetu y Agostu, poro averámonos enantes del cierre de playa y tuviemos esguilando y tomando'l sol nun día bien guapu. Aparte, como esti añu los temporales d'iviernu sacaron muncho sable, hai menos xente y puédese tar más cómodu con Kíla qu'otros años.

Gus y Alberto apretando fino en Cuevas

Como siempre ye un pasada trepar nes paredes de Cuevas y añu tres añu, los diferentes equipadores van ganando-y tarrén a cada requexu de los cantiles y saquen nueves víes nes que sufrir y apretar enforma.

Personalmente, tenía pendiente Esclavo del Amor, la cual taba cotada de 6a pero l'añu pasáu paecióme más dura de 6a y yera así, ya que nos últimos croquis de la rede ya apaez de 6b, lo cual paezme más lóxicu.

Mirando pa les manes por mor de lo abrasivu del paré calizu de Cuevas

El pasu ta na entrada del paré, poro primer pegue p'alcordame del métodu y llueu encadene pal bolsu y a por otra. Poro, tiramos un pelín más hacia l'agua onde taben Gus y Alberto dándo-y a la mítica H.iyus del Metal xuniéndose Pau tamién a los pegues.

Yo metíme nun nuevu 6c a la manzorga de Que buenos son en la Federación y como la collacia d'al llau, alcontréme con un viote descomunal que fízome trabayar hasta con 4 u 5 pegues sin nun m'alcuerdo mal.

Encadenando un nuevu 6c (El Retornu del Coxu)

Pa rematar, vimos una vía nueva nel pequeñu paré de la vía Avientu, pero nel llau contrariu y paecía cenciella como finar el día. Poro, tiramos a por ello, dándo-y una apreciación de V+ lo que confirmé más tarde colos croquis fechos pol guía Victor Sanchez y de los cuales aprovecho p'actualizar esta escuela tan especial y tan prestosa, na que la escalada va de la man del esfrute y del chigreu posterior.

Pau y Kíla en Cuevas... ensin restricciones

 -------------------------------------------------------------------------

20 y 21 de Xunetu de 2013

Pues sí, dos díes siguíos tuviemos en Cuevas de Mar "esguilando", jeje. Pongo pente comines lo d'esguilando, porque camiento qu'a la fín, fué lo que menos ficimos nesta perguapa playa llanisca.

Los planes yeren esguilar muncho y folixar un pocu y tornáronse en folixar muncho y esguilar más bien pocu. Namái aportar a Cuevas, truncóse too, al nun poder tener a Kíla na fastera d'escalada y eso que diba tar atadina ensín molestar a bañistes.

Na qu'oxetar a la educación de los collacios de salvamentu, que foron perbona xente, desplicándonos que nun podíen facer na, ya que viniéron-y de mediuambiente a echá-yos la bronca, por dexar meter a los escaladores los sos perros nes cueves demientres esguilaben.

Muncho pior, l'actitú de dalguna vieya, diciendo que nun se pue ya ensín razonar, lo meyor que-y dió por dicir, yera que tamién-y molestaba la xente qu'esguilaba. A mí tamién, moléstanme dalgunos niños y nun voi pidiendo la prohibición nes playes, jeje.

El casu ye qu'entamamos mal, asína qu'ensín rascar la roca d'esta playa, metímonos nel chigre onde si puen tar los perros y ehí acabóse tol deporte, jeje. Les cerveces a les 12 la mañana, amestáronse al vermú y a la xinta y cuando dímonos cuenta, turnándonos pa tar con Kíla na fastera non prohibía y poder esguilar daqué.

El sábadu pola tarde, dempués d'una crisis esguiladora de Pau, nel últimu momentu un toque de rabia fué lo que necesitó pa encadenar La Central (V). Da gusto vela esguilar con rabia y ensín pensar, porque de fuercia y téunica va sobrada.

Un ratín enantes, mientres Pau aneciaba con nun volver a esguilar enxamás, Dani aseguróme prebando dalguna vía que nun ficiera inda, como la Conquista de la Felicidad (V+) la cual fícela versionando l'entamu de la Central y faciendo travesía hasta esta vía, prestándome abondo encadenala a vista.


Cuevas de Mar ablucante como siempre


Dempués, aprovechando que taben dándo-y a cuchillu dos mozos a Afición y Desorden (6b claru, xubiendo col dinámicu al bideu), quise encadenala ya que teníala pendiente dende'l branu pasáu cuando Vicen saliera volando a falta d'una chapa y reunión.

Nel primer pegue fallé al bidéu, pero nel segundu sí qu'acerté y el restu salió cenciello hasta la cadena. Mui guapa esta vía, con roco abrasiva como toles de Cuevas de Mar, poro baxar sangrando de dalgún agarre ye más que davezu.

Magar d'una nueche de llocura folixera pa dalgunos, tan sólo Pau y yo, fuimos a apretar un pocu pela mañana, aprovechando que Kíla taba sobando con tolos demás. La nueche fué de folixa pa unos y pa otros de nun durmir res, por mor de la "puta música trance" que nun paró hasta les 7 la mañana.

Así que mediu apixotáu, pusímonos llueu del almuerzu, a prebar dalguna viuca que nun tuviera inda nos mios planes. A mí, tocóme facer dos 6a's que tan enfrente de la aguya del callexón. Fice a vista'l de la mandrecha, El Cielo puede esperar y atragantóseme la entrada d'Esclavo del amor, que pa mi estatura pudiera ser un 6a+ porque necesito bloquiar col muslu p'algamar un agarre que sáqueme de la barriga.

Paezme una cota un pocu baxa, pa un movimientu tan téunicu. Nun hai bonos pies per dengún llau, y hai que xubir muncho el pie drechu, pa bloquiar col muslu, demientres el pie esquierdu ta albentestate na chorrera. D'ehí llegase a un trideu bonu y ya la placa mui asemeyada al 6a ximielgu de la mandrecha, aún así voi dexalu nestos croquis de 6a y ta inda por encadenar.

Pau, siguió coles bones sensaciones qu'amosó al final del día anterior y tamién encadenó al segundu pegue Antes del Diluvio (V), sacando los pasinos d'esta vía con muncha tranquilidá y con unos movimientos bien guapos.

El restu del grupu: Gus, Sonia, Berto, Natalia, Dani, Jandro, Ana.... pues nun tengo ni idega de lo que ficieron no deportivu y escalador, durante'l sábadu ya que tábemos con Kíla nel encierru antiperros, anque ta claro, que pasar pasáronlo de coyones tola nueche de folixa, jeje.

Presta munchísimu dir a esta playina, onde l'ambiente d'escaladores ye xenial, apretando fuerte munchísima xente... a ver cuando podemos tornar ensín torgues playeres.



Actualización 2012

Sinceramente, nun se nin cuantes vegaes fuimos esti branu del 2012 a Cuevas de Mar y pa más dexaos, nun fuimos nin a sacar dalguna semeya demientres esguilábemos. Aún así, camiento qu'entre 3 y 4 visites sí que debimos facer esfrutando como non, de les víes, de la playa, de los baños y de les cervecines del chigre.

Nel tema, más téunicu, a Pau sigue atragantándose-y cualesquier roca que nun tenga esa prestosa adherencia d'Otura o el L.lano. Aún así, cola cuerda penriba si que sacó delles víes bien meritories como Paisaje vs Paisanaje (6a) y púso-y color a munchos otros posibles encadenes de quintos. Sólo-y falta tener un día d'esos d'echase p'alantre, pa marchar con otru tastu d'esta sablera.

Personalmente, sigo llimpiando un pocu'l seutor más averáu a l'augua, y cayeron 3 víes más con un 6a+ a vista, así como la mítica Avientu (6b) y otres varies nueves equipaciones na fastera de la manzorga, quedándome una clara espina pa esti branu, Afición y Desorden (6b), nel que tuviemos un momentu vuelaco de Vicen, nel que quedamos los dos a la mesma altura, colos aplausos del públicu asistente, jeje.

Polo demás, bien variáu l'abanicu de collacios que vinieron a pasar el día, nesta escuela con nós. Siempre ye un placer pegase coles víes qu'equipen la xente d'Escalada en Llanes.






Hestoria na escuela de Cuevas de Mar 

Grandísima ayalga pa esguilar, la que tenemos nesta playa y grandísimu trabayu'l que ficieron los collacios d'Escalada en Llanes equipando tal cantidá de víes nes parés d'esti guapísimu sableru llaniscu.

Poder combinar la escalada durante unes hores y llueu dase un chapuzón na mar, pa dempués dir a tomar unes cerveces nel chigre nun tien preciu. Amás, hai que dicir que nel chigre xíntase perbien, con cosuques bien ellaboraes y siempre con mui bona música dando un ambientín bien curiosu.

Sectores na playa de Cuevas de Mar (Llanes)

No qu'a les víes refierse, podemos dicir qu'hai dende cuartos hasta séptimos, con un toque vertical en toles víes bien guapu. Ta claro, que nun vamos alcontrar víes d'adherencia tumbaes, ya qu'esto ye un paraísu de cueves en parés d'acantiláu, tallaes pela mar.



Mi primer 6c cola vía Que buenos son los de la federación

Durante esti branu, foron varios díes los que fuimos a Cuevas de Mar, ensín alcordame mui bien, cuantes foron realmente. Lo que si tenemos nidiu, ye que quedamos namoraos d'esta playa y de les víes que nos ufrez, poro'l branu que vien va ser un clásicu nos díes d'escalada y más nos fines de selmana.


Paulina en Veranillo Fukushima (IV) y Berto nel repris de Rafita (V+/6a)
Semeyes by Asturwaterman

A destacar un pocu, pudiera dicir qu'equí fice mi primer 6c y que'l primer día que me puse con él, nun mirara siquiera la cotación y casi lu saco a vista, jeje. Aún así, prestóme llegar hasta riba esi día, y al siguiente ya salió ensín problemes, esfrutando de cada movimientu d'esta vía que te fai salir d'una cueva con grandes cazos y tien un pasín mui técnicu na parte final. Una pasada dafechu.


Primer día esguilando en Cuevas (Berto, Paula y Pangua)

Muncha xente esguilamos nestes parés durante estos díes, aparte de Paula y de mi, pasando polos collacios vascos, Fernan ya Iñaki, Pangua y Rebe, el mio hermanu, Gus, y Dani,... y siempre cayeron unes bones rises, un bañín y unes cerveces nel chigre... ablucante esti llugar pa pasalu bien y da-y caña'l cuerpu esguilando.

2 comentarios:

  1. Habrá que volver a Cuevas del Mar, aunque sea a bañarse y visitar el chigre.

    Un abrazu collaciu.

    ResponderEliminar
  2. Eso siempre, Fernan. Menudu sitiu tan prestosu, la verdá.

    ResponderEliminar