sábado, 29 de agosto de 2015

La Ñora (Xixón)

1 de Xunetu de 2015

Primer día de Xunetu y primer día d'horariu de branu, poro entamen les ganes fonderes d'esguilar tolos díes que pueda. Siéntome fuerte, pero quiciás demasiáu pesáu... muncho ximnasiu y pocu aeróbicu esti añu.

Aún así, quiero saber si l'entrenamientu de tol iviernu sirve pa daqué y pa ello, nun sé mui bien por qué, quiciás por andar pelín pillaos de tiempu, tiramos Alberto y yo hasta La Ñora, a siguir lluchando escontra los regodones, los agarres de pinza y los bolos infernales de conglomeráu.

Pa ello vamos hasta'l bloque de la Enredadera onde cuantayá Pau y yo fuéramos a conocer esta escuela y quedámonos col accesu fadiáu dende la sienda baxa de la Ñora, ya que nun conocíemos l'accesu superior y con que esto yera otru mundiu dafechu distinitu al calizu.

Nesti día, los Bertos tuviemos dándo-y a aquel IV+ (Mercury) d'esi primer día pa calecer manes y llueu metíme a vista a pol 6a+ (Paso de la driza) que salió metiendo un llance a un bolu de los de facer hestoria.

Alberto peleóse col 6a+ y yo tuve probando un 6b que devolvióme a la rialidá ñorense, ye dicir... munchos pegues ensín ver solución a un pasu y cola sensación de que fai tiempu había dalgo más onde agarrase porque'l grau vase pero muncho.

Con una reventada curiosa, namái quedó que probar el IV+ de la Enredadera, el cuál nun mos prestó nin a Alberto nin a mí polo gocho y estrañu del so percorríu. Non muncho meyor yera'l 6a+ (X2), que tamién salió pero nun par de pegues, con un bloque duru embaxo y la mesma parte fea del tramu superior del IV+.

En resume, una tarde bien aprovechada con varies víes del tipu Ñora, curties, bloqueres y nes que sólu la esperiencia de da-y pegues a estos bloques de conglomeráu, fae que seyas capaz de ganar pali pali grau nesta rares peñes.

 La Ñora (Seutores visitaos)
Croquis modificaos por mi de la escuela d'escalada de La Ñora, por mor de Piratas Free. Gracies y col so permisu.


lunes, 24 de agosto de 2015

Valverde (Valdel.lugueros) - Picu Bodón

13 de Xunu de 2015

Track: Valverde (Valdel.lugueros) - Picu Bodón


Última ruta del añu na que deberíemos despedinos toos hasta la siguiente temporada, pero siendo sinceros, cuanta más xente hai nel grupu, munches vegaes menos compromisu algames. Con ello, xuntámonos Richar, Zori, Benjamín y yo, pa facer la despedida de la temporada.

Pa enriba, el tiempu n'Asturies nun ye bono precísamente y tenemos que buscar una ruta alternativa a les que tenemos de calendariu. Como siempre, a mal tiempu n'Asturies hai que restolar en tierres llioneses p'alcontrar onde caleyar un ratín.

Partimos del pueblu de Valverde (1259 m) en los Argüeyos

martes, 18 de agosto de 2015

H.uentedé (Camaleñu) - Torre Salinas

6 de Xunu de 2015

Track: H.uentedé (Camaleñu) - Torre Salinas


Tamos na ruta propuesta por mí pa esti añu, la cuál dábame dellos dolores de tiesta por mor de les posibles trepaes n'ascensión final. Nel mió interior picábame más xubir la Torre de Lliordes, dellos metrinos más alta que la Torre Salinas, pero siendo ésta tamién más complexa de xubir que la collacia d'al llau.

A la fín, decídome por Salinas al ver dellos reportaxes onde la dificultá paecía ser aselada pela vía normal, dándo-y más oportunidaes a la mayoría del grupu. Asína con too... quedamos 5 paisanos pa intentar ascendela y ún d'ellos, David, novatu nestes xeres col grupu Xuan de la Borrina.

Puntu de partida en H.uentedé (1083 m)