jueves, 29 de noviembre de 2012

Taranes (Ponga) - La Llambria

13 d'Ochobre de 2012

Track: Taranes (Ponga) - La Llambria


10 menos venti de la mañana y tamos nel pueblu, qu'a posteriori diría, ún de los más guapos d'Asturies con muncha diferencia y col nome más celta qu'hai, Taranes, como non, nel conceyu de Ponga. P'aportar a él dende Xixón, lo meyor como siempre autovía'l Cantábricu hasta Lloviu y d'ehí a Cangues d'Onís a almorzar.

Nós, por mor de que César nun viniera solu, fuimos por Nava y nunca mais, jeje. Magar de los pinchos garramos la N-625, onde en pasando los pueblos de Cañu y Tornín, cruciaremos el puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga.

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-4, que nos llevará al traviés de Tanda a la fín a Taranes.

Semeya de grupu en Taranes (581 ms)

El grupu de güei ta compuestu, por Simón, Charly, Pangua, César y yo. Ta claro, que va ser una ruta dura, porque solo los más xabalinos, atreviéronse a venir, jeje. El día, ta espeutacular anque hai dalgo de borrina qu'esfúmase y apaez al cabu d'un ratín.

Aparcamos los coches, a la vera'l ríu Taranes, ensín xubir al pueblu y magar de preparanos y echar un vistazu a los molinos ponémonos en marcha al traviés d'una pista, na que bien ceo avísenmos de qu'andemos sollertes, que tamos n'alta montaña.

Saliendo avisaos dende Taranes

La ruta ye un restu de les del añu pasáu y va llevanos a conocer la Foz de la Escalada y la de Saolla col envís d'arrodiar la peñona de la Llambria, a la cual xubiremos pa facer una inmensa circular. Estos percorríos somos a conocelos gracies al llabor de dellos blogs montañeros como'l del grupu Los de las Claras o al caleyeru Cienfuegos.

La verdá ye que nesto de les redes, vas faciendo un circulu de blogs que sigues y siempre saques idegues nueves, compruebes posibles rutes y aidámonos los unos a los otros, pa que les rutes seyan lo más segures posibles y los caleyos y siendes, seyan conocíos por toos. Ye un llabor guapu y una xera a siguir faciendo nel futuru.

Foz de la Escalada

Como dixe, el primer oxetivu ye averase a la Foz de la Escalada, que sigún avanzamos per pista de formigón unes vegaes o por empedrada otres, va faciéndose más y más grande, ante nós. Esta guapa foz ta formada poles verticales muries de la Peña Taranes a la mandrecha y de la peña Suanciu a la manzorga, que continúa hasta'l Picu Tiatordos.

Esfrutamos de la guapa Foz de la Escalada

En pocu más de media hora, dende la salida tamos fuera de la Foz de la Escalada, con cierta tristaya quiciás, ya que nesta dómina del añu y cola seca que sigue careciendo Asturies, conocímosla ensín una gota d'augua y defechu deslluce muncho'l caminar per ella asína.

Menos mal, que tenemos na tiesta, da-y la vuelta al Tiatordos dende Taranes y tendremos una nueva oportunidá de vela en tola so plenitú, jeje. Aún así, esmoleznos vela así, anque somos a oyer la ruxidera d'un pequeñu tabayón que baxa pela riega'l Texu.

Xubimos desnivel coles parés de la Becerrera xixilándonos

Darréu, entamamos a xubir desnivel un pocu más fuerte na salida de la foz y pegaos a la riega los Bedules, pasaremos pela cabaña de Fresnu, pa siguir ascendiendo hacia la Mayada Piegüé, anque pudiéramos dir hasta la de Daón y llueu xubir a l'anterior.Nel nuesu casu, los pasos lleváronos hacia la mandrecha envede siguir de frente a Daón.

Con pocu más, qu'acolumbrar cuando la borrina lo permite, les parés de la peña Les Víes (o Becerrera o Campigüeños), vamos xubir otru pocu, internándonos dafechu nesa ñebla, qu'al nuesu pasu per Piegüé, da-y un toque de película cuanto menos de misteriu.

La Mayá Piegüé dafechu pantasmagórica

Una hora y 40 minutinos llevamos de camín y al perpasar esta guapa mayada, vamos descansar un pocu y picar daqué, pa ver si'l día acaba d'abrir del too. Como nun se decide y quedámonos frios, vamos siguir alantre hasta la vega Llagos, onde vemos la panda que tien de llevanos al nuesu primer oxetivu, la Peña Taranes.

Xubimos dende Llagos hacia la Peña Taranes

La xubida que será mui homoxénea, tendrános dende Llagos unos 40 minutos, faciendo amplies envueltes, que per esti pindiu tarrén, llevarános hasta los 1674 ms del cumal de Taranes. Ye claru, que nun ye'l puntu más altu de la mole que forma la Llambria y xustu al llau, inclusu hai otru pequeñu cumal unos metros más altu, el Picu Les Valles, pero esta peña, ye la que ta xustu enriba'l pueblu y prestábanos xubila.

La Llambria dende'l cumal de Peña Taranes (1674 ms

Casi nun taremos nin dos minutos nel cumal, ya que'l borrín nun mos dexa ver el pueblu, así que col puntu mira na Llambria, vamos crestiar, intentado perder pelos praos y peñes el mínimu d'altor posible. Esti tramu, va ser bien guapu y sírvenos pa relaxar les pates d'una xubida tan a pinchu como la de Taranes.

Siguimos caleyando hacia la Llambria con vistes a dellos picos: Crespa, Cetín...

Tamos mirando pal occidente y el día poquín a pocu va amosándonos nel nuesu caleyar a La Llambria, dellos cumales conocíos pa nós, como la Pica Cetín, la Peñe Crespa o el Picu Vizcares y otros como'l Maoñu qu'inda nun cayó baxo los nuesos pies.

Semeyísima dende la Llambria

Nestes hestories andamos, dando-y al maxín, pa postreres rutes cuando a pocu d'encumar la Llambria, dámonos la vuelta y el macizu del Cornión apaez antes nós, en tola so estensión, dende'l Picu Cotalba hasta la Peña Bermeh.a pasando poles altes cotes de les Peñes Santes.

Semeya de grupu nel cumal de la Llambria (1751 ms)

En 3 hores y 20 min, tamos nos 1751 ms de La Llambria y nel intre'l día relluma anque un vientín fai que nun se pare muncho nel cumal, protexéndenos nuna caseta meteorolóxica bien fea, allugada no más alto. La verdá, ye qu'a pesar de los casi 1200 ms de desnivel direutos fuímos vivos n'ascensión, cosa qu'a Charly nun-y prestó muncho y tien dolores na rodiella.

Delles vistes: Tiatordos y Maciédome, collada Llues y Vallimoru y Crespa y Vizcares...

A la fín, tenemos vistes tamién al Tiatordos, Maciédome, Zorru, Ten y Pileñes... al oriente y a mui cerquino a la Peñe Crespa col Cuetón de les Traviesese al llau y al Vizcares y Maoñu, tando embaxo d'esti'l pueblu de Vallimoru col cual tenemos una cuenta pendiente y cobrarémosla esti añu mesmu.


Dexamos la compaña de la Llambria y baxamos hacia'l sur esfrutando Casu y Ponga

Como diximos, tira un airín finu, poro preferimos descender hasta guetar un llugarín onde tar a cubiertu y poder descansar y xintar con tola tranquilidá. Vamos facelo en direición sur, baxando pol Altu los Foyos hasta les cercaníes del Fitu Cardosu, onde tirámonos venti minutinos a tomar el sol y fartucanos, nel Llanu la Camba.

Impresionantes les vistes al Cornión y Tiatordos

Lo más raru d'esta ruta, ye que dempués de facer cume y xintar, normalmente solemos tar ya, cerquina del final. Pero nesta, inda quédanos más de lo percorríu y eso faínos tar con una mentalidá de que'l mayor esfuerza ta por llegar.

Queda esfuerzu, pero tamién queda aventura y esa Asturies xabaz que tanto nos presta, porque'l parque de Redes ye eso, l'Asturies más profunda y a vegaes xabaz, con siendes que casi naide transita anguaño y poro ye tan importante, esa rede de blogues de montaña, qu'amuesen coles sos rutes llugares máxicos d'Asturies.

Baxamos del Fitu Cardosu hacia'l Valle Capiella per guapa viesca

Ún d'ellos, ye la Foz de Saolla, a la que descendemos pel Valle Capiella travesando enantes pembaxo del Fitu Muniellu, un guapu fayéu, onde los collores de la seronda van tomando forma. Nel valle, lo meyor ye garrar como referencia la riega los Adiellos y dir al so llau, camudando de vera según veamos meyor o pior sienda.

La Foz de Saolla col Maoñu y Vizcares

Poquín a pocu, vamos baxando desnivel hasta aportar a una pequeña vega escondida, la de Muniellu, que baxo la Panda Muniellu que baxa de la Llambria y el Xerru'l Tombu, da un pelín de pastu al ganáu que sorpréndenos nestos llares.

El descensu hacia la Foz de Saolla, ta siendo una maraviya, pero ya tenemos ganes de venos encaxonaos pente les parés, de la Peña Toral (manzorga) y la Peña La Encía a la mandrecha, en cuyes parés hai un práu colgáu, la Canga'l Palu, onde alcontramos un par de vaques engolaes.

Baxaremos pela mandrecha de la riega Adiellos hasta la de Saolla

Casi ún hora y media vamos tardar dende'l Llanu la Camba hasta travesar la riega de Saolla nuna baxada continua, qu'al fín, fadranos esfrutar d'un de los pasos más guapos que nunca nun tuviemos la suerte de conocer.

La primer parte, fadrémosla acompañaos del augua de la riega Saolla o Semeldón, ya que camuda'l nome al recibir augua d'otres riegues como la d'Adiellos o Purumendi a la entrada de la propia foz. Esta primer parte, sedrá dalgo resbariosa y llevarános siempre na mandrecha de la riega hasta que nel nuesu casu, soterráñase l'augua y podemos dir pel mesmu calce, superando cenciello los pasos más complicaos si hubiese muncha augua.

Ablucante la Foz de Saolla en tol so percorríu

Pa finalizar esta guapa foz, xubiremos un pocu de desnivel pela manzorga'l ríu pa xustu dempués de salir de la foz, poder acolumbrar la inmensa viesca del monte La Llambria, la cual debemos travesar ensín senderu que siguir.

La verdá ye que les semeyes que sacamos na foz, nun-y faen xusticia y por ello, puse bien poques... el que quiera vela que s'anime a conocela, jeje. D'otra miente, llevamos 6 hores y media de ruta y tamos faldiando la Peña Toral en direición norte per un senderu que nun mos lleva en bona direición, asína que cortamos polo sano baxando hacia'l ríu Semeldón.

Tramu tan guapu como duru pel monte la Llambria hacia'l colláu Valleyu

Esta baxada sedrá un pocu a lo xole y Carlos resiéntese y muncho de la rodiella, dexando realmente d'esfrutar de la ruta y poníendose en mou de sufrir y llegar al coche como seya. Xustamente cruciaremos el calce del ríu ensín augua, alcontrando yo nel ratín qu'aspero por Carlos la surxencia onde xurde de nuevu'l ríu Semeldón.

Munches vegaes la tiesta ye perimportante y a vegaes más que les pates o les fuercies que camentamos tener. Nesta ruta, Charly tenía qu'escaecer el dolor y xubir per una viesca ensín senderu, dende los 760 ms de la riega hasta los 1030 del colláu Valleyu onde garraríemos pista al fín... y lo fizo.

Escaecemos la profunda viesca pa garrar pistes dexando atrás al Maoñu y Vizcares

Una vegada nel colláu Valleyu, Charly pudo escaecer un tramu pindiu y llargu como'l de la viesca, na que xubimos per onde meyor pudimos, travesando en delles ocasiones siendes transversales que nun paecíen llevar al nuesu destín y garró la pista, que cola vista de la muria de la Llambria paecía relaxar un pelín los camientos y el dolor de la rodiella.

Los demás, siguimos caleyando y anque quedábanos un bon tramu y en ascensu, esfrutamos de la pista dexando atrás los picos Maoñu y Vizcares y teniendo la guapísima visión al llegar a la collada Llués del picu Pierzu al que'l sol allumaba per delantre del Cornión.

El Cornión, el Pierzu, Taranes y el Recuengu presentes dende les collaes Llués a Taranes

Toda esta pista pela faldera de la Llambria entre collaos, si nun fuera pola paliza que llevábemos, tendría que ser hasta agradable, pero na nuesa situación fízose pesada, poro nun quiero saber lo que diba pensando Charly a cada pasu.

Los nuesos pasos, ensín perder una gota d'altura lleváronmos dende la collada Llués hasta la de Taranes, na cual vamos alcontrar una de les puestes de sol más guapes d'Asturies, col sol pegando con fuercia nes Peñes Santes y dando un prestor máximu a un picu de forma tan guapa como'l Recuengu.

Baxando a la fin de la collada Taranes al pueblu coles vistes del Recuengu, Zorru...

Colo 1089 ms d'altor de la collada Taranes y les casi 8 hores y media de ruta que llevábemos enriba, caún garró la pista de baxada y col meyor humor posible, foi dando pasu tres pasu, hasta que vimos un pelín más cerca'l pueblu de Taranes.

Enriba too, cuando marqué la ruta, garré'l camín más cercanu a les parés de Peña Taranes, metíendonos per caleyos más cómodos que la pestosa pista hormigonada, pero tamién más costosos tando dalgún zarráu y too, poro fuimos alloñándonos unos d'otros nel nuesu descensu, teniendo qu'esperanos nel pueblu un bon ratu, ya que Carlos baxaba bien tocáu.

Picos rellumando penriba los teyaos de Taranes

Por suerte, el pueblu de Taranes, ufre dende la puerta de munches de les sos cases (hailes rurales, güeyu!!) un atapecer del Cornión ablucante. Asína que... xuntámonos toos y caleyamos peles cais de Taranes, empobinándonos hacia'l chigre onde con unes cerveces esperamos na so terraza a que l'espeutáculu terminara.

En resumen, la naguada ruta a la Llambria, quedónos nun total de 9 hores y media, nes que caleyamos nun total de 21.25 kms y superamos un desnivel acumuláu de 1900 ms... una auténtica burrada, que dexónos aparte de cansadísmos, mui, pero que mui a gustu.

Camudando'l Camín pasándolo perbien en Ponga

Nesta rutona por Ponga ficimos La Llambria (1751 ms) que ye monte prestosu astur

Ver progresos en: Retos montañeros