viernes, 26 de octubre de 2012

Refuxu de Respomuso (Uesca) - Pico Vachimanya

10 de Setiembre de 2011

Track: Refuxu de Respomuso (Uesca) - Pico Vachimanya


8 menos díez de la mañana y tamos dimpuestos, pa la siguiente estaya pirenáica. La nueche, a pesar de ser munchísimos menos nel refuxu ya que tamos a llunes pela mañana, de tar nuna habitación con bañu propiu, nel que duchámonos estupéndamente, nun foi meyor que l'anterior.

Por qué? Pues porque los refuxeros tan emperraos en llendar el descansu. Como? Pues si tengo venti persones en tol refuxu, pa que los voi dexar tar a gustu y descansar... meyor mételos a toos nuna habitación y piesllo les demás, nun vaya ser que pasen bona nueche y tenga que colocar cuatru colchones más.

Salimos penriba del refuxu de Respomuso (2141 ms)

Entre esto y la mierda de cena y el ruín desayunu, una vegada más, ya va perdiendo enteros el refuxu a pesar de la caña de cerveza, jeje. Polo demás, tamos nel día más sele de toos, poro dexamos trastos na taquilla y despedímonos Carlos y Miguel, que tóca-yos tornar pa Madrí.

Como últimu detalle, Carlos-y prestó a Fernan un palu, ya que'l suyu espeñóse na Breca Latour, nos primeros destrepes y nunca más se supo, jeje. Ensín más, col día pelín raruno, salimos per detrás del refuxu, col envís de garrar un camín que llévenos hacia'l Campo Plano.

Les pirámides d'esti circu siguen tando nel aire y nel augua
El camín a siguir, nun pue ser más guapu. Primeru xubiremos, un pelín per unos collaos hasta l'Ibón de las Ranas, onde esfrutamos del reflexu de los piramidales montes del Campo Plano, Llena Cantal y Tebarray nel augua.

Pocu más alantre, daremos una envuelta y veremos un banzáu enorme, nel Campo Plano como non, que da la sensación de nun llenase del too na vida. A tou esto, hasta'l propiu banzáu tuviemos la compaña d'un perru pastor preciosu, que paecía animase a siguir con nós, pero les sos obligaciones oveyeres pesaben más. Una pena.
 
 

El banzáu de Campo Plano... llugar perguapu

Bordiaremos la paré del banzáu, pela esquierda y caleyaremos tranquilamente a la vera d'esta hasta travesar una riega, que va facénos ganar la vega drecha del barrancu de Campo Plano, baxo l'atenta mirada d'unos personaxes entrañables, les marmotes.

Coles marmotes bien tranquiles garramos el barrancu de Campo Plano

Taremos un ratín, sacándo-yos semeyes, ya que nun paecían asustase demasiáu, demientres almiramos les guapes parés que caen del picu de la Peyre, sol banzáu de Campo Plano o de como relluma'l sol, nes parés del picu Gabizo Cristal.

Espeutacular semeya del picu Cristales

Llevamos un hora aproximáu, cuando entamamos l'ascensión hacia'l colláu de la Fache, la cual llevarános al llau del Barranco de Campo Plano, durante un bon tramu, esfrutando del soníu del augua en dellos saltos y de les vistes hacia atrás de tol circu de Piedrafita col Midi d'Ossau al fondu.

Avanzamos siempre a la mandrecha del barrancu de Campo Plano

 Ensín más, siguimos xubiendo desnivel, col pico de Llena Cantal, torturándonos, ya que nun somos a pescanciar si dempués del oxetivu cimeru, el Vachimanya, podremos dir a visitalu, pa presentá-y los nuesos pies, pisándo'l so cumal. 

Pel momentu, amuésanos una cara oriental bien fiera, con un crestéu hacia'l norte que mete mieu, poro intentamos dexar pa prau estos camientos, hasta que podamos agüeyar con bona perspeutiva, los sos accesos.

Pasamos al llau de los ibones de la Fache

Los nuesos siguientes pasos, van llevanos a aportar a un colláu a 2520 ms, nel que podremos ver a la fin, el pedreru final, que tien de dexanos nel colláu de la Fache. Eso sí, primeru tendremos que bordiar pela mandrecha ún de los ibones de la Fache, que tan guapu collor tienen.

En menos de dos hores y media, taremos xintando daqué nos 2659 ms del colláu de la Fache, que daría pasu a una ablucante vista de la fastera francesa de Pireneus, cola mole del Comachibosa, como puntu más altu. Pero como dixi, va bona, el día ta perruno y el Pique Longue, tien una ñube enriba que casi nun mos dexa velu.

Entamamos la llarga ascensión al Vachimanya

Magar d'un cuartín d'hora descansando, vamos meténos na llarga arista del Vachimanya o Gran Fache, de la cual camiento nun saber que decir, ya que paez una montonera piedres puestes de cualquier manera, colo que faíse difícil decidir pa onde empobinase na ascensión.

Eso sí, les vistes son una maraviya durante tol ascensu y na primer parte que vamos dir más pegaos a la vertiente oeste, tendremos embaxo nuesa tolos ibones de Fache y Campo Plano y Respomuso más allá, acompañaos de vistes hacia los Infiernos alantre y de picos como'l Pequeño Fache, Aragón, Cambalés y Peyre detrás.

Marmoleres nos Infiernos

La verdá ye, qu'anque nun seyan tresmiles, dan ganes de xubilos toos y toos atraen enforma, pero como tamos ante'l nuesu tresmil, nun perdemos muncho´l tiempu, y pasámonos a la otra fastera, mirando pa Francia y fadremos una segunda parte d'arista bien asemeyada a l'anterior.

Esto sedrá, hasta un hombru (2956 ms) nel que tornaremos a mirar pal occidente, quedándonos un tramu final d'arista. Equí paramos unos minutinos pa echar una güeyada a la baxada que tenemos na tiesta y tocarános facer la parte de l'arista más aérea y téunica con dalgún trepe en dalgún bloque alto, pa finar caminando hasta'l cumal.

Ablucante arista que paez nunca finar hacia'l cumal

A la fín más d'una hora y cuartu d'arista y tres hores y 45 minutos dende'l refuxu, costónos aportar a los 3001 ms raspiaos del pico Vachimanya o Gran Fache, que recíbenos con un vientín repunante y con unes ñubes amenazantes de mandános aína p'abaxo.


Cumal del pico Vachimanya (3001 ms)

Aún así, aguantamos casi media horina na cume y demientres xintábemos, decidimos que l'ascensión del Llena Cantal nun yera posible bordiándolo pel oeste, ya que nun se veía nengún puntu de pasu na so cresta hacia'l picu Piedrafita.

A posteriori, acabes mirando les duldes y ves que la paliza de xubir al colláu de Piedrafita, baxar al ibón Alto Azul y xubir al cuello del Infiernu, ibón de Tebarray y colláu de Tebarray, merez una ruta solo ella. Sin facer, el Vachimanya, diba ser una pasada conocer toos esos collaos, picos ya ibones.

Les vistes increyibles a los Picos del Infierno y el circu de Piedrafita baxando

Dexando pa prau'l Llena Cantal, apostamos por dir al hermanu menor, el Pico de Campo Plano y pa ello, baxamos al hombru, destrepando'l pasu aéreu de l'arista y empobinámonos pel hombru en direición Este, hasta que tirámonos abaxo ensín mayores problemes, per una faldera con varies terrazas, qu'a piques dirán dexándonos no baxo del valle de los Ibones Altos de Campo Plano.

Baxando al silenciosu valle rodeáu d'altes montañes

Muncho güeyu con esti valle, ya que ye ún de los llugares con más encantu nos que tuve en Pireneus. La so carauterística cimera ye'l silenciu, la tranquilidá y soledá que desprende. Ye una autentica preciosidá, el circu que faen pel Este, Vachimanya, Pecicos y Punta Zarra, pel Sur el picu Gaurier y pel Oeste, Campo Plano, Llena Cantal y Piedrafita, y como únicu pasu posible'l colláu de Piedrafita, que paez difícil d'algamar.

Travesamos el valle del "silenciu"


Realmente, foi un momentu máxicu tar nesti valle, pero'l día seguía poniéndonos un poco n'alerta, llevándonos con demasiaes prieses, poro siguimos avanzando hasta'l colláu pente'l pico de Campo Plano y Llena Cantal.

Baxamos del Vachimanya y vamos pal Campo Plano

Ficimos la xubida, per un tarrén muncho meyor de lo que veíemos, en la baxada del Vachimanya, el cual inda salúdanos con una ñube prieta enriba, al mesmu tiempu que facemos col deu sola so faldera el percorríu que siguimos p'aportar al valle.

Ascendemos sele cola presencia del Llena Cantal aturullándonos

A la una y media más menos, azotaremos les mochiles nel colláu, onde a la fín alcontramos dalgo de vida en delles cabres y oveyes. Dexámosles al so rollu y ascenderemos hasta un hombru de 2600 ms, onde ganamos l'arista que nun abandonaremos, pondiendo dalguna man qu'otra na roca, hasta los 2711 ms del pico de Campo Plano. 

Últimos pasos al picu de Campo Plano (2711 ms)

Nun taba mal, nel día de güei, llevábemos dos pirámides d'esti Exiptu de Piedrafita, anque nun fuera la más deseada de toes, la de Llena Cantal, que teníemos xustu detrás de nós na semeya de cume. Ehí, siguía castigándonos cola so presencia casi chulesca.

Baxamos hacia'l ibón de Llena Cantal cola cresta de Pondiellos a la Forqueta cerrándolu

Ya taba bien, eso taba claro, asína que baxamos de nuevu a les mochiles y diba siendo hora de xintar el bocata en condiciones. Poro, siguimos colláu abaxo pente les oveyes y dirixímonos a conocer un guapu y grande ibón, como yera'l de Llena Cantal, que si nun fuera pol mal día que taba, diba agasayanos con un bañín de xuru.

Siguimos cola vista puesta nos cumales mientres dexamos l'ibón de Llena Cantal

Na so vega, foi onde decidimos parar y descansar unos bonos minutos, demientres el pico Tebarray, yera capaz d'atraer tanto como'l Llena Cantal, dándonos un pocu d'ánimu como pa que conociésemos a los dos nuna incursión futurible.

Per delantre'l descensu hacia Respomuso colas Fondiellas de frente y les pirámides de culu

Yeren les 3 de la tarde y en Pireneus, esto normalmente ye hora de formación de tormentes. Les ñubes yeren un indiciu claro d'ello. Nun había más que dicir, asína que garramos el GR-11, que pasa pol llagu y fuímos despidiéndonos según baxábemos hacia Respomuso, de tolos cumales posibles.

De Llena Cantal a Piedrafita y d'esti pasando polas Marmoleras al Tebarray, que continuaría pelos Pondiellos hasta la Forqueta y así, hasta poner la vista al frente y fixarnos na ruta del día siguiente, la cual díbemos pescanciando pente les muries infranqueables de las Fondellas. 

Col refuxu de Respomuso más cerquina y las Fondellas nel puntu mira

Esi yera l'oxetivu de mañana y güei, cuando aportamos al refuxu de Respomuso, dempués de baxar por Llena Cantal y cruciar la mayada del mesmu nome, coles ñubes escupiendo dalguna gotina, llevábemos enriba ya 13,2 kilómetros en total y un desnivel acumuláu positivu de 1325 ms, nes 8 hores y venti minutos de ruta.

Asína que, tocaba relaxase, duchase, cenar lo que nos dieran... y durmir pa tar mañana a tope que tocaba retirarada al final d'una ruta bien dura...

Camudando'l Camín y Ortzamendiren Sua con un santu...San Miguel

Nesti segundu día pirenáicu ficimos un 3mil: Pico Vachimanya o Gran Fache (3001 ms)

Ver progresos en: Retos montañeros

jueves, 18 de octubre de 2012

Refuxu de Respomuso (Uesca) - Pico Os Moros

9 de Setiembre de 2011

Track: Refuxu de Respomuso (Uesca) - Pico Os Moros


Son les 7 la mañana y tamos na primer xornada seria d'esti viaxe a Pireneus 2011-2012. A la escontra de lo camentáu, por mor de la cantidá de xente qu'había nel refuxu de nueche, fuimos a descansar bien y eso que metiéronmos na habitación estra, a la qu'aportábase dende la cocina. 

El casu ye que, plantámonos nel tercer pisu de lliteres y tuviemos cincu colchones pa nós tres, colo que descansamos perbien pa tar a tope nesta xornada. Otra cosa perdistinta, foi la cena del día anterior, con carne guisao, del añu que la inventaron y una sopina más bien, insabora... menos mal que teníen un grifu cerveza, jeje.

  Partimos del refuxu de Respomuso (2141 ms)

A les 8 menos venti, tábemos cola mochila puesta, col pesu mínimu posible, tanto na espalda como nel estómagu ya que'l desayunu yera más bien probe. Así que dexamos esto pa prau y salimos col día esconsoñando hacia la muria del banzáu de Respomuso, pel mesmu camín que viniéramos el día anterior.

Calecemos pates penriba del banzáu na faldera de las Fondellas

Caleyaremos pel senderu, hasta qu'al altor de la muria del banzáu, envede baxar pegaos al ríu Aguas Limpias, vamos siguir un senderu que dirá pegáu a un canal d'augua que tráila dende los ibones d'Arriel al pergrande banzáu de Respomuso.

A vegaes, vamos penriba'l canal y otres per senderu pelín más enriba, pero siempre calteniendo l'altor al traviés de la faldera de las Fondellas, arrodiendo nesti casu'l contrafuerte Ledormeur y la cresta Robach. Equí, en Pireneus, son mui de poner nomes a toles víes feches p'ascender dalgún picu.... y paez ser que los franceses lleváronse práuticamente toes.

Ablucantes vistes (Foratata, Retona, Escarra, Collarada...)

Calecemos motores caleyando, y nel intre, apaecen ante mí, una inmensidá de montes con formes tan atrautivas, que nun acabo de quedame con nengún como preferíu, como tampoco soi a quedame colos sos nomes, demientres Fernan va diciéndome cual ye cual.

La verdá ye, qu'anque nun lleguen nengún hasta esa cota estúpida de 3mil metros, los Foratata, Retona, Escarra, Collarada, Pala de Ip,.... son una preciosidá, caún con una morfoloxía carauterística, que nun fai otra cosa qu'atraer al montañeru enforma.

Aportamos a los ibones d'Arriel conociendo ún a ún

Ún hora y cuartu más menos, llevanos de ruta cuando finamos de da-y la vuelta a la fastera sur de las Fondellas, y vamos nel intre, a dir conociendo pasín ente pasu, los distintos ibones d'Arriel. Primeru serán dellos pequeños na parte baxa, pa dempués con una pequeña baxada, garrar el camín que vien dende A Sarra, bordiando l'ibón d'Arriel Baxo, el más guapu de toos, pela so mandrecha.


Ganamos altor cola vista nel Pallás y n'Os Moros escaeciendo los ibones d'Arriel abaxo

Dempués, tendremos un tramín hasta'l Ibón Alto d'Arriel, el cual casi nun pisamos y garramos un camín per un pedreru, que dírá nun ascensu fuerte ganando altor, hasta una especie de colláu nel que xuntámonos col camín davezu dende la parte alta del ibón altu d'Arriel que va hasta l'ibón Cheláu.

Ascendemos hasta´l Ibón Cheláu col picu Arriel impresionante

La pallabra Arriel, ye una constante durante gran parte d'esta ruta, porque si a los dixebraos ibones, amestámos-y la preciosidá de picu que da nome a esti llugar ya tenemos el completu. Y ye que voi sacándome de la tiesta esa supuesta personalidá que tienen los 3miles en Pireneus... porque quien nun-y da importancia a un 2800 como'l que tien Fernan nes semeyes d'enriba??? Perguapu.

A les dos hores y venti minutos, vamos facer la primer parada pa xintar una barrina a la vera l'Ibón Cheláu, sol cual albidramos que la tormenta del día anterior dexó con un color turbiu, dándo-y un toque pelín raru pa un llagu d'alta montaña.

Tramu perpindiu hasta l'abrigu Michaud col Pallas y Os Moros protagonistes

Dende'l Cheláu, entamaría quiciás la vía de la Gran Diagonal, que ye la que vamos acometer y la que Fernan quier conocer, ya que dende Respomuso, la opción más corta sería por la Breca Latour. Pero a pesar, de la vueltona que tamos dando, tenemos ganes d'esfrutar navegando per esta llarga vía d'esta enorme montaña.

Nestes altures, xuniéronse a nós, la familia madrilana, Miguel y Carlos, que con menos experiencia montañera que nós, queden un pocu baxo'l nuesu cargu, cosa que facemos bien a gustu, guiyándolos nesta primer parte per un pedreru xigante hasta l'abrigu Michaud, onde realmente entama la Gran Diagonal y del cual nun fui atopar el por qué del nome, a pesar de lo peculiar d'esta cueva.
 
La Gran Diagonal amuesa'l so nome nuna continu ascensión

A partir d'equí, pudiéramos dividir la Gran Diagonal en tres partes. Les dos primeres son una llarguísima y pindia pedrera, na que nun solemos tener nengún problema, más que mirar onde ponemos los pies pa nun tirar piedres a los demás y que tan separtaes per un descansu con un pasín aéreu llateral con vistes a los llagos de Micoulaou.

Magar d'esti descansu col pasín, vamos meténos na segunda parte, qu'empíndiase un pelín más, teníendo dalgún trepe qu'otru pero ensín dificultaes, hasta que cerca d'aportar a la Breca d'Isards, desviámonos a la mandrecha pa ganar un canalizu.

Caberu tramu hacia'l cumal del Pico Os Moros

Hai que tar sollertes nesti puntu, ya que l'ascensión pide siguir hasta Isards y podríemos meténos nuna bona enriscada, si ponémonos testerones con xubir dende ella. Nós, enquivocámonos un pelín, pero aína tornamos a baxar un pocu pa empatar nuna travesía col ascensu pol canalizu.

Esti canalizu, que pudiera ser la tercer parte, estréchase y agasáyanos cola trepada más difícil de la Gran Diagonal, anque faíse bien n'oposición, pa llueu xubir andando, cola vista del llagu de Batorabère embaxo nuesa, hasta'l cumal de 3142 ms del Pico Os Moros.

Agora sí, pisando la cumera del pico Os Moros

En total, pelín más de 4 hores y media tardamos en facer esti espeutacular monte, que déxame con unes sensaciones bien guapes, anque con un tastu a monte masificáu, nel que'l mayor peligru ye la cantidá de xente que xube y baxa, col peligru de cayía de piedres.

Al final, los nuesos collacios, Miguel (fíu) y Carlos (pa) nun pudieron facer cima con nós, ya qu'a Miguel dio-y un pelín de respetu la parte final de la Gran Diagonal y vió que la so llende de pasalo un pocu mal, ficiera tope. 

Cumal del Pico Os Moros o Balaitus (3142 ms)

Esto paecióme, una decisión increyible pa un chaval tan mozu y d'una responsabilidá y madurez total, lo cual ye d'agradecer y de reconocer pola nuesa parte. Aparte d'esto, dicir que la próxima vegada que-y vayan dar un tientu a esti Balaitus o Pico Os Moros, van xubilu ensín problemes ya que como primer tresmil, llegar onde llegó foi ya un auténticu ésitu.

Pola nuesa parte, casi cuarenta minutinos tuviemos na amplia cume, faciendo delles coses como: xintar dalgo, beber otru pocu, estrenar la camiseta del centenariu del Baskonia Mendi Taldea y en definitiva... esperar a que nos dexasen el vértice pa facenos la semeya ... coses que pasen nestos tresmiles estraos de xente.

Vistes pa tolos llaos: Infiernos, Midi, Comachibosa....


Como non, tamién tocó esfrutar de vistes hacia'l Comachibosa o Vignemale, hacia los Picos de los Infiernos o al pergupu Midi d'Ossau, que tantu tiempu llevábemos viendo dende l'entamu de la Gran Diagonal. La verdá ye que tábemos nun día con un tiempu inmeyorable y les vistes amosábenlu a les clares.

A la una de la tarde, decidimos siguir alantre, con munches incógnites per delantre, ya que nun sabemos si vamos a da-y a dalguna de las Fondellas o vamos baxar o que. La verdá ye que l'ascensión y accesu hasta la Gran Diagonal, foi más llento de lo esperáu y a pesar de ser inda la una la tarde, Tito tien per delantre un descensu hasta A Sarra y un viaxe a Basauri.

Colas Fondellas de fondu baxamos hacia la Breca Latour

Dexaremos les decisiones pa prau, tirando con xeitu hacia la brecha Latour, vía normal d'ascensión ivernal y p'aportar a ella, siguiremos dellos h.itos, que van faciéndonos descender per una inmensa muria, que vista dende las Fondellas, parecería imprauticable, pero que nel intre, nun tien nenguna dificultá.

La breca Latour, ye una chimenea con varios resaltes que n'iviernu ta enllena ñeve y xúbese cenciello, pero en branu, ta desnuda y pa baxala requier unos destrepes curiosinos con una roca permala, Poro, upámonos hasta la peña a la manzorga de la brecha y entamamos a destrepar a pesar de ver un primer rapel a utilizar.

A la gueta del primer rapel a facer

Esti destrepe, a pesar del ambiente que tien, faise fácil y acabamos desdexando hasta dos rápeles, hasta qu'averámonos en travesía, hasta l'entamu d'unes barres de fierru a mou d'escalera, que mos presten más bien pocu, por lo que decidimos sacar material y rapelar dende la tercer reunión qu'alcontramos.
 
Guapa semeya rapelando col cresta Costellirou al fondu

Esti pequeñu rapel (cuerda de 30 ms y 7 mms) va dexános nel propiu canalizu, qu'alcontramos con un estáu llamentable de roca, notándose l'acción del xelu durante munchos meses del añu, poro tando preparaos ye tontería destrepar.

Tito y Fernan rapelando otros dos pequeños rápeles

Metémos-y dos rápeles más, protexiéndonos por turnos onde podemos, pa nun azotanos nenguna piedra y plantámonos na parte baxa de la brecha de Clement Latour, cola sensación de perder el tiempu nes primeres destrepaes, ya que xuniendo les dos cuerdes de 30 ms que teníemos, taríemos abaxo nun tris.

Breca Latour dende abaxo ya cola Aguh.a Cadier a la esquierda

Casi una hora y media, tardamos en baxar dende'l Balaitus hasta'l crucie d'esta vía, col corredor que xubiría hasta la aguh.a Cadier y la cresta de las Fondellas. Nel intre, ya decidiéramos nun xubir nenguna cota más y asína Tito podría llegar ceo a casa y nós tamién tábemos bien contentos cola actividá del día, decidiendo dexar las Fondellas pal nuesu últimu día de montaña.


Siguimos baxando con Costellirou y el ibón de Vuelta Barrada

Cola tranquilidá que da, tener el llabor bien fecho, dedicámonos a descender sele, ablucaos pola cresta Costellirou y cresta del Diablo, que va dende'l Pico Cristales hasta'l Pico Os Moros, con un puntu central nel Pico Soulano. Como dixo Fernan,... esos son pallabres mayores.... actividá alpina en toa regla.

Más descensu cola Cresta del Diablo y al fondu Respomuso

Asína que, siguimos alantre y viendo como diben formándose dalgunes ñubes d'evolución, foron a entainar el descensu, demientres descubríamos dalgunos ibones como'l de Vuelta Barrada o Sclousere, nel nuesu camín.

Camín que dibemos facer, a media falda pente'l contrafuerte Bondidier y el barrancu de Respomuso, algamando esti últimu, nuna baxada cenciella coles vistes perguapes del banzáu, el so refuxu y munches de les cotes que cierren el circu de Piedrafita, dende Musales a Tebarray, pasando pola Forqueta y siguiendo de Tebarray, colos Infiernos detrás, al Pico Vachimanya o Gran Fache pasando pola muria que faen los Marmoleras, Piedrafita, Llena Cantal, Gauner, Zarra y Pecico.

Tito despedíase de nós con esta guapa semeya de Respomuso


Finalmente, aportábemos al refuxu, dempués de dános un abrazu con Tito y deseá-y bon viaxe, a les 4 la tarde en puntu, faciendo un total de 8 hores y 17 minutos. Nesti tiempu, fuímos a percorrer una preciosa ruta circular de 11,1 kms, superando un desnivel positivu de 1200 ms y lo que ye más importante, ficimos una actividá percompleta nun tarrén d'altes montañes y guapos ibones d'un color azul increyible.

El restu'l día pasaríemoslo, dándo-y a esi gran inventu que ye'l barril de cerveza, acompañáu de frutos secos hasta que tando cerca la hora la cena, dímonos una duchina na nueva habitación na que nos aloxaron, como non, xunto a los pocos que quedábemos nel refuxu.

Al día siguiente más...

 
Camudando'l Camín nel cumal del Pico Os Moros o Balaitus

Nesti primer día pirenáicu ficimos un 3mil: Pico Os Moros o Balaitus (3142 ms)

Ver progresos en: Retos montañeros