martes, 27 de marzo de 2012

Sobrefoz (Ponga) - Peñe Recuengu

25 de Febreru de 2012

Track: Sobrefoz (Ponga) - Peñe Recuengu



Tenía preparáu esta ruta dende cuantayá y yera una d'eses que ties nel bolsiellu por si fállate dalguna otra. Realmente, foi na primer intentona a Peña Ten cuando, ensín conocer muncho la zona, metiósenos na tiesta, restolar dalguna ruta que saliese del pueblu de Sobrefoz en Ponga.

Asína ñació la ruta qu'intentase xunir los montes Rasu, Recuengu y Zorru y al tener a Nel, los nuesos collacios Pilar y Diego, tuve que poner una ruta que supliese una de les suyes, poro entró ésta al llistáu de la temporada 2011-2012.

Pa llevala a cabu, teníemos la suerte de contar col grupu averáu dende Euzkadi, con Fernan a la tiesta y acompangáu por Oscar, Amaia y Juanan, poro magar, del paséu davezu pela autovía cantábrica hasta Lloviu, tiramos hasta Les Arriondes y d'ehí a Cangues d'Onís onde xuntámonos toos col envís d'almorzar.

Dempués de pinchos, bollería y demás hestories partimos, con otra bona tirada de viaxe per delantre, garrando la N-625 onde pasaremos pelos pueblos de Cañu y Tornín, cruciaremos el puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga.


Partimos del ríu Enol (811 ms)

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-3, que nos llevará al traviés d'Abiegos y Yanu a la fin a Sobrefoz.

Dicir, que ye ún de los acesos más llargos en coche, pero de lo más guapu que pues alcontrate, ya que durante dellos kilómetros fuimos viendo por partes los cumales ñevaos del Pierzu, La Llambria, les Ñarices de Malhome o'l Recuengu entre otros.

Anque diga nel títulu de la entrada que partimos de Sobrefoz, vamos quitános d'enriba, un par de kilómetros de xubida (y otros tantos de baxada) de la pista que xube a Ventaniella hasta la curva de la riega Enol. Ellí tendremos un bon llugar pa dexar un par de coches ensín molestar en nengún momentu.


Entamamos a xubir coles Ñarices de Malhome detrás

Los preparativos faense pelín llargos y tardamos más de lo normal en ponenos a caleyar, poro pasaes les 10 de la mañana a la fín, tamos ya con tolos trastos necesarios pa descubrir una nueva fastera más de Ponga.

Pa ello, garraremos na mesma curva, un camín que siempre a la manzorga del ríu Enol dirá faciéndonos ascender cómodamente pente lo que nómase como'l Monteayeru, quedando na otra vega'l ríu, el monte Fana.


Guapa visión del Maciédome

Tenemos per delantre una ruta con munches incógnites... nun sabemos cuanta, nin en qu'estáu ta la ñeve, como ye la xubida pela foz de los Argayos, que cumales sedremos a facer... quiciás la ruta preparada seya demasiáu ambiciosa pa esta dómina del añu. Nun lo tengo nin mediu claru.

Anque como siempre, a vegaes, val más nun da-y demasiaes vueltes. Simplemente ye meyor caleyar, echar una güeyada a cumales averaos nel tiempu, como'l guapísimu Maciédome que tenemos a les nueses espaldes, y esfrutar d'una guapa charra colos tos collacios.


Xubimos a la manzorga del Enol hacia la Foz de los Argayos

La sienda ye bien prestosa y bien ceo taremos a puntu d'arrimanos al ríu, ya que tamos a pocu d'adentranos na Foz de los Argayos formada pola Peñe Les Cabriteres a la manzorga y pola peñe Bermeya a la mandrecha. Ambes parés, impresionen más y más, sigún vamos metiéndonos en plena foz.

Xustu enantes d'entamar la propia foz, tendremos que cruciar el ríu Enol hacia la mandrecha y ellí, pisaremos les primeres buelgues de ñeve, bien pegaos a la paré de la Peñe Bermeya, la cual ye la que fai los Argayos de ñeve, que dan nome a la foz.


Cruciando'l regueru Enol

Amás, seremos bien conscientes d'estos argayos, ya que nel primer tramu de foz, travesaremos los restos d'un par. Val más, nun tar nel momentu que cayeron, porque había bonos morriyos en plena argayada.


Avanzamos pela Foz de los Argayos cola Peñe Bermeya enriba nuesa

Llevamos pocu más d'una hora de ruta, cuando vamos dir saliendo de la foz, col envís de dirixinos a la mayada d'Enol. Nel intre, vamos abandonar la ñeve duro que llevamos pisando por mor, de tar protexía poles muries del sol y vamos danos cuenta de lo blando que ta'l restu del camín, faciéndose bien duru abrir buelga.


Pisando na solombra la ñeve hacia'l mayáu d'Enol

Aportaremos a Enol, onde malpenes vese dalgún restu de cabaña, nun sabemos si ye que la ñeve tápalo too o ye que pocu más queda. Dende equí, tendremos ya a nuesa espalda'l Picu Zorru y la so cume menor, el Lluengu, que formen el colláu Zorru.

Y enfrente nuesa tará la Peñe Recuengu, primer y posíblemente única cota a intentar nel día, ya que tamos pasín a pasu, dándonos cuenta, que la ñeve ta nun estáu llamentable. Esto va ser una grandísima realidá, a partir, de que cruciamos el regueru Enol de nuevu.


Cola Peñe Les Cabriteres al fondu cruciamos la riega de nuevu

Equí, van presentase dos posibilidaes, xubir hacia'l colláu Cáldes onde ta la vía normal a la Peñe Recuengu o ascender hasta'l colláu Carambones, dende onde somos a pescanciar una posible vía d'ascensu per una pala ñeve que xube per terraza ascendente.


Empobinámonos hacia'l colláu Carambones en busca de la nuesa vía

Nun tengo, nin mediu claru, porque escoyimos la segunda opción. La verdá ye que camiento que foi la propia dificultá d'avanzar pola ñeve, la que llevónos a la gueta del colláu Carambones. Tengo que dicir, que la dureza d'empozase a cada pasu que dábenos yera completamente frustrante. Agradecer como siempre'l trabayu de Fernan y Juanan nesti tramu, porque yera mui cansáu tirar alantre tol tiempu ún solu.

Como exemplu del estáu de la ñeve, pudimos comprobar como un xabaríl tuvo a puntu de morrer de cansaciu nel intentu de fuxir de nós. Alcontróse con un grupu xente y nun supo pa onde tirar y tal foi l'esfuerzu que dióse por vencíu y quedóse tiráu na ñeve a esperar que pasásemos de llargu. Diónos muncha pena, velu nesi estáu.


Alcontrámonos nel ascensu con un xabaril fozando na ñeve

Pero tampoco ye que tuviéramos pa pasar pena de naide, porque la soba taba siendo muncha pa nós tamién. Demientres, pocu más nos quedaba qu'echá-y un vistazu dacuando pa descansar al Zorru. Que guapu veíase dende la nuesa posición, pero que lloñe taba y qu'imposible de facer nestes condiciones.


El Picu Zorru y delantre'l Lluengu

A la fín, pudimos aportar al colláu Carambones, llugar de pasu pente la Peñe Les Cabriteres y la Peñe Recuengu y ficímoslo con una bona xera na que puso'l final Juanan, abriéndonos buelga durante un bon tramu de xubida.


Sofriendo nel ascensu a Carambones (1413 ms)

Aparte d'un merecíu descansu, esti colláu va dános el placer d'acolumbrar el Picu Tiatordos una vegada más y ye que naide pue cansase de miralu nunca. Augua y dalgo de xintar viénmos al pelo, porque darréu diba llegar lo más duro y nin siquiera sabíemos como taba la vía escoyida.


Colláu Carambones (1413 ms) col Tiatordos y la Llambria a vista

Llevamos pocu más de dos hores de ruta y toca meté-y un intentu hasta peñe tan hermosa. Los tracks que tengo, nengún xube per onde vamos intentalo, así que vamos dafechu ciegos de nenguna referencia.

Falamos un ratín Fernan y yo, de les dos posibles víes, solo vemos factible la de la pala ñeve penriba la terraza. Hai otra posibilidá per un canalizu, pero ver como argaya cachinos de ñeve dende les parés al canalizu nun da nengún bon rollu.

Pangua, que tenía ganes d'echar un gabitu abriendo buelga, ponse a trabayar en cada pasu y fai un trabayu perduru, que podemos siguir yo y Fernan de cerca, demientres los demás, van avanzando na buelga que vamos dexando. Anque con estes condiciones, metiendo la ñeve pela rodiella, lo que pa ún ye pasu cómodu, pa otru con más pesu, pue fundir muncho más, abriendo buelga propia tamién.


Intentando ganar les parés del Recuengu pela pala ñeve

Avanzaremos llentos, averándonos hacia la paré de la peñe hasta que Pangua quédase empozáu nun pasu, y doi'l relevu, pa finar la pala de ñeve de la terraza hasta aportar a la roca, onde descansu un ratu fuera de la ñeve y espero a ver como sigue avanzando la xente.

Toi nun puntu, nel que tenemos que facer una travesía penriba d'una peña tumbada. Nun ye mui difícil, pero ye dalgo espuestu, porque la pala ñeve acábase nesta peña y p'abaxo tal canalizu empozáu pente les muries.

Falo cola xente y digo que sigo p'arriba a ver que m'alcuentro, si solo ye esti pasu, podríase dir asegurando a tol mundiu pa xubir, pero alcuéntrome con un tarrén amestáu de ñeve y peña, más vertical que lo otru y veolo complexu pa tanta xente.


Enmediu del voláu tarrén amestáu de ñeve hasta l'arista

Fernan, tampoco s'alcuentra seguru coles botones de plásticu que lleva y dase la vuelta, colo que los demás tamién deciden baxar faciendo un pocu de culuski, muncho más cómodu qu'empozase na ñeve de nuevu.

Asína, que tan solo pasó detrás mío Pangua. Fizo'l pasu de la placa tumbada y metímonos pocu a pocu, n'otra palina de ñeve na que preferí sacar el piolé pa dir un pelín más seguru, ya que yera abondo más vertical que la otra.

Dempués d'esta pala, tocó amiestu de roca y ñeve, más vertical, que supero bien. Pangua paez que tien piores sensaciones, pero sígueme con bon xeitu, poro metémonos n'otra palina de ñeve blando, hasta aportar a una peñona, qu'oblíganos a escoyer superala pela mandrecha o manzorga.


Picos pa un lláu y la Llambria y Tiatordos pa otru

Una pena que nun haya nenguna semeya casi d'esti tramu, porque foi un bon exerciciu de confianza a la hora de facer monte. Pamidega que la opción de baxar yera más chunga que siguir alantre. Les poques semeyes son col móvil, cuando al menos yo, taba nun llugar más relaxáu. A Pangua-y tocó salir en dalgún pasu guapu.

Finalmente, salimos pela manzorga de la peña, pa dempués meténos nun estrechu canalizu pente dos peñes, que xúbese faciendo dalgo d'oposición y magar d'esti pasu, alcuéntrome nun de los piores pasos mentales nos que tuve.

Solo agüeyo una seta de ñeve y vacío pa tolos llaos. Dígome, que ya pue ser la cresta del Recuengu, porque sinon tamos nun marrón de puta madre. Sigo p'arriba piolé na man y llego al puntu más altu de la seta... menos mal, la cresta sigue alantre y veo un pelín a lo lloñe'l cumal del Recuengu.

Pangua, avérase a la mio posición y diz que vaya como acoyona esti caberu tramu. Siguimos alantre pela cresta con munchu güeyu, porque la cayía pa la Cuesta L'Aldea son 400 ms d'hostia y pal colláu Cáldes, tampoco presta muncho, jeje.


Pangua xintando na Peñe Recuengu (1654 ms)

Finalmente, con curiáu, dalgún pasín aéreu y dalgún trepe-destrepe, somos a aportar a los 1654 ms de la Peñe Recuengu. Nun se si dalguien metióse d'esti xeitu dende la collada Carambones hasta'l Recuengu per esta vía y tampoco importa demasiáu. Tamos enriba y lo que toca, ye tranquilizase un pocu, xintar dalgo y restolar per onde tenemos la baxada normal al colláu Cáldes.

Asína que... abrazu pente los dos, llamadina a los d'abaxo, diciendo que tamos bien, pero que foi h.odía la cosa y que vamos baxar pela normal, si ye que l'alcontramos. Ellos nun ven factible, facer nada más, nin xubir al Recuengu pela normal nin dir hasta'l Rasu. Costó-yos un triunfu la travesía de colláu a colláu y tan tranquilamente xintando en Cáldes.


Baxando pela vía normal con munchísima ñeve

Casi una hora y media llevónos esti ascensu dende Carambones, asína que magar d'un cuartín d'hora de descansu, decidímonos a baxar fartucos de ver les Peñes Santes del Cornión, Tiatordos, Pierzu... y con cierta sensación d'una necesidá fuerte de tar a seguru.

Al contrariu que pal ascensu, pal descensu sí fixámonos nel gps y gracies al track que tenía, alcontramos la vía de descensu que d'entamu llevarános per un tramín más vertical amestáu hasta aportar a una gran palona de ñeve que diagonalmente de norte a sur fadrános descender hasta un pasu pente una peñona solitaria y una paré vertical.

De primeres, baxaremos con muncho curiáu cola ñeve penriba la rodiella y tendremos un bon sustu, ya que les nueses pisaes faen un argayu, quedándonos paraos nel sitiu hasta que fina tol espectáculu de ver dirse tola ñeve baxo los nuesos pies.

Poquín a pocu, baxaremos hasta'l pasu de la peña y la paré, con curiáu de nun liala parda y nesi puntu ya, tendremos el pasín pela ñeve más vertical hasta ver al fin tola pala de ñeve que baxa hasta'l colláu. Equí ya sí, culuski montando una argayada fina, jeje.


Al fin, nel colláu Cáldes (1389 ms) pola vía normal al Recuengu

Con una paliza fina nel cuerpu, vamos aportar al colláu Cáldes (1389 ms) dempués de media hora de baxada, ya que la parte final, menos pindia, ye un auténticu infiernu, metiendo la pata hasta'l cadril en más d'una ocasión.

Alcontrase colos collacios, contá-yos el nuesu ascensu y les poques posibilidaes de xubir que camentamos había pela normal, ya que la gran cantidá de ñeve blando yera insufrible y ver que dá-yos igual non xubir, qu'esfrutaron de la ñeve y del día, nun tien preciu. Sois los meyores.


Sele baxada hacia Enol y a la foz de los Argayos

Con venti minutinos de descansu y xinta pa Pangua y pa mí, que veníemos derrotaos, vamos ponénos nós tamién a baxar al alcuentru de tol grupu que ya tirara p'alantre ya que tábense quedando frios.

La baxada...., pues nada too p'abaxo hasta la mayada d'Enol y n'alantre, cola buelga abierta de la xubida, ya foi rápida y bien ceo tábemos ya metíendonos na Foz de los Argayos, pa dempués caleyar selemente pol Monteayeru penriba'l ríu Enol, hasta l'entamu de la ruta na pista a Ventaniella.


Dexando a lo lloñe los oxetivos non cumplidos

La ruta... pues con sensaciones rares.... per un llau ficimos una bona ascensión, pero van dos rutes siguíes, que nun soi a facer con tol mundiu lo que tengo programáu y nun me presta dexar a la xente pelín defraudada.

Anque nesti casu, foi l'estáu de la ñeve'l que torgónos les aproximaciones rápides col envís de facer cumales, nun te quedes del too agusto, sin compartir cume con tola xente qu'anímase a dir de monte y quédome pensando si nesti casu, la opción sensata yera facer toos xuntos l'intentu pola normal, anque naide pudiere llegar.

En resumen, nesta ruta de tastu amargu, Pangua y yo ficimos la Peñe Recuengu, faciendo pa ello 7,3 kms y superando un desnivel de 990 ms nes casi 6 hores de llucha cola ñeve y a tramos cola caliza.


Camudando'l Camín na Peñe Recuengu

Nesti día de ñeve pestosa ficimos una guapa vía na Peñe Recuengu: monte prestosu astur de Ponga

Ver progresos en: Retos montañeros

viernes, 16 de marzo de 2012

Los Col.laínos (Ayer) - Picu L'Osu

11 de Febreru de 2012

Track: Los Col.laínos (Ayer) - Picu L'Osu




Van dellos fines de selmana los que costónos dir a por esta ruta, ya que'l tiempu foi torgando los nuesos intentos y salieron delles rutes alternatives por mor d'ello, como la del Couríu o Peñe Llabres. Pero esta vegada a pesar del fríu y de les grandes ñevaes, teníemos na mente qu'al menos díbemos da-y un pegue como se diría na xerga esguiladora.

Como siempre, pa llegar al entamu de la ruta, partimos de Xixón garrando la autovía minera y dempués en Mieres del Camín garramos la autovía A66 saliéndonos na salida de Morea, pa percorrer la As 112, pasando polos siguientes pueblos nel nuesu camín: Morea, L'Escuyu, Los Estrul.lones y Cabanaquinta onde garraremos la AS-253 pasando por L.levinco, Entepenes, Col.lanzo, Yanos, La Pola Vieya, el Pino y a la fín Felechosa, onde toca almorzar.


Semeya de partida nos Col.laínos (1340 ms)

Llueu d'un bon descansu de coche, con desayunu en condiciones pente les decenes d'esquiadores, vamos empobinamos hacia'l Puirtu Braña pasando per Cuevas, Roseco, Rufríu y El Fielato, puntu d'aniciu de la ruta.

Pero como finalmente, nun alcontramos la entrada a la braña llimpia de ñeve, tuviemos que siguir un pocu más alantre hasta los Col.laínos, onde na marxe esquierda de la carretera pudimos aparar los coches y mudanos de ropa a una temperatura d'unos -6º, pero con bon sol y un día rellumante.


Pisando ñeve como los neños en direición al Fielato

A la fin, unos minutinos enantes de les 10 tamos dimpuestos a esfrutar d'asemeyáu espeutáculu nival que tenemos enfrente, detrás, pa un llau y pa otru. Que pasada!!! Tamos, al día siguiente d' les ñevadones más grandes del añu.

Ensín más, cruciamos la carretera y avanzaremos como neños, pente les cabañes de Los Col.laínos col envís, de da-y presti a esi kilómetru qu'hai hasta'l Fielato, onde teníemos el nuesu puntu de partida.

El paséu pela ñeve nun pue ser más guapu y el día ta preciosu, fríu pero ensín vientu, poro aguántase perfeutu y bien aína, entamamos a quitar capes por mor del sol que calez con fuerza.


Col Fuentes a lo lloñe unes crucien les riegues bien y otros non tanto, jeje

En dalgún momentu, sabemos que tenemos que cruciar el ríu Braña, que da nome al Puirtu Braña (que non San Isidro), pero va facese xusto dempués de pasar pol Fielato y con una ponte mui especial, un quitamieos, jeje. Charly, que vióse con ganes de saltar, muncho enantes de la ponte, diónos una clase de como francer un bloque enteru de ñeve al cruciar el ríu, jeje.

Magar del traviesu del ríu Braña, vamos empobinanos al traviés de los mayaos de Les Regaes hacia la Braña Reonda. L'avance ye llentu por mor de l'ablucante cantidá de ñeve cayía y porque nun tenemos nenguna buelga que siguir.



L'avance ye llentu pola cantidá de ñeve y por mor de dalgún pasín qu'otru

Pero les vistes son tan increyibles, que cada pasu ye una ayalga pa los sentíos. Nun sabes bien si maravillate con tola xerra L'Ayu a la nuesa esquierda o mirar p'arriba a la nuesa mandrecha al picu L.lagarechu o al frente hacia'l Picu Fuentes, o simplemente mirar a la ñeve que pises baxo los pies y relaxarte oyendo'l sele ruiu que faen les botes en cada pisada.

En tou esti tramu, tocarános travesar dalgún regueru más como'l de Braña Reonda y sedrá tamién colos quitamieos que tan bona xera faen pal casu. Estos pasos, son un ñeru de rises viendo como guarda caún l'equilibriu a la espera de que dalguien apilanque y tengamos rises de más. Pero bono... nun sedría lo meyor porque l'augua xeláu nun diba ser una bona broma defechu.


L'ablucante Picu Torres apaez como si fuera un xigante del Himalaya

A vegaes nun sábese mui bien que cuntar en rutes como esta, ya que con dame la vuelta dacuando, alcuéntrome con una montaña que na dómina ivernal tien un puntu himalayescu, la semeya lo diz too: ye'l Picu Torres.

Aparte, tan solo hai que dicir una cosa... esfrutar. Esfrutar d'un día como'l de güei, nel que xuntámonos un bon grupu de collacios (Carlos, Canta, Pangua) y de collacies (Rebe, Silvia, Paulina) y yo, qu'intento de dalguna manera, deprender cada día y ser un bon guía, poro trabayo tolo que pueu pa dir faciendo buelga y que la xente avance lo más cómodo posible.


Ascendemos hacia Braña Reonda

En menos d'una hora taremos na redolada de Braña Reonda, pero nun mos detenemos muncho, ya que los pasos faisen duros y llentos. La ñeve ta nun estáu casi perfeutu, pero hai muncha y facer buelga ye facer buelga, siempre cuesta y muncho.

Aún así, les semeyes de grupu en filera dicen lo que les pallabres nun pueden. Tamos esfrutando. El paisaxe ye máxicu y parase a miralu ye dafechu imprescindible, anque ehí siguimos avanzando hacia'l colláu Vidosu.


Siguimos lluchando cola ñeve hacia'l colláu Vidosu

Colláu Vidosu (1623 ms), llugar máxicu onde la ruta va amosanos los nuesos oxetivos... pero cuales son?? Tenía tres... Xexa, Nogales y Picu L'Osu, pero realmente pocu importa. Avanzamos siguiendo'l track del gps, pero tamién avanzamos por conocer esta fastera d'Ayer, nueva pa nosotros.


Al fin tenemos les vistes grandioses de los dosmiles d'Ayer

Ye difícil saber cual ye cual ensín conocelos de man, asína como saber cuales superen los 2000 ms y cuales quédense pembaxo d'esa cota. Da igual, son toos perfeutos, blancos, rellumantes... tan solu apetez xubilos toos.


Ensín pallabres: Guapísimu

Pero ya ta bien d'acolumbrar cumales, toca intentar xubilos, asína que vamos siguir alantre cola ruta, que ya va casi nes dos hores y cuartu. Nesti casu, va tocános baxar desnivel, lo cual nun presta res, ya que cuesta muncho xubilo pa tener que baxalo, jeje.

Ante nós tenemos un tramín, que faldea la Cuesta Fuentes y que primeru penmediu d'una viesca y llueu a la solombra del Picu Fuentes, va tocanos dir con curiáu por tar la ñeve mui dura, hacia'l mayéu de Fuente Alba, embaxo de los ablucantes Castel.lones.


Avanzamos pegaos a la Cuesta Fuentes pela solombra

Aportaremos al puntu más baxo del valle (1569 ms) pa facer un merecíu descansu y xintar daqué con bona cantidá d'enerxía, ya que va facénos falta de secute, por mor de que'l tarrén va ponese muncho más pindiu.


Una paradina enfrente los Castel.lones

Darréu, vamos meténos nesti valle, nel que siempre n'ascensu, fadremos buelga na mar de ñeve que contrasta col cielu azul del día. Ye increyible poder dixebrar tol abanicu de collores que van del blancu más blancu al azul más fonderu y con una güeyada llarga puédese alcontralos toos. Simplemente xenial.


La ñeve ta nun estáu perfeutu p'abrir buelga

Avanzamos bien, la ñeve déxate trabayar poro, non sin esfuerzu, vamos llantanos nun llugar bien guapu, onde podemos esfrutar del circu que fae la cara oeste del Fuentes cola norte de los Castel.lones.


Metémonos nel circu del Fuentes y los Castellones

Aún tamos, un pelín penriba de los 1600 ms, sabemos que quédanos munchísima xera per delantre. Nun hai tiempu pa parar, asína que seguimos ascendiendo a bon ritmu, toos xuntinos ún detrás d'otru.


Entama a ponese'l tema pindiu

Poquín a pocu, desapaez de la nuesa vista'l Fuentes y vamos arrodiando los escarpaos torreones de los Castel.lones, demientres faíse más duro abrir buelga, alcontrándonos con plaques de xelu, que faen pasalu un pelín pior a los que lleven botes menos ríxides.


La ñeve endurez y abrir buelga faise duro

A la fín, aportaremos dempués d'un ascensu mui alpinu al mayáu de Fuente Riba, onde tenemos el placer de meténos nun mundiu de ñeve preciosu. El circu formáu pol picu Castiel.lu a la nuesa mandrecha y por tola arista que xube al Picu L'Osu que dempués baxa a la Ventana Fuentes pa siguir hasta los Castel.lones ye guapísimu.


El llugar más increyible de toos: El mayéu de Fuente Riba

Tamos maravillaos, el llugar ye d'ensueñu. Nun fai fríu, nun tira l'aire, tamos casi en manga corta y nun hai rastru de nenguna buelga humana per nengún llau. Paez que tamos nun sitiu virxen completamente o al menos esta ñeve ensín pisar dános ese tastu a primeros esploradores.

Nel intre, agüeyo l'arista que xube hacia'l Picu.... Nun lo tengo claro, a posteriori se que foi L'Osu, pero nesi puntu nun tengo claro cual ye cual y a ciencia cierta, camiento que si vamos xubir a dalgún picu, solo dános tiempu al Nogales o eso creía yo.

Somos 7 persones y tan solo tenemos equipu 4, los demás nun tienen nin crampones nin piolé. Equí tamos ante'l primer dilema del día. Que facer, l'arista norte al picu L'Osu (anque pensase que yera'l Nogales nel intre) paez más que practicable, pero.... en que momentu voi alcontrame dificultaes series pa nun poder abrir buelga pa toos??


Tola arista norte del Picu L'Osu ye pa nós

Estes coses esmolécenme muncho y nunca se que facer. Aparte de que tampoco se medir nada bien, les dificultaes ya que pa tol mundiu nunca nun son iguales. Caún ye caún y K-2 una piragua que diríase n'Asturies.

Ensín más, pienso qu'al menos hai qu'intentalo. Asína que caleyo en solitariu pela mar de ñeve que ye'l Mayéu de Fuente Riba, col envís d'abrir buelga hasta'l colláu de las L.lanas, pente L'Osu y el Picu Castiel.lu de 1854 ms, el cual si que camiento factible pa toos.


A pol colláu de Las Llanas pa garrar l'arista

La ñeve ta dura pero faíse cenciello abrir ruta y n'envueltes vamos aportando toos hasta la preciosa arista norte del Picu L'Osu. Hasta esti puntu llevamos casi 4 hores de ruta y l'arista paez que ta en bones condiciones.


Precioses semeyes n'arista L'Osu

Entrugo a la xente y paez que ta tou bien, asína que vamos escaecer la idega de facer el Castiel.lu y seguimos alantre, n'arista más guapa que fice na mio vida. Que increyible xera, siguir esa llínea de ñeve que nos empobinaba hasta'l mesmu sol.


Notales, Fuentes, colláu Riopino... perguapu

De xemes en cuando paramos, descansamos, respiramos... y simplemente acolumbramos en toles direcciones. La ruta lo merez, el Nogales lu merez a la nuesa mandrecha, el Fuentes lu merez a la nuesa manzorga y el Picu L'Osu (anque seguíemos ensín saber onde díbemos, jeje) por supuestu que lu merez.

Namái de mirar pa tol mundiu, veo que la xente ta pasándolo bien, asína que sigo alantre, anque pescancio que la parte final de l'arista tien un resalte que nun me presta res n'absolutu. Ensín más, siguimos pela arista ensín dificultá, ensín crampones, ensín piolé... hasta qu'aportamos al resalte onde la ñeve relluma con un tastiu distintu a lo que llevábemos pisando.


Más y más arista

N'efeutu, la parte final ta xeláu dafechu... que putada... tabemos a pocos metros del final. Tenemos que dexar l'arista un pelín y bordiar el resalte pela esquierda, pasando penriba d'una repisa que compruebo que ye bien sólida y al final de la repisa, toca metése de nuevu hacia l'arista nun tramu bien pindiu.


Parte más abegosu y espuesta de l'artista con xelu

Nun ye complicáu, pero llevar a tanta xente ensín crampones, requier metése una soba a pataes cola ñeve duro, p'abri-yos buelga. Finalmente, diremos aportando toos a l'arista de nuevu, pasándonos los piolés y faciendo un bon trabayu de grupu en conxunto.

Llueu, demientres espero polos últimos en llegar, Canta, Paula y Silvia, faen l'últimu tramu hasta l'arista cimera, pero métense nuna parte más xelada inda teniendo que dar la vuelta con munchu curiáu.


Arista cimera del Picu L'Osu con bloques de xelu nel cumal

Púseme de nuevu alantre, con toos agrupaos, y más a la mandrecha, si que somos a ganar l'arista con facilidá y podemos comprobar lo xeláu y venteáu d'ésta, con formaciones completamente xabaces de xelu. Anque, en comparanza colos últimos metros de la "nuesa arista", foi un paséu feliz hasta'l cumal del.... Picu L'Osu de 2023 ms, jeje.


Cumeeee del Picu L'Osu (2023 ms)

Cuando fuimos aportando ún a ún al picu y vimos L'Osu qu'encuma, camiento que tuvimos toos bien callaos hasta qu'aportase'l siguiente y así sucesívamente,... anque al final a naide-y molestó nin lo más mínimu l'erru de picu, jeje. Foi una grandísima ascensión y teníemoslo toos bien claro.

La pena... pues el vientu fríu qu'azotaba enriba y del que tuviéramos bien aguardaos tola arista. Nun se decir cuantos grados baxo ceru tendríemos ellí riba, pero nun se podía tar muncho tiempu pasando fríu y más inda si veníen unes ñubes nada prestoses que taben afeando'l día.


Baxamos pela arista este hacia la Ventana Fuentes

Poro, tocaba baxar d'ellí, magar de mil y una semeyes cola xente bien arguyosa de la cume algamada. La baxada planteguela hacia la Ventana Fuentes, ya que nun me prestó la parte final de l'arista pa baxar per ella y a los demás collacios menos aún.

Ensín más pusímonos a ello y paecía que nun se facía mal del too, sacante dalgún tramín de placa de xelu, que llibrábase con curiáu faciendo buelga o con dexase resbariar de culu hasta la ñeve más blando.

Asína plantámonos nel colláu de la Ventana Fuentes (1907 ms) magar de les 5 hores y 40 minutos de ruta y casi media hora dende qu'abandonáremos los más de dosmil metros del picu L'Osu.

Nel intre, paecía dir tou rodáu y darréu teníemos que superar una llombuca penriba de los Castel.lones (1980 ms) pa ganar una especie de canal, que protexía pola arista occidental de los Castel.lones, veíase cola ñeve blando, col algame d'una baxada cenciella hasta'l mayéu de Fuente Riba.


Vía de baxada hacia'l Mayéu de Fuente Riba

Los planes son planes y la rialidá ye la rialidá y metíme demasiáu a media faldera por nun facer a la xente xubir a esa llomba, cola consiguiente cagada al alcontrame con una placa de xelu que foi ganando grosor nel avance hasta lo menos diez cms, poro casi nun yera nin a clavar el pie del piolé.

Casi cuarenta minutos intentando abrir vía per esa placa xelu, dan amuesa de que lo intenté too, pa facer pasar a la xente a la canal que paecía tan cerca y tan lloñe a cada pasu que llograba dar, pero nun pudo ser y la xente taba pasando munchísimu fríu a la espera.

Finalmente a metá de camín, dime la vuelta reventáu completamente y na Ventana Fuentes, la xente ya nun taba pa otra intentona penriba de la llomba por si topábemonos colo mesmu. Yeren los 4 de la tarde pasaes... y la xente tomó una decisión correuta, baxar pola cara sur con ñeve blandino al puertu Vegarada.


La mayoría del grupu baxando hacia Vegarada

Demientres, a Pangua y a mí, diba tocanos calzar los crampones y baxar a polos coches hasta los Col.laínos y dempués metése una kilometrada xabaz hasta Vegarada pa poder recoyer a tol mundiu.

Resultáu de nun facer les coses bien??? Ye dicir,.... echá-y güevos y si yes el que más esperiencia tien nel monte, tomar decisiones, pese a quien-y pese.... pues baxar en hora y media a fueu hasta los coches, ensín xintar en tol día y dempués metése más d'un hora de coche pa garrar a los tos collacios, los cuales baxaben del puertu de nueche y a unos 6 grados baxo ceru.



Pangua y yo a fueu hacia los coches

La verdá ye que ya foi mala suerte, porque una cosa ye esperar como nos diben tener qu'esperar y otra ye que salga dalgún llistu y-yos mande per una carretera hasta la parte llionesa de la estación de San Isidro en Riopinos, como si fueran a llegar a la estación pela fastera astur, ensín conocer per onde. En fin, un cúmulo de despropósitos, porque pudieran tar esperando por nós en Redipuertas, con unos cafés y cerveces calentinos, envede caleyando de nueche con un fríu intensu.

Toi escribiendo estes llinees y anque ya pasó más d'un mes, aún siéntome culpable de nun ser un pocu más intransixente y poner llendes a la xente. Tamién, que pasaría si escoyese bien la vía de baxada un pocu más arriba o si teniendo material (4 pares de crampones y piolés) dir alternándolos hasta dexar a tol mundiu nel mayéu de Fuente Riba a bon puertu.

Nun pasó nada, que ye lo importante y deprendí muncho nesti día, en tolos sentíos, nel que Pangua y un servidor ficimos en 8 hores pela ñeve, 15 kms y superamos un desnivel acumuláu aprosimáu d'unos mil metros d'altor. Los demás, mui a mi pesar tuvieron que caleyar fácilmente unos 26 kilómetros en total, cola baxada-xubida a Riopinos y baxada de nuevu al Puertu Vegarada y d'ellí hasta les cercaníes de Redipuertas onde los recoyimos.

Espero que toos nos quedásemos coles semeyes de cume y los bonos momentos...

Despidiéndonos con bon sabor de boca Paulina y Berto... ta la prósima.


Camudando'l Camín nel Picu L'Osu

Nesti llocu día de monte ivernal dimos preste al: Picu L'Osu (2023 ms) que ye ún de los dosmiles d'Ayer.
Ver progresos en: Retos montañeros