miércoles, 28 de septiembre de 2011

Refuxu de Góriz - Circu de Gavarnía - Refuxu de Sarradets

6 de Setiembre de 2011

Track: Refuxu de Góriz - Circu de Gavarnía- Refuxu de Sarradets



Segunda nueche horrenda nel refuxu d'Ausw.., perdón de Góriz, y eso que Pangua idegó la forma de ponénos durmiendo ún pa un sen y l'otru al revés pal menos nun dános de codazos al movenos, pero nin asína, fuimos a descansar demasiáu.

Asína qu'a les 7 p'arriba y dempués del desayunu, pagar una pasta brutal por dos díes de pernocta, dos cenes, cuatru desayunos y la de mi madre de cerveces, casi con alliviu vamos dexar esti llugar, pa nun tornar enxamás si podemos.


Primeros pasos de la ruta hacia'l circu de Góriz

Los nuesos pasos, van llevanos de nuevu a la gueta de la meyor sienda, que xuba esa primer terraza enriba del refuxu y que nos empobine hacia'l camín correutu a la vía normal del Perdito, anque como vimos el día anterior pue garráse cada día una distinta.

Nel bon camín, pasaremos otra vegada, per delantre de la canal que xube a la Punta Escaleretas, y meterémonos dafechu nel llaberintu de la Ciudá de Piedra, dempués de superar, como non, dellos resaltes del circu, que tan aseguraos ensín xacíu nengún.


Aupándonos al circu de Góriz y a la ciudá de Piedra

Magar de casi hora y media de caleyar vamos abandonar al fin, la vía normal al Perdito, pa tiranos siempre n'ascensu por terraces hacia la bas del Pitón SW del Celindro Marmorés, el cual vamos viendo que tendremos qu'arrodiar al completu pa ganar el nuesu oxetivu: El Circu de Gavarnía.


Arrodiando'l Celindro Marmorés

Pero enantes, d'ascender al primer puntu cimeru del día y cota importante del circu, el Pico Plan de Marmorés, teníemos una especie de tresmil secundariu, que nunos sitios apaez nes llistes y n'otros non, La Tuqueta Marmorés de 3091 ms, y que nos díes anteriores al viaxe a Pireneus, fízome variar la ruta sol mapa, d'aportar al colláu ente'l Plan de Marmorés y el cumal más oriental d'o Salto d'Augua, la Punta deras Crepas.


Na "Tuqueta Marmorés" de 3091 ms

Con esta variante, tocónos lluchar con un tarrén de pedreros, xubiendo y baxando per ellos, y teniendo qu'ascender una especie de morrenas salientes d'un antiguu glaciar del Celindro Marmorés, travesando tamién quiciás el so restu, enantes d'aportar a esa cota de 3091 ms, que tan pocu valir montañeru tien, ya que dende la parte más alloñada del Celindro destaca pol so color blancu, pero dende lo caberu del Celindro, malpenes dixébrase del pedreru que baxa d'esti.

Aún así, cotámoslu, y sirviónos pa descubrir, dempués d'un incómodu ascensu per un pedreru hacia la cresta del Circu de Gavarnía, lo que nomámos como Tuqueta del Celindro, cota de 3199 ms, que ye un mirador ablucante sol Ibón de Marmorés y sobretóu sol Glaciar de Perdito, teniendo mil vegaes más interés montañeru que l'anterior y tando xusto embaxo del paredón del Celindro.


Pangua xubiendo a la tuqueta del Celindro y les sos bones vistes

D'esti cumal de color gris, baxaremos al cuello Marmorés (3183 ms), onde entamaremos l'ascensu per pedreru roxizu col envís de facer al fín, un cumal con nome, el Pico Plan de Marmorés, siendo dafechu planu, planu dende la nuesa posición, anque non tanto dende'l Vall de Gavarnía, jeje, ya que caltien so les sos parés, la mayor caída d'augua d'Europa.


Ascensión al pico Plan de Marmorés col Celindro detrás

Asína que, cuatru hores y cuartu dempués de salir de Góriz, que dizse prontu, tamos nos 3245 ms d'altor y no que será, la cota más alta nel día. Esti horariu, diz a les clares, que nun tuviemos un tarrén fácil nel nuesu andar hasta esti puntu, y poro, merecemos un descansín d'unos minutinos nos que xintar daqué, y esfrutar d'esti tremendu paisaxe.


Pico Plan de Marmorés y circu de Gavarnía (3245 ms)

Y ye qu'ante nós, tenemos el paredón que fai esti circu sol vall de Gavarnía, asína como tola llonxitú d'esti valle, y una visión que nun perdimos en tola nuesa andadura per Pireneus, el glaciar del Vignemale, de xuru'l más grande que queda en tol sistema, y que faínos una vegada más sacá-y delles semeyes y llámanos munchísimu a conocer nun futuru.


Vistes dende'l Plan de Marmorés (Circu, Gavarnía, Vignemale)

Per delantre, tenemos al fin, tol circu a percorrer, y tampoco queremos pararnos demasiáu, porque nun sabemos cuanto tiempu nos pue llevar, lo únicu que tenemos nidiu, ye que será un xube-baxa de cotes, pero qu'al menos tamos agora mesmu na más alta y eso ye una aída importante.

Ensín más, baxamos del Plan de Marmorés, pa meténos nun tridente de cumales, como son los Picos d'o Salto d'Augua, que col anterior, faen la paredona pola que xorrez la gran caída d'Augua de Gavarnía.


Xubiendo y baxando de la Punta deras Crepas (3160 ms)

El primeru ye l'oriental o Punta deras Crepas, que tien un tastu agreste importante, pero col puxu de la baxada del Plan, vamos algamalu nun tris, y casi ensín parar metémonos nuna baxada, eso sí curiosina, na qu'emplegámonos un pelín, pa destrepar hasta la so bas, dende los sos 3160 ms d'altor.

D'esti cumal de color amarielláu, vamos pasar al central que tien un color gris. Nun soi xeólogu y nun entiendo de roques, pero presta ver los camudamientos de collor, ente unos cumales y otros d'un mesmu circu.


Repunta deras Bruixas, Tres Serols y cumal de 3102 ms

Si un cuartu d'hora tardamos del Plan de Marmorés a la Punta deras Crepas, dalgo más de 20 minutos tardaríemos n'encaramános nos 3102 ms del Central o Repunta deras Bruixas. Esta vegada tuvimos varies fáciles trepaes per roca suelto y gris, qu'en dalgún pasu asomónos al vacíu sol glaciar del Salto d'Augua, pero ensín mayores complicaciones.


Ascensión al Occidental y los otros dos a lo lloñe ya

Coles mesmes, tocónos dexar esti cumal, y baxar a un colláu (3029 ms), qu'anímanos a bordiar pela manzorga l'entamu la cresta al picu Occidental, anque alcontrámos un canalizu qu'acorta dafechu tala vuelta, y trepámos per ella ensín problemes, pa dempués caleyar cenciellamente hasta la cota de 3092 ms del Pico d'o Salto d'Augua Occidental o Pico dera Ura.


Pangua nun "arriesgáu" segundu cumal del Pico dera Ura (3092 ms)

Otros venti minutinos tardamos d'un a otru picu, y pocu más taríemos nesti tamién, ya que vimos que teníemos xera per delantre, asína que siguimos dando zapatu y esta vegada, ensín tener nin siquiera que trepar, plantámonos no que nómase como Espalda Marmorés o Peña Portiella (3071 ms).


Lo que nos quedaba por andar más menos del circu de Gavarnía

Son les dos de la tarde y llevamos unes 5 hores y 40 min de ruta, ya inda quédanos un bon tramín paez ser, pero tenemos fame y necesitamos xintar daqué serio y descansar unos 20 minutos y esti cumal ye perfectu asína que tirámonos a ello.

Magar del descansu, vamos dir a la gueta d'una baxada que fáiganos enllazar el pasu hacia'l siguiente finxu, la Torre Faixón o Torre Marmorés. Pa ello, siguimos el track preparáu, que diba facenos baxar hasta un corte nuna paré dende la que vemos los senderos mui penbaxo nuesa hacia la Breca Roldán.


Baxada de la Portiella, de verdá se puede baxar??

Lo primeru que tengo na tiesta, ye como coño pue marcáse nos mapes una ruta asína, ensín poner dificultá y lo segundu ye... de verdá pue baxase??? Tamos viendo a les clares un destrepe per una paré de pizarra. Destrepar per pizarra rota nun yera ún de les coses que tenía pensáu facer en Pireneus, jeje.

Aún así, como vemos h.itos na paré, guardamos los palos, y metémonos nello, con más mieu que vergoña, y arrastrándonos de culu, vamos destrepando parte de la paré, hasta que ganamos un senderu d'un metru d'anchu, que va facenos percorrer la paré de drecha a esquierda nun tramu bien aéreu hasta que topámonos con otru h.itu y destrepamos de culu pela pizarra suelta.


Llargu accesu hasta la Punta Faixón

Asína taremos durante varies envueltes y destrepaes, y cuando a la fín, tamos en suelu firme y garramos un pocu resuellu alcontrámonos con un grupín de montañeros, que taben faciendo más menos lo mesmu que nós, y que nun s'atrevieron a baxar per equí, teniendo que dar una llarga vuelta de más d'una hora hasta la xubida normal al Plan de Marmorés. Menos mal, que-y echamos valor, porque sinon, vaya turra tornar hasta ellí alantrón.

Darréu, de falar con ellos, ya indicar como xubir a otros montañeros que nun taben mui decidíos tampocu (Hai que dicir que trepar yera muncho más cenciello que la baxada cola pizarra rota), vamos siguir camín, ya que tenemos per delantre'l tramu más llargu de circu ensín cota a superar.


Perguapes vistes del Vignemale y del gran salto d'augua de Gavarnía

Tramu nel que tardamos más d'hora y cuartu dende la Portiella hasta la Torre Faixón, pero que foi abondo entreteníu. La primera parte foi esa baxada aérea, la segunda fízonos travesar pedreros y neveros a partes iguales, y la última ya facíanos acabalgar penriba la cresta hacia la Torre Faixón o Torre Marmorés, teniendo unes ablucantes vistes del gran saltu d'augua y del vall de Gavarnía.


Antecume de la Punta Faixón o Torre Marmorés (3005 ms) y el Taillón y Corral Ciego dende ella

A pesar de tener esti cumal de 3005 ms una hestoria d'esguilada importante na so cara norte, pela fastera sur, xúbese andando, asína que sacante de les abundantes semeyes de Pangua del saltu d'augua, dexamos ceo la cume, y metémonos nuna baxada per una canal que los mapes marquen como PD (pocu difícil) y nomen corredor Oeste.


La Punta Corral Ciego y canal de baxada del Faixón

Y asína foi, ya que tuviemos un pequeñu destrepe inicial per roca bona, y llueu ya garramos esi pedreru-canal qu'ensín mayores esfuerzos dexábanos na sienda que traviesa'l pedreru xigante que ye esta fastera del Circu de Gavarnía.

Con tranquilidá, vamos siguir alantre hasta'l cruce nel que bordiaríes la Punta Corral Ciego o Casco Marmorés, o nel qu'anicies l'ascensión a esti. La verdá ye que llevábemos un bon ratu del día, acolumbrando a lo lloñe como sería esta ascensión ya que paecía un picu dalgo complexu, pero de cerquino ya vemos nidiu que nun yera pa tanto.


Vall de Gavarnía

Con ello, vamos tomalo sele, y entamamos l'ascensu per un pedreru de roca blanca que va pegáu a la caída de la paré del Casco, y pocu a pocu diremos perdiéndonos entre trepaes pela roca blanca y pedreru, p'ascender hasta un puntu, nel que tamos embaxo del resalte superior a cume.

Equí, tendremos un pocu que trepar per esa roca blanca, y taremos ya na parte cimera del picu, que paez la coronilla d'un flaire, dando preste a los sos 3007 ms. Enriba'l cumal alcontrámonos una escoba, lo cual sorpréndenos ya que nun vimos nin un buzón de cumes, en nengún de tolos tresmiles que llevábemos hasta güei, lo cual presta enforma, asína que fízose raru... mínimu una semeya con ella.


Gran Cascade en francés y nel cumal de la Punta Corral Ciego (3007 ms)

Al fin, agora sí, finamos tolos tresmiles que teníemos en cartera pa la ruta, y son les 16:40 h, poro llevamos un total de 8 hores y 20 minutinos, colo que'l cansanciu ye más que xustificáu. Siguimos con un día espléndidu de monte, pero ya vamos teniendo ganes de finalizar y sobretóu de conocer esi refuxu que llevámos viendo dende'l Plan de Marmorés, escolingáu na falda del circu.

Pero nun too diba ser bon facer montañeru y caleyar gayoleru al traviés de tresmiles, jeje. Vamos meténos darréu, na mítica entamada de Xuan de la Borrina, por siguir ensín información les víes que marquen nos mapes y ye qu'otra vegada pónenos una tal Vía de la Chimenea con un "PD", al igual que na baxada de la Torre Faixón.


Baxada pola Vía de la Chimenea

Asína que metémonos a ello, y garramos a la mandrecha una canal de piedra suelto, xusto cuando la paré del picu córtase hacia'l cuellu de los Sarrios y entamamos la baxada con curiáu ya que resbaria abondo, anque como muncho una culada pue ser lo más peligrosu.

Cuando tamos abaxo del too de la canal, dempués de llibrar dalgún resaltucu qu'otru, tenemos que facer una travesía per una terraza xigante, que va penriba de la sienda normal a la Breca Roldán, ye dicir a más de 100 ms d'altor de caída vertical, averándonos a la propia Brecha.

Hasta equí tou perfeutu, a nun ser que cuando llegamos al puntu nel que se supón que tendremos que destrepar pa tar nel suelu, topámonos con un rapel montáu, col mal rollu que supón siempre estes coses, ya que dizte que la destrepada nun va ser cenciella.


Semeyes de la fallida vía de la Chimenea pa baxar

Diez minutos buscando per onde coño ta'l destrepe y el "Pocu Difícil" que nun apaez per nengún llau. Tan solo vemos un balconéu vertical y muncho más peligrosu que'l de la baxada de la Espalda, y nun solo eso, sinon qu'agüeyamos baxada a un balcón pero nun vemos continuidá.

Y agora que coño facemos??? Metímonos una baxada per una canal pestosa a más non poder y agora tenemos que dar la vuelta??? Pues sí, nun mos quedó otra, ya que tan solo baxar al primer balcón ye xugásela con una mochila de 60 litros enllena y cualquier fallu nel destrepe ye igual a palmatore.

Y ye que solemos ser atrevíos, pero esto superábanos dafechu, poro a pesar del cansanciu decidimos tornar so los nuesos pasos y meténos una soba pela travesía na terraza y una mayor inda pela canal, que déxanos casi otra vegada nel cumal del Corral Ciego, y coles fuercies mui xustes ya.


Paso de los sarrios col Brecha de Rolando y parte clave de la Chimenea dende baxo

La broma de la vía de la Chimenea??? Pues una hora más de ruta perdía dafechu y posible llegada tarde pa la cena nel refu, poro baxada en llama hasta'l crucie que venía del Faixón, y sienda palantre arrodiando pembaxo la paré del Corral Ciego.

Son les 6 y 20 de la tarde cuando pasamos pol míticu pasu de los Sarrios, y vamos pelín xustos de fuercies ya que tola rodiada a les parés del nuesu últimu cumal, ta siendo un quebrapates, con xubies y baxaes per sienda de piedra suelto y ésta ta faciendo mella en nós.

Vamos pasar al fin, el pasu de los Sarrios y una vegada más, podemos agüeyar unos pasos más que sobreaseguraos con cadenes, ya que nun tien mayor dificultá y amás otra vegada hai una sienda muncho más segura unos metros más abaxo. Les contradicciones en Pireneus son costantes ya qu'alcuéntreste con seguros innecesarios y llueu en mapes márquente víes cotaes en pocu difícil que llueu a posteriori (erru míu por non interesame más) tienen destrepes hasta per una cueva, pasu definitivu de la nomada vía de la Chimenea.


Breca de Roldán y refuxu de Sarradets

Escaeciendo too esto, aportamos a la mítica Breca de Roldán nun esfuerzu final hasta los sos 2800 ms, ya importándonos res la hestoria del tal Roldán, tiramos pol fesoriazu que-y dió a la roca y baxamos pel ñeveru-glaciar casi corriendo, con dalgún resbaríu qu'otru, p'arribar reventaos a les 7 menos unos minutos al prestosu refuxu de Sarradets.

Como había otru turnu más, nun mos quedamos ensín cenar, y tuviemos una horina, pa descansar, tomar una cervecina Babaria holandesa, muncho meyor que la mierda de la Estrella Damm de Góriz y pudimos tamién camentar tol esfuerzu, tola ruta y toles víes utilizaes d'ascensu y descensu nes 10 hores y media de ruta que necesitamos pa facer los 15,6 kms percorríos nos que superamos un desnivel acumuláu de 1600 ms y 9 cotes de más de 3000 metros.

Tamién pudimos alcontrános con un refuxu muncho más curiosu que'l de Góriz y qu'entre les lliteres más amplies y qu'había menos xente, fuímonos al sacu durmir con una sensación de poder descansar pal siguiente día, pero eso ye otra hestoria...


Camudando'l Camín nel refuxu de Sarradets

Nesta ruta ficimos 9 tresmiles de Pireneus: Tuqueta Marmorés (3091 ms), Tuqueta del Celindro (3187 ms), Pico Plan de Marmorés (3245 ms), Punta deras Crepas (3160 ms), Repunta dera Bruixas (3102), Pico dera Ura (3092 ms), Peña Portiella (3071 ms), Torre Faixón (3005 ms) y Punta Corral Ciego (3007 ms)Ver progresos en: Retos montañeros

miércoles, 21 de septiembre de 2011

Refuxu de Góriz - Mont Perdito - Celindro Marmorés

5 de Setiembre de 2011

Track: Refuxu de Góriz - Mont Perdito - Celindro Marmorés



Son les 8 menos dalgo de la mañana, cuando tamos a puntu de partir na que sería la primer ruta seria de montaña. Per delantre tenemos el míticu Mont Perdito y el Celindro Marmorés. Pa ello, nun tenemos en mente, facer la ruta normal al Perdito, sinon que preferímos xubir per una vía, menos masificada y que diba aportanos otru tresmil de camín al cumal, Las Escaleretas.

La nueche, foi más menos lo esperáu, un colchón nel que casi nun entres, da pa lo que da... molestar a los d'al llau a cada movimientu y hasta molestáse a ún mesmu, por nun ser a durmir. Aún así, fuimos a descansar dalgo ya que los tapones recién mercaos en farmacia foron canela fina y nun oyí los ronquíos xabaces de dalgún ñu pirenáicu.


Preparaos, llistos,... YA!!

Como'l desayunu foi abondo más agradable que la nueche, garramos puxu, y salimos en llama siguiendo'l track del gps que teníemos, pero tamién albidrando'l camín entre los milenta senderos que parten de Góriz. Hai que dicir que los primeros venti minutinos de caleyar, son pelín caóticos, por mor d'esti xaréu de senderos que superen un resalte del tarrén aupándose a una terraza superior onde s'axunten so los 2371 ms d'altor. Un exemplu claru, ye que xubimos per un senderu, baxamos per otru y el track diba per otru distintu... jeje.

Aún así, nun ye mayor problema, y cuando vemos que tamos bien empobinaos, compartimos durante un ratín camín, con dellos montañeros que diben al Perdito, pero pola vía normal, ya que nós, a un altor de 2500 ms, vamos alcontrar a la nuesa mandrecha una canal-pedreru, que con un esfuerzu curiosu, déxanos enriba d'un hombru onde paez qu'entamen les fostilidaes cola Vía de las Escaleretas.


Canal de xubida al primer hombru de la punta Escaleretas

Ensín más, tenemos que salir d'esti hombru con una trepada hacia la esquierda, y d'ella tendremos un tramu pergrande de pedreru que siguiendo los h.itos dirán llevándonos a una especie de colláu dende'l que tenemos a la mandrecha una bona vista del Ibón d'Arrablo y enriba d'esti'l Pico Anyisclo, que forma con el Perdito y Celindro, les Tres Serols.


A la gueta de l'arista noroeste de la Punta Escaleretas y Mont Perdito enriba

Nós pasamos de leyendes, y tenemos enfrente nuesa otru resalte, otra "escalereta", que tenemos que superar. Nesti casu, ye'l nuesu primer tresmil d'esti añu, y tirámonos a superalo pola manzorga aupándonos a l'arista que vien del noroeste, teniendo un pequeñu trepe y un final bien aéreu so la Ciudá de Piedra (ruta normal al Perdito), pa llueu facer un relaxáu paséu hasta'l cumal de 3021 ms de la Punta Escaleretas.


Na Punta Escaleretas (3021 ms) col Celindro Marmorés detrás

Una horina y 50 minutos llevamos lluchando escontra la roca suelta, cuando tenemos per delantre tan solo 300 ms de desnivel hasta'l gran oxetivu del día, Mont Perdito. Ta siendo, una ruta perentretenía, pero'l sol a pesar de rellumar faciéndonos poner les gafes, nun calece res, y un vientu que traspasa, ta faciéndonos pasar fríu abondo.

Desdexando esto, siguimos alantre, y ya vemos les dos caberes escaleres, que nos queden por superar y como podéis ver nes semeyes, tienen una pinta prestosísima dende baxo, y mui guapes de trepar cuando tas metíu nos canalizos polos que-y damos preste.



Los dos resaltes coles sos trepaes na vía de las Escaleretas al Perdito

La verdá ye que tanto la primer escalera como la segunda, nun tien mayor dificultá que buscar los bonos agarres qu'hai y dir xubiendo con confianza poquín a pocu, anque la frialdá de la roca nes manes, faise un pelín repunante nel intre. Y ye que vemos nestos canalizos dalgún filu de xelu que dende cuantayá tará presente, ya que la so disposición ye de solombra continua.


Pedreru final al Perdito col Vall d'Ordesa al fondu

Magar de superar estos resaltes y a una cota de más de 3200 ms, tan solo tendremos per delantre un paséin de unos 150 ms d'altor, enmediu d'un pedreru xigante y qu'ensín dificultá pondrános na cota de 3343 ms del Mont Perdito n'aragonés, Monte Perdido en castellán y Mont Perdu en francés, pero pal casu pataques.


Glaciar del Vignemale, Ibón de Marmorés y glaciar del Perdito

Ye Perdíu n'asturianu, porque paez ser que dende Francia nun hai res que lu acolumbre, debíu a les cotes de más de 3200 ms que tien delantre nel circu de Gavarnía. A nós, por mui perdíu que tuviese, fuimos a alcontralu y nun solo nós, ya qu'había más xente na cume que na cai Corrida de Xixón, jeje.

Pues na, fechu y lo bien fechu bien paez. Tardamos casi tres hores en dar preste a esti masificáu cumal, pero ficísmoslo de la mayor forma posible, solos. Nun hai pallabres pa definir, como pues tar más contentu pol percorríu qu'escoyiste que pola propia cume.


Nel cumal del míticu Mont Perdito (3343 ms)

Pueu dicir, que solo col ascensu pela vía de las Escaleretas, podíamos algamar esti monte como bien merez y con ello esfrutamos d'una soledá ficticia, pero d'una soledá merecía por nun dir como'l rebañu oveyes que sigue al pastor, nesti casu un camín más que trilláu.

Esa soledá, sacante delles pallabres con otros montañeros, fuimos a alcontrala tamién al meténos nun vivac, onde pasamos unos 45 minutos, nos qu'alternamos el sacar semeyes en toles direiciones col xintar daqué pa recuperános del esfuerzu.


Baxada del Perdito hacia'l Celindro y Mont Perdito cola nomada "escupidera"

Nin siquiera nel vivac, quitámonos esa sensación de friu, y decidimos siguir col siguiente oxetivu del día, el Celindro Marmorés, al cual llevábemos acolumbrando hacia'l norte en casi tola nuesa ruta al Perdito. Pa ello, garramos el camín davezu de xubida al Perdito, y baxamos per una canal que nun ye más qu'un pedreru xigante, pel que retuércense d'esfuerzu decenes de montañeros no qu'antóxasenos una xubida fea y dura nel branu.

La primer parte más tendía, va baxándose n'envueltes, demientres echámos-y un vistazu a la mandrecha al Dido del Perdito, pal que paez ser que fai falta esguilar, poro quedará pa otra visita a esti macizu de Les Tres Serols. Llueu garraremos la nomada "escupidera", que nun ye otra cosa qu'una arista non demasiáu afilada, pero que suponemos que n'iviernu y con xelu, pue requerir un bon manexu de crampones y piolé, porque sinon nun se desplica tantes muertes nesti pasu.


El Ibón Cheláu na ascensión al hombru del Celindro Marmorés

Otra cosa, ye qu'en 30 años 60 muertes, será tamién pola cantidá de xente que lu intenta ensín tar preparaos. Dexando esto de llau, baxamos como digo casi corriendo, hasta'l guapu Ibón Cheláu, onde hai delles persones tomando'l sol al abrigu del vientu. Vientu, qu'en parte de la baxada fízonos poner tola ropa que llevábemos na mochila, porque xelaba dafechu.

4 hores y media, faínos tar a puntu d'entamar la xubida al Celindro Marmorés, y dende l'ibón, vemos que ye un pedreru, que va asomase a un hombru, entre'l Pitón SW del Celindro y l'aniciu d'una llarga arista hasta'l Celindro.



Trepada d'ascesnu al Celindro y pedreru hacia'l cumal

Metémonos nello, y non sin esfuerzu y sudor (meyor que friu), aportamos a esi hombru, onde con mediu minutu de trepada, xubimos al Pitón SW (3179 ms), tachando otru tresmil, y baxamos pa dexar les mochiles nel hombru, col envís de facer una trepada d'aniciu, que va déxanos n'arista del Celindro.

Enantes taremos un ratín falando con dos montañeros, a los que vemos rapelar d'esa trepada y qu'indíquenmos que sinun se ta de trepar que pue tener dificultá. La verdá ye que velos rapelar dexónos pelín intranquilos, pero nun teníemos referencies de tala dificultá, pa xubir o baxar tal canalizu.


Nel Celindro Marmorés (3316 ms)

Así que despedímonos d'ellos, que ya baxaben, y tirámonos p'arriba con un primer trepe más durín, pero'l restu del canalizu, y posterior cresta, nun tien absolútamente nenguna dificultá, sacante un pasín aéreu na metá del crestéu, que pue xubise más pol centru ensín tiráse al aire.

Nel intre de facer cumal, ta cubriéndonos les ñubes baxeres, y nun vemos res, poro nun mos matamos coles semeyes y dexamos los 3316 ms, dempués d'un abrazucu, y de dános cuenta de que ye la una y cuartu, y vamos teniendo dalgo de fame, asína como un dolorín de tiesta por mor de l'altor.


Pasín aéreu de descensu y canalizu final de destrepe

Decidimos baxar, y facemos tola cresta de nuevu alcontrándonos con dos montañeros checos que tamién xuben ensín material, y nel pasu aéreu del mediu, Pangua tírase pol centru, y yo si que destrepo pela parte con ambiente, dando la posibilidá de sacar una semeya so la fastera de Marmorés a lo baxo.

Con pocu más, allugámonos de nuevu, delantre del destrepe del canalizu, y facémoslo de culu hasta que tenemos unos 5 metros sobre'l suelu, nos que tenemos que dános la vuelta, pa guetar agarres, que los hai y bonos, baxando a les mochiles, onde meterémonos el bocata, que dempués de 6 hores de ruta, ye merecíu.


Dalgún pasín "aseguráu" na baxada a Góriz

Dempués del picotéu, tiramos canal abaxo de nuevu hasta'l Ibón Cheláu, y ellí emponinarémonos al traviés de varios senderos h.itaos, que nos van facer escalón tres escalón, superar dellos resaltes del circu de Góriz, dalgunos aseguraos como non, hasta aportar a la Ciudá de Piedra, onde'l caos de h.itos ye mayor si cabe.

La Ciudá de Piedra, ye una esplanada onde hai peñes de grandísimu tamañu, cayíes dende'l Perdito, y per onde paez cenciellu, tomar un camín distintu cada vegada que se pase ya que ye un auténticu llaberintu.

D'equí palantre, garraremos un senderu que nos fadrá pasar per delantre de la canal onde 7 hores y cuartu antes, entamábamos l'ascensión a la Punta Escaleretas y d'ehí al Perdito, y que nesti casu diba decinos que ya nun tábemos mui lloñe del refuxu, anque finalmente costónos trabayu alcontrar, ya que tirámonos pola sienda que más vuelta tenía hacia'l refuxu.

Como nun hai mal que por bien nun venga, alcontrámos nesi camín una piscinuca natural onde poder llavános y refrescános d'esta ruta na que dimos preste a 4 tresmiles, en 7 hores y 50 minutos, percorriendo 11,5 kms y superando un desnivel acumuláu de 1615 ms.

Namái, quedábanos pasar el restu la tarde tiraos nel refuxu y esperar con unes cervecines a que tocáse la hora de la cena y dempués la hora del enfacinamientu en llitera hasta'l prósimu día montañeru...


Camudando'l Camín nel refuxu de Góriz

Nesta ruta ficimos 4 tresmiles de Pireneus: Punta Escaleretas (3021 ms), Mont Perdito (3343 ms), Pitón SW del Celindro (3179 ms) y Celindro Marmorés (3316 ms)Ver progresos en: Retos montañeros