martes, 29 de junio de 2010

Val.le (Somiedu) - Muria Brava - Pena Orniz - Cuetalbo

20 de Xunu de 2010

Track: Val.le (Somiedu) - Muria Brava - Pena Orniz - Cuetalbo



Un añu más, paez mentira, finamos la temporada montañera "oficial", tornando a Somiedu, si ye casualidá o non, nun lo se, pero como siempre, prestar, presta. Esta vegada les intenciones iniciales yeran dar preste a la Pena Orniz, mayor cota de conceyu de Somiedu, pero al final tovimos una ruta dura, llarga y mui prestosa.

Como ye vezu cuando vamos por Somiedu, partimos del barriu de L'Outeiru pelín más arriba del pueblu del Val.le. Esta vegada'l sitiu de xuntanza y almuerzu sería na Pola, capital de Somiedu, onde nos xuntamos Simón, Carlos y yo, con Pangua, que venía direutamente. Pa llegar la Pola dende Xixón, garramos autovía en direición l'ocidente astur, hasta Pravia, onde tomaremos la As-16 hasta Cornellana y ehí, ya la As-15 y As-227 hasta Balmonte Miranda, pa siguir pela mesma carretera hasta Auguasmestas onde éntrase al fin nel conceyu de Somiedu, pa pasar polos pueblos de Xadriz, La Riera, Recueva, Castru y al fin a la capital, onde nuna carretera ascendente arríbase al Val.le.


Partiendo del barriu de L'Outeiro nel Val.le

Como dixe enantes, partimos d'un pelín más arriba del Val.le nel barriu de L'Outeiro onde hai un aparcamientu bien grande, anque si nun se molesta y hai sitiu, pue dexáse pelín más arriba nel cruce de Las Duernas, eso si, hai que ser curiosu dexando'l coche qu'hai tránsitu ganaderu y lo primeru ye lo primeru.

La ruta hasta'l L.lagu nun la voi comentar ya que fízelu l'añu pasáu na ruta a los Albos: Val.le (Somiedu) - L.lagu del Val.le - Picos Albos - L.lagos de Saliencia. Prefiero comentar l'atuendu que nos traxo Simón, que nun debió d'alcontrar un pantalón más llargu en tol decathlon y dexónos una semeya pa l'alcordanza. Tenía que dicilu, porque tuvimos riéndonos un bon ratu en tola ruta, jeje.


Simón "Livingstone" y sus pantalonzucos y el murallón d'Orniz

En tol camín al L.lagu fuimos viendo'l nuesu oxetivu frente a nós, viéndolo bien lloñe, pero güei tenía que cayer, asína que fuimos dando zapatu, p'arribar en hora y pocu a la oriella mesma del l.lagu. Ellí xintamos dalguna barrina cereales y empobinámonos al traviés d'un senderu que va xubiendo pela falda de los Albos hacia lo que nómase como Las Duernas, poniéndonos ensín dificulta a unos 1770 ms. Ellí ya acolumbrábemos, tol paisaxe de Las Morteras, el cuál axunta vegues verdes nesta dómina, con continues llombes y h.oos dando una forma de paisaxe llunar ablucante. Perdese equí ye mui fácil, así qu'hai que tener bien nidiu a onde nos diriximos.


L.lagu'l Val.le y Pena Orniz dende La Mortera'l Val.le


Vega bien prestosa y robezos na Mortera

Dempués d'alcontranos con dellos robezos, dalgo esmolecíos pola nuesa presencia, siguimos camín en direición al primer dosmil del día. Esta ye una llomba de pocu valor montañeru, pero que venía bien nel averamientu a la paré d'Orniz. El picu'l Val.le Calabazosa de (2010 ms), diba ponenos na posición perfeuta pa decidir cual diba ser el siguiente pasu: Si averanos al colláu de la Cuerria pa entamar el crestéu de la Muria Brava o tirar direutamente a la Vegadona, colláu que nos sirviría pa xubir a Torre Orniz y Pena Orniz.


Xubiendo al Picu'l Val.le Calabazosa
(2010 ms) y Los Albos dende esti


La decisión dependía de les fuercies de la xente ya que la ruta podría tornase mui llarga, pero mis poderes de convencer y meter en xareos a la xente sorpréndenme enforma, jeje. Asína que, tiramos a pola cresta de la Muria Brava, qu'entamaba cola primera ascensión al Cuetu Crespu.


Cuetu Crespu y la Muria Brava


Bien ceo averámonos al colláu de la Cuerria, pero ensín llegar al mesmu, entamamos a trepar direutamente al Cuetu Crespu, ensín mayor dificultá a pesar de tener dalgunes parés bien guapes, como a la que me pegué yo, pa sacar una semeya y dime una hostia como un campanu, ya que desprendióse l'agarre de la mandrecha y cayí a plomu hasta una terracina. Nun foi amás, l'asuntu pero'l sustu y la raspada col brazu drechu a la grieta nun me la quitó naide. Esto fízome tar sollerte de que la roca nun yera de bona calidá, poro anduve más precavíu de lo normal tanto nes mios aciones como no que taben faciendo los mios collacios.


Trepando al Cuetu Crespu (2044 ms) y enriba d'él cola Muria Brava detrás

Sacante d'esto, los demás xubieron ensín mayor dificulta per una grieta más fácil, y alcontrámonos enriba nos 2044 ms onde quedamos ablucaos colo "bravo" de la Muria Brava y so cresta compuesta por una paré vertical e inclusu de pendiente negativa en delles zones, que facíame duldar sobro la conveniencia de la decisión tomada facía media hora nel picu'l Val.le Calabazosa.

D'otramiente, si dalgo llevamos deprendíu nestos años, ye a qu'hasta que nun te metes nel propiu terrén o roca nun sabes que salides vas dir alcontrando a cada pasu. Poro, encomencipiamos a trallar pela roca, al traviés d'una cresta mui llarga y na qu'había que dir tomando decisiones poquín a pocu, con dalgún pasu espuestu y mui aéreu, nel qu'había qu'andar con muncho curiáu.


Hacia la Muria Brava y pasu h.odíu na so crestería

En tres hores tábemos nel Cuetu Crespu dende que saliéramos de L'Outeiru, y media hora más poníamos nel cumal de la Muria Brava a 2123 ms, que fae d'elli la cuarta cota de Somiedu. Equí ya víamos más cerquina'l nuesu oxetivu cimeru, Torre Orniz y dempués la Pena Orniz.


Nel cumal de Muria Brava (2123 ms) agüeyando La Muela, Torre Orniz y Pena Orniz


Baxamos d'esta pequeña cume, onde nun teníemos sitiu nin pa facer una semeya conxunta y enantes d'agüeyar la Torre Orniz dende'l colláu de la Verderona, alcontrámonos con un dosmil bien prestosu de facer, La Muela.

El nome-y vien que nin pintáu, ya que ye un rocón de parés llises, pero guetando un pocu vimos per onde xubir y trepamos toos menos Carlos que ya taba pelín cansáu. Les semeyes del cumal y la posterior destrepada son bien guapes dende baxo.


Na Muela (2120 ms) y destrepando d'ella


Agora ya sí, dende la Verderona tirábemos bien decidios a por Torre Orniz, pero metímonos nun mal camín y tuvimos que dar la vuelta, baxando pegaos pola so manzorga, y faciendo una travesía que nos dexase na metá ente la pena y la torre. Ellí ya, col l.lagu Congosto debaxo nuesa, entamamos a xubir con cierta distancia ya que Simón y Pangua diben por delantre y Carlos y yo, quedámonos un pelín per detrás, cosa que resultó permal, ya que con dellos metros por enriba nuesa, una llábana de espeutaculares dimensiones desprendióse de los pies de Pangua, y baxó esnalando hacia nós.

Nun foi un momentu mui agradable, nin muncho menos, ya llevábemos con esa pallabra de "piedra", tol día, p'avisar que cayía dalgo, pero siempre piedres pequeñes, que sí, que te pueden dar na tiesta y h.odete finamente, pero esto nun yera una piedrina que garró velocidá, yera una peñona d'una tonelada lo menos, que bien nos pudo aplastar. Yo tireme pa la esquierda a toa velocidá y llibreme polos pelos, porque cuando venía hacia mía lo facía nel aire, dempués d'un viaxe escontra otra roca que la partió en dos que se dirixieron hacia Carlos. Tovía nun se como fizo pa que-y pasáse una per ca llau, y que nun-y rozaren siquiera. Con dos güevos Charly.


Simón deleitándonos col pantalonín, jeje na xubida al cumal de Torre Orniz
(2181 ms)


Torre Orniz (2181 ms), camiento que será alcordada durante munches de les rutes postreres. Ehí tornamos a ñacer, y por ello, pelín blancos inda, ficimos semeya de rigor y tiramos el cortu crestéo a la Pena Orniz, onde descansamos, xintamos y nos relaxamos tolo posible. Esta pena de 2195 ms ye la mayor cota de tou Somiedu y les sos vistes bien pagan la pena, anque la so collacia, Torre Orniz, diéranos el mayor sustu de la nuesa vida.


En Pena Orniz (2195 ms) sanos y salvos cola ablucante Mortera debaxo

Dempués de 5 hores de ruta, fartucos de caleyar y de xintar decidimos tirar tovía hasta'l Cuetalbo, ya que nun tenía nenguna dificultá, y diba servinos pa garrar bon camín de vuelta'l coche. Así que baxamos de la Pena, y al llegar al colláu Orniz, xubimos a un piquín de 2049 ms qu'hai nel propiu colláu pa llueu crestiar, ensín dificultá hasta'l Cuetalbo demientres acolumbrábemos debaxo nuesa les fuentes del Sil.


Nel Picu'l Colláu Orniz (2049 ms) col Cuetalbo al fondu


La Pena Orniz
y Charly(gracies por toles semeyes) dende'l Cuetalbo (2074 ms)

Cansaos pero gayoleros, facíamos les 6 hores de ruta magar d'esti picu de 2074 ms, nomáu Cuetalbo, y ya "solo" quedábamos baxar y baxar. Esta vegada, la baxada sería bien guapa ya que teníemos que pasar por una braña típica vaqueira como yera Murias L.longas, pero enantes dexábamos a la nuesa mandrecha, pa otra ruta los Picos de la Mortera, ya que nun lo dábamos nin de coña. Pa otra quedarán, casi de xuru, qu'acompangaos de Pena L.lana.


Dexando de llau los Picos de la Mortera (pa otra serán)

El pasu pola Braña de Murias L.longas (non mui bien conservada), dionos una sorpresina más, al agüeyar dellos robezos pastiando selemente xunto a vaques. Una semeya bien curiosa que nos ufrez esti increible conceyu de Somiedu.


Robezos y .... na braña de Murias L.longas casi la mesma axilidá, jeje

La parte final de la ruta, faese al traviés de lo que se conoz como la ruta a la sombra hacia'l L.lagu, así que nun hai perda y siempre anque fáigase pesada y llarga, val pa comentar prósimes rutes, dicir lo cansaos que tamos, y riínos, agora sí, de la "piedra Orniz" que mos pudo aguar la ruta, siendo positivos.


Que lloñe queda Muria Brava y Pena Orniz ya
dende esti teitu del Veneiru

Bono, como dixe al entamu de la ruta, esta foi la cabera ruta "oficial" del GM Xuan de la Borrina, asína que los "borrinos" despedímonos hasta setiembre con una nueva temporada montañera, anque ficímoslo a lo grande con 8 h y media de ruta, 22 kms y 1520 ms de desnivel acumuláu.

Poco más que dicir, qu'esta foi otra gran temporada, y que'l nuesu nivel de montañeros va ganando puxu y calidá poquín a pocu, algamando desniveles perimportantes y rutes llargues y en dalgún casu dificultoses.

Agora namái quédanos plasmar esi nivel na nuesa I travesera integral de Picos, que fadremos en breve nos prósimos díes, pero esa ye otra hestoria. Saludos a toos y toes.


Camudando'l Camín dende Somiedu


Nesta ruta ficimos 8 dosmiles de Somiedu: Pena Orniz (2195 ms) como primer cota de Somiedu, Torre Orniz (2181 ms) como tercer cota y la Muria Brava (2123 ms) como cuarta, asína como La Muela (2120 ms), Cuetalbo (2074 ms), Picu'l Colláu Orniz (2049 ms), Cuetu Crespu (2044 ms) y el Picu'l Val.le Calabazosa (2010 ms)

Ver progresos en: Retos montañeros

viernes, 11 de junio de 2010

L'Angliru (Riosa) - Cordal de L'Aramo

30 de Mayu de 2010

Track: L'Angliru (Riosa) - Cordal de L'Aramo




Camiento que ya perdí la cuenta de les vegaes que tuve nel Aramo, unes cuantes yendo de monte y otres yendo con mio pa a la gueta de setes, anque siempre al final acabo xubiendo dalgún picu per ellí.

El primer intentu, foi cuantayá, e intentábemos xubir a La Gamonal dende la curvona Cobayos, pero yeremos inespertos (tampoco ye que seamos la hostia agora), y acabamos nel colláu de Brañacé, ente L'Aramu y la Mostayal. Ellí vimos un cartelu que ponía Gamonal, y aún tuvimos los coyones de perdenos y dar tola vuelta a L'Aramo y casi finar en Bermiego. Nun foi un bon aniciu, jeje. Vaya soba caleyar nos metimos Simón, Raúl y yo.

La siguiente ya dibemos intentar esta ruta: La integral de L'Aramo, y quedámonos Raúl y yo, en 3 de los 5 picos, pero cola sensación de qu'arrodiar nun mos valió pa facer menos esfuerzu ya que metímonos nun tarrén pelín complicáu ente Covarriondes y el Cantu les Bizarreres y ficimos más de 7 hores de ruta.

Pero esta vegada sí, queríemos facer los 5 picos más altos y conocíemos L'Aramo. Asína que la Gamonal, Moncuevu, Gamoniteiru, Les Xistres y Barriscal diben caer sí o sí, a pesar de les 7 hores y media qu'anunciaben en dalgunes páxines.

Como siempre, partimos de Xixón pola autovía (si se pue nomar así) "Y" y arrodiamos Uviéu en direición Llión, hasta garrar la salida de Soto Ribera. Ellí travesamos esti pequeñu conceyu (La Ribera) pa entrar en Morcin onde pasaremos pel pueblu de La Partayera enantes de garrar direición Riosa, pasando por Les Maces, Llugar de Baxo, Llugar de Riba y a la fin llegaremos a La Vega.

Equí quedé col collaciu Pangua, pa xubir a L'Angliru, onde entamaría la ruta. Dempués d'un café y la xubida en coche, dexamos al mio pa, en su gueta particular de setes pela zona. Dicir qu'hai que tener paciencia pa ello, ya que vino a sabiendes de les 7 hores y picu de la nuesa ruta. Supongo que tuvo entreteníu igualmente, anque a la fin nun alcontró nin pa una tortiella, jeje.

Ensín más, salimos del aparcamientu de L'Angliru, pente la borrina, y a sabiendes d'onde ta'l nuesu primer picu, tiramos nesa direición, ensín mirar muncho pal gps, hasta que dámonos cuenta de que desviámonos un pelín a la mandrecha. Na, que nun s'arregle igüando la direición y entamamos a xubir a la Gamonal, la cual damos preste en media hora, faciendo les semeyes de rigor.



La Gamonal y la so cima (1714 ms)

Nun esperamos muncho más, ya que nun vemos casi na, asína que ponémonos a baxar de los 1714 ms de la mayor cota de Morcín, empobinándonos al valle siniestru, demientres el día va abriendo puquiñín a puquiñín. N'otru ratín a bon pasu, atopámonos na fonte Barrera, onde nos marca l'aniciu de la siguiente ascensión, quiciás la más guapa de toes pol canalín final que tien el Moncuevu.


100 % Pangua na cima'l Moncuevu (1724 ms)

Na cume del Moncuevu (1724 ms) picamos dalgo pa recuperar fuercies a pesar de llevar tan solo poco más de 1 hora y media de ruta. Les vistes ya son bien guapes, cola Gamonal que dexamos atrás, y vemos al fondu parte del Macizu d'Ubina, col grupu de Siegalabá-Tapinón, el cual siempre confundimos col grupu d'Ubina-Fontán, cuando vamos nel coche pola AS-II. Agora dámonos cuenta de que nun ye así. Tamién amuésase impresionante la Pena Ruea, en mediu d'ambos grupos.


L'Aramo col Macizu d'Ubina al fondu

Magar de la baxada del Moncuevu na que nos equivocamos un par de vegaes, tenemos por delantre'l mayor averamientu al siguiente picu, el cual será'l Gamoniteiru, feu con ganes, por mor de la cantidá d'antenes de telefonía y televisión qu'alberga nel so cumal. Facémoslo así, pa dexar un picu más averáu al final de la ruta como ye'l Barriscal y facela circular hasta L'Angliru.

Asína pues, pasamos al llau de la Braña de Vallongo y tomamos la fastera ocidental del Barriscal, como camín a siguir, xubiendo d'altor pero poquín a pocu, dende Teicieyu hasta'l cumal de La Teya, onde ya veremos el Gamoniteiru con tol percal que tien enriba.


Gamoniteiru (1776 ms posibles, imposible sus 1791 ms pol cercáu)

Los nuesos pasos nos llevarán a baxar pola Florida hasta La Cruz del Fresnu, onde xubiremos a degüeyu pela falda'l picu, hasta alcontranos con un camín primeru, y dempués una carretera que nos dexará nel cumal "posible" del Gamoniteiru a 1776 ms, ensín poder tocar el vértice xeodésicu a 1791 ms ya qu'hai un cercáu que lu impide.

Nun pasamos muncho na cume, falando de lo feu del picu, y tiramos pal techu de Riosa, el cual ganamos en 20 minutos tan solu dende'l Gamoniteiru, dempués de pasar por cerca del pozu suciu del edificiu. Muncho curiáu, que nun pue dar más ascu esta zona, val más baxar un pelín más d'altor y pasar lloñe de la gochada y del golor insoportable. Ascu en xeneral, el Gamoniteiru.


Nel Picu Les Xistres (1766 ms)

Les Xistres (1766 ms), picu de varios cumales, nos que se pue xintar con tranquilidá, y reposar les pates de dempués de 4 hores d'andar ensín parar. Ponémonos a ello, ensín parar de falar. Ye increible, la cantidá de coses que puen falar dos persones soles y nun aburrise en nengún momentu. La verdá ye que la montaña compartida con dos o con quince ye un llugar onde tratar bien de temes.

Darréu de la xinta, yeremos conscientes de que'l cansanciu acumuláu diba pasanos factura de xuru, pero tamién saber que nun vimos más qu'una seta en tol camín, nun yera una bona señal pal mio pa. Asína que podía tar más qu'aburríu, y tiramos rápidu a facer el caberu finxu del día.

Pa ello, baxamos al Xugu la Bola, y d'esta braña vamos ganando altor pocu a pocu al traviés d'una zona de h.oos nomada la Xinestal. Ya vemos el final cerca, poro siguimos xubiendo y llibramos la Peña Robles la cual dexamos a la mandrecha (si llego a dame cuenta que yera cota de Riosa, nun la dexo, quedará pa otru día seteru) pa da-y preste al Barriscal de 1721 ms en 5 hores y cuartu.


Nel Barriscal (1721 ms)

El cumal nun ye demasiáu prestosu, pero les vistes en toles direiciones si que ta bien. Facemos la semeya de "fin de ruta", y facemos una baxada llarga y penosa hacia Vallongo, pa ellí tener que xubir a un colláu, la cual mos cuesta como si fuera un picu más. Ellí al fin, vemos otra vegada L'Angliru, que mos da un pelín d'ánimu p'apurar y facer tola ruta ya por camín sin perda en 6 hores y diez minutinos.

Con esta integral, dexo ya L'Aramo como completáu, a falta de rutines d'acompangamientu a mio pa, mientres fae'l so llabor micolóxicu. Resumiendo, ficimos 15 kms en pelín más de 6 hores, nos qu'algamamos los 5 picos más altos del cordal de L'Aramo, con un perimportante desnivel acumuláu de 1300 ms.

Nesta ruta ficimos munchos retos:
Picu La Gamonal (1714 ms) techu y vértice de Morcín y tercer cota de Riosa
Picu Les Xistres (1766 ms) techu de Riosa
Picu Barriscal (1721 ms) segundu cumal de Riosa
Picu Gamoniteiru (1776 ms posibles) vértice xeodésicu de Quirós

Ver progresos en: Retos montañeros

miércoles, 2 de junio de 2010

Alto'l Palo (L.lena) - Magrera - Mesa - Tesa

23 de Mayu de 2010

Track: Alto'l Palo (L.lena) - Magrera - Mesa - Tesa



Axuntábense, axuntábense,...!! diz el cantar asturianu. Pues nel nuesu casu, nun solemos axuntanos munchos, pero pa esta ruta sí. Pa nós, catorce persones, ye un bon garrapiellu, asína que Xuan de la Borrina púsose a trabayar y diónos un día de sol, de vistes y de bona montaña.

Nesti casu, tornábemos a otru conceyu montañeru como ye L.lena, y más en concretu díbemos visitar la fastera sur del macizu d'Ubina, dando preste a tol cordal que separa'l valle del Güerna de los puertos de la Val.lota, con sus tres picos cimeros: La Magrera, La Mesa y la Tesa.


Semeya de grupu nel Alto'l Palo (1695 ms)

Como siempre pa llegar al entamu de la ruta: Alto'l Palo, salimos de Xixón y garramos autovía en direición a Llión, pa tomar camín hacia'l puertu Payares, parando nel pueblu l.lenizu de Campumanes. Ellí dempués del cafetín de xuntanza colos collacios vascos, empobinámonos al traviés de la carretera L.le-8 pasando polos pueblos de Sotiel.lo, Espinéo, Teyeo, Armá, Rospaso y a lo cabero Tuíza Baxo, pa siguir xubiendo altor pel puertu hasta los 1695 ms del Alto'l Palo.

Ellí riba, dexamos los coches, y preparámonos pa entamar a caleyar en direición bien nidia, como ye tola cresta que nos aspera por delantre. Asína que vamos xubiendo pegaos a una muria, dexando detrás nuesa a la mandrecha Puerto Pinos, qu'anque pertenez a Llión, los sos pastos tan aprovechaos por Mieres, y delantre nuesa tamién a la mandrecha sopeta'l verdor de los Puertos de la Val.lota.


Xubiendo hacia Penatolóbriga

Nel nuesu caminar, la primera dificultá qu'alcontramos ye la Penatolóbriga de 1766 ms, que bien se pue arrodiar o xubila ensín problemes. Equí caún fizo lo que meyor-y paeció, siempre cola vista na primer parada obligatoria, La Magrera.

Sinceramente, ye ún d'estes rutes nes qu'hai que mirar pal suelu de xemes en cuando, pa nun apilancar con dalgo, porque tas tol día mirando pa les vistes, como amuesen les siguientes semeyes. Siempre digo lo mesmu, y repítome, pero ye que nun vas xubir a un picu y ves otru a lo lloñe y ya tas dando-y vueltes a la tiesta, pa ver cómo y cuando pue dise a da-y caña.


Vistes dende Penatolóbriga (Macizu d'Ubina y Valle del Güerna)


Baxando Penatolóbriga colas dos Ubinas al fondu

A bon pasu, siguimos alantre cola ruta, poquín a pocu ganando-y terrén al siguiente finxu del día, que nun ye más que la mayor cota del cordal, el picu La Magrera, nome que-y vien d'un afloramientu de magre (arcilles caliares acolorazaes con osidu de fierro) qu'hai pela zona. Esplicación téunica por mor de Xose Lluis del Rio del G.E. Gorfolí. Mil gracies por too.


Camín del primer finxu seriu del día: La Magrera

La xubida a esti picu ye cenciella, y aína tamos toos na so cume, a pesar de dir caún al so ritmu y dir dalgo dixebraos durante tol camín. Ellí riba, xintamos dalguna cosuca, demientres miramos pal norte acolumbrando tol macizu d'Ubina, con tantos retos por facer, anque sinceramente nesti casu, picónos enforma'l niki, cola cresta de Siegalabá y el Fariñentu, que ya teníemos pa esti añu, pero nun mos dió tiempu inda.


Nel cumal de La Magrera (1941 ms)

Debaxu nuesa, al sur, tenemos la Mayá Vieya nos puertos de la Val.lota los cuales caltenían dalgun regueru ñeve y al oriente amosábase les siguientes cumes, a facer, como La Mesa y La Tesa.


La Mayá Vieya y puertos de la Val.lota dende la Magrera

Magar que baxámos de La Magrera, siguimos cordal alantre, y vamos averándonos a la Mesa, siempre arrodiando les impresionantes parés de su cara oeste, pa poder entamar el trepe desde su puntu más central de la cara sur.


La Mesa, Vachalampo y La Tesa al fondu

Dende esti puntu, vamos xubiendo poquín a pocu con curiáu de nun tirar piedres a los que van debaxo nuesa. Tol trepe nun ye nada complicáu, y va guiyáu por marques roxes facilitando más aún la toma de decisiones. Camiento que con ñeve o moyáu hai qu'estremar les precaciones porque ye una xubida abondo aérea en dellos tramos, y una posible caída ye peligrosa.


Esguilando al Picu La Mesa

Como siempre, unos enantes otros depués facemos cume nel Picu La Mesa, de 1911 ms, por tanto más baxo que La Magrera, pero más míticu debío a la so forma cuadrada, y les sos parés verticales nes cares oeste, norte y este, que tan guapes se ven dende'l valle del Güerna.


Única semeya na cume La Mesa (1911 ms), manda güevos Fernan

La baxada de la Mesa, ye esáutamente pol mesmu sitiu, non como na Magrera, na cual cresteamos un pelín pa ganar tiempu. Namás baxar, ya tenemos enfrente'l Penón de Vachalampo (1873 ms), que visto dende Tuiza tien forma triangular, y al cual xubimos arrodiando la so cara sur y xubiendo pola este, sin alcontrar nenguna dificultá. La sur tien "dalgo de dificultá", que comentaré al final de la entrada, jeje.

D'equí ya vamos tener la parte más sele de la ruta, pudiendo dar pasu alegre, pa xubir por Vachalampo, onde presta echar un vistazu atrás a tol cordal que llevamos ya nos pies.


Vista atrás: Magrera, Mesa y Penón de Vachalampo

Por delantre quédanos tan solo La Tesa, que non la Texa, ya que'l nome bien de tesu, llomba, elevación del terrén. Asína que tiramos rápidu nesti casu Fernan y yo, que nos quedáramos atrás por "diversos motivos", pero non lo suficiente atrás, como pa non facer lo que paecíen dos cimes anteriores a la Tesa.


Dende Vachalampo en direición a la Tesa

La primer delles más apacible, nómase L'Ascrita (1865 ms), y la siguiente muncho más averada al vértices xeodésicu de la Tesa, nun-y pude alcontrar el nome, anque un bon conocedor de la montaña l.leniza fizo l'esfuerzu de buscar. Mil gracies tamién a Xulio Concepción Suárez, pola so amabilidá al respondeme los mails, a la gueta d'info pa la entrada del blog. Encamiento dende equí a echá-y una güeyada a so páxina de L.lena: Páxina cultural de L.lena y a mercar los sos llibros.


Semeya final de grupu na Pena La Tesa

Ensín más, atopámonos colos demás collacios nel vértice xeodésicu de La Pena la Tesa de 1900 ms d'altor, la cual da fin a la nuesa ruta, y da pasu a sacar el bocadiellu, que llevaba dende La Mesa lo menos, pegando glayíos na mochila. Equí, despedímonos de dalgunos collacios del grupu que teníen muncha priesa, y los demás xintamos con tranquilidá, pa facer tamién pasín a pasu la vuelta al Alto'l Palo, agora si, por un fácil senderu que baxa de la Tesa a una pista paralela a tol cordal pasando pola Mayá Vieya y las Col.lás más alantre y que mos dexa finalmente nel Alto de vuelta colo coches, dempués de 15 kms de ruta y 800 ms de desnivel acumulaú en poco más de 5 hores y media.


Tornando selemente al Alto'l Palo pola pista

Finalmente como ye vezu, dempués de camudanos la ropa, baxamos a tomar una merecidísima clara nel chigre de Campumanes, esfrutando d'una bona conversación montañera, d'un calor insoportable y de la vista de dos ferraris aparcaos delantre, acompangaos de dos anormales (sus dueños) mirando pa ellos, con pinta de facese una autofelación de tanto mirar sus coches si nun fuera porque la barriga nun-yos daba pa ello.

Nesta ruta ficimos un vértice xeodésicu de L.lena: La Tesa de 1900 ms.

Ver progresos en: Retos montañeros


PELIGRU, DANGER, ACHTUNG,... NUN FACER NIN DE COÑA

Vamos pasar agora al comentáu de l'anéudota del día. Tamos na xubida al Penón de Vachalampo, el cual tien la so xubida normal y fácil pela cara este, arrodiando la paré sur, qu'impón un pelín, a nun ser que seas pelín osáu, y te preste pola vida esguilar. Menos mal, que deprendí a nun meter a la xente nestos marrones, y ellos deprendieron a nun seguime.

El casu foi que mirando pal Penón, púseme a ver si tenía xubida posible. Asína que paecióme ver una vía asequible, animáu dempués de la trepada a la Mesa, y fuíme p'allí, cola mochila na espalda, trepo una primer parte fácil, más o menos en ziszas, hasta que voi tomando altor, y la consiguiente caída bien guapa, y m'alcuentro con un pasu que nun me da nenguna tranquilidá. Dicir que la baxada ya nun yera una opción segura.

Toi metíu nun aéreo, nel qu'hai que tirar de güevos, y nun alcuentro onde grapame y menos a les yerbes que tenía na parte superior. Nesto llega Fernan dende atrás (la este) y más arriba que yo, ve onde toi, me diz que toi zumbáu y demás coses, saca semeyes pa la posteridá (llueu va y las esborra ensín querer, casi lu mato). Tiro de puxu y saco'l pasu alantre quedándome garráu a una cresta con caída pa tolos llaos menos p'arriba, asi que p'arriba hasta lo que paecía un sitiu seguru y que diba dame una travesía fácil hasta onde taba Fernan a la mandrecha.



La "vía-marrón" na que me metí

La travesía ensí tampoco me presta nada, una barriga, ensín agarre, con caída a tomar pol culu. A tou esto Fernan, a la gueta d'una salida pa indicame. Paso mil de la barriga por abaxo, y prebo un avance penriba d'una llábana vertical d'unos dos metros y poco, con dalgo separación de la roca madre. Tengo delantre un pasu muncho más dificil que l'aéreo anterior, con una grieta a la manzorga y la propia llábana lisa a la mandrecha. La cámara na mochila y nun tuve coyones a sacala pa facé-y una semeya, demientres Fernan, que ya nun me veía entrugábame como taba la cosa.

Le cuento'l tema, dame ánimos (demientres tien el móvil col 11 pulsáu, pa da-y al 2 en cuanto m'oiga glayar na caída, jaja). P'alante, pa dalgo toi nel roco tolos putos díes, meto'l playeru esquierdo pola grieta y cola pata drecha (dende la punta'l pie al cadril) m'aferro a la llábana pola drecha, pa tirar d'un primer agarre a dos manes, quedándome grapáu, como un monín a so madre, a la roca. Destamiente toi, mientres intento quédome d'izquierdes pa sacar la drecha a un segundu agarre llargu más arriba. Primera intentona, nun hai manera, nun llego y tien meyor agarre cola manzorga, asína que cambeu de manes, quédome esta vegada cola drecha apretando y faigo un rebote cola manzorga y algamo l'agarre d'arriba. Toca tirar de too y p'arriba dempués d'unos glayíos qu'oyense en tol puertu La Val.lota, dellos cagondios (dame igual de que relixón, jeje) e improperios abondos.

Darréu d'esta llibrada, ya tengo a Fernan, intentando dame una salida llateral pa onde taba él (ver semeyes). Asi qu'hai un par de barrigues fees de solución, ensín confianza tamién, pero alcontramos una grieta penriba de la superior, a la qu'aférrome pa facer una travesía llateral con caída llibre de los pies p'abaxo, hasta onde ta Fernan.

A la fin, arribo a la posición del mio collaciu vascu, y miro por onde xubió él, un práu de puta madre, jeje. Magar de mirar les pulsaciones y un abrazu con Fernan, xubimos a la cume del Penón de Vachalampo (1873 ms), a sacar una semeya cola Mesa detrás, solo faltaba agora nun xubir, jeje.


Bidea zuzentzen nel Penón de Vachalampo

D'equí coles pulsaciones tovía nuna noria, camín hasta la Tesa, el cual ya cunté. Namái, escribo estes llinees pa que la xente sea consciente de lo que nun hai que facer, jeje. Dicir que'l pasu de la llábana, tuvo muncha más dificultá que cualquier de los que fice nun cursu (deportiva Nivel I) reciente col Fempa, nes víes del L.lanu en Quirós, y ellí diba aseguráu y colos gatos.

Magar d'esto, qu'a naide se-y ocurra facer dalgo así. Ye más el track que vos propongo ta pol sitiu correutu como tien de ser.

Un abrazu, siguimos Camudando'l Camín