jueves, 25 de junio de 2009

MTB: Camín de la Mesa: Altu San L.lorenzu (Teberga) - Torrostigu (Babia - Llión)

23 Xunu de 2009

Track: Camín de la Mesa: Altu San L.lorenzu - Torrostigu  (21 km a Torrostigu)



Esta entrada bicicletera va servime pa esplicar un pelín, porque faigo les entraes como les faigo. Ye dicir si veis, nun me presta poner tiempos o dificultá a la hora de facer una ruta. ¿Por qué?, pues quiciás porque caún ye caún y k2 una piragüa que se diz n'Asturies. Ye más inclusu, un mesmu ta de forma mui diferente y con un xeitu distintu dependiendo del día, poro préstame más comentar sensaciones en cada momentu de la ruta que non poner dificultá media, baxa, dura, etc...



Nel Altu de San L.lorenzu enantes d'entamar la ruta


A mi mou d'entender, esto foi lo que nos pasó, al facer esta ruta. Sacamos el track d'un grupu de collacios de BTT, los asturcones Asturcón BTT. Un saludu pa ellos dende esti blog y d'un nueu aficionáu a la bici de montaña. A lo que díbemos, lleímos un pocu p'enriba la ruta que ficieron y bono poníenla como media, y como somos un pelín echaos p'alante, allá nos fuimos cola tarde per delantre pa facela, cuando ellos tuvieron tol día con tranquilidá y enriba son abondo pros, jeje.

Ya de primeres, tardamos en salir una barbaridá colo que nos plantamos a les 5 y media nel altu de San L.lorenzu (1347 m) dempués de cargar increiblemente 3 bicicletes y 3 paisanos nun Skoda Octavia, con dos coyones si señor. Si nun llega a ser porque llevaba'l gps, nun la facíemos de xuru, ya que taba'l día con borrina zarráu enforma, poro nun vimos nada en tola ruta, y eso que la fastera del parque de Les Ubiñes y La Mesa ye preciosa.



Echando una güeyada al gps, nun vaya ser que...


Namás salir del altu, tocanos calecer piernes con una bona rampa, en direición a la venta de Piedraxueves, pa siguir xubiendo pasando a la manzorga de la Peña Michu (1765 m) y llegando a un másimu d'altor nel Col.lau del Xuegu la Bola (1620 m), pa posteriormente baxar un pelín en direición a la braña de la Corrá o Cuérragu (1560 m).



Descansando na braña de Cuérragu o la Corrá

A dicir verdá, esta braña foi de les poques coses que pudimos esfrutar, ya que la borrina nun mos dió oción a ver práuticamente nada. Equí nes semeyes podéis ver los nomaos teitos, mui comunes nesta fastera asturiana. Per debaxu nuesa tamién teníemos un par de brañes bien guapes como son la de Murias y Urdiales, pero como ya dixi nun veíamos más de 10 ms delantre nuesa.

Siguimos un pocu más alantre manteniendo l'altor dexando les nomaes brañes embaxu nuesa y enriba tendríemos Peña Prieta (1830 m), pa más tarde tornar a xubir otru pelín hasta llegar al altu de la Granda Blanca (1672 m). Esta xubida como en casi tol camín hai qu'andar baxándose de la bici pa superar delles dificultaes, ya que faise imposible superales. Esto ye enforma molesto ya que nun avances res y enriba les posibles caídes poles piedres, riegues y milenta hestories avegoses, se suceden una tres otra.



Baxando pela pista
que nesti sitiu taba en bon estáu

Agora tornaremos a perder altor dexando a la nuesa manzorga l'altu la Cuguruza y dempués el Cerru'l Pedrosu hasta llegar al col.lau La Madalena (1542 m) nel que faeremos ya la llarga ascensión final al traviés del Val.le Caranga pasando pola Braña La Mesa (1660 m), el L.lanu El Muñón, bien averáu al Picu Muñón de 2036 m hasta llegar al fin a los Güesos (1785 m) que ye'l sitiu de mayor altor na nuesa ruta onde podremos garrar agua de la fonte del mesmu nome.

A la fin, tamos na llende ente Asturies y Llión, así que d'equí hasta Torrostigu será too baxada, con una pista meyor de lo que tuvimos en tol camín, poro casi nun mos tendremos que baxar de la bici hasta'l pueblu, cosa a la que tábemos poco avezaos hasta entos.



Semeyes nel pueblu babianu de Torrostigu

Dicir que nun pudimos agüeyar muncho'l pueblu ya que yeren les 9 menos cuartu y tábemos a l'otru llau del cordal colo que la ruta fízosenos dura, avegosa y llarga pa nun ver nada, y nun esfrutar de munchos momentos de dar pedales, por culpa de les continues xubies y baxaes de la bici pa sortiar los distintos pasos.

Magar de decidir que nun díbemos llegar per nenguna otra pista a Samartin de Teberga onde teníemos l'otru coche, nun mos quedaba otra que xubir el puertu Ventana, ensín saber los kms esautos de xubida que yeren, asína que sabiendo que mos quedaba una hora y media aprox de lluz, empobinámonos a xubir el puertu Ventana.




La cara de fríu diz tolo mal que tábemos pasándolo


Dempués d'una xubida de 5 o 6 kms a una media d'un 6% de desnivel llegamos a la fin a Asturies, dempués d'unos 2 últimos kms insufribles, cola borrina calando los güesos y un fríu ca vegada mayor. Un vegada equí, dempués de sufrir abondo pola mio parte, ya que nun xubiera un puertu na mio vida, dispusímonos a baxar el puertu con lluvia incesante y friu ablucante durante unos 20 kms hasta llegar a Samartín de Teberga.

Conclusión final: nun vimos res en tola ruta, la cual ta en munches partes del camín imprauticable pa la bici y el friu final de xubida y baxada del puertu Ventana, nun meyoró les coses precisamente. Pero como siempre, l'esfuerzu y el sufrimientu pasáu presta pola vida cuando al fin garres el coche y tires pa casa rondando la media nueche, disponiéndote a duchate y pa la cama.

viernes, 19 de junio de 2009

Colláu Les Valeres (Cangues d'Onis) - Mirador d'Ordiales - Picu Cotalba

13 de Xunu de 2009

Track: Colláu Les Valeres - Mirador d'Ordiales - Picu Cotalba



Nesta ruta vamos aprovechar pa facer dos rutes nuna, la primera y más fácil sería simplemente salir del Colláu Les Valeres al llau del llagu Enol en Cangues d'Onís y llegar al mirador d'Ordiales, tumba del nomáu Marqués de Villaviciosa, amante de la montaña y primer escalador que xubió al Picu Urriellu.

La segunda y muncho más prestosa sería llegar al mirador d'Ordiales y dende ellí ascender al picu Cotalba (2021 m). Pa esta segunda xera ye muncho meyor averase col coche hasta Pandecarme, al traviés d'una pista forestal en bones condiciones, ya que sinon la ruta faese quiciás demasiáu dura aumentándole un par d'hores estra que nun mos va aportar namái que cansanciu acumuláu.

Vamos llegar a Pandecarme saliendo del colláu Les Valeres (1115 m) pa baxar polos Acebos hasta la Vega Enol. Ablucante vega na que se fai una bona folixa en branu nomada la Fiesta del Pastor. Siguiremos caleyando a bon ritmu ya que la pista ye afayaiza pa ello y pasaremos pola vega de la Cueva y el h.ou de la Iglesia hasta llegar a la fin a Pandecarme (1080 m) onde recomiendo, a nun ser que se quiera facer senderismu ensín más, entamar la ruta.


Salida dende Pandecarme

A partir d'equí abandónase la pista forestal pa dir ganando altor poquín a pocu pasando por cerca del Pozu L'Alemán, nomáu así, porque'l conocíu como Alemán de Corao venía a bañase a esti pozu na riega de Ridimuña que llueu xúnese al riu Pomperi.



Cruciando'l riu Pomperi cerca'l Pozu l'Alemán


D'equí pasaremos por dos guapes vegues como son la del Güertu y la vega la Piedra (1139 m) y pocu más arriba llegaremos a la Vega'l Texu onde entama la canal de Canrasu que sera'l primer mayor esfuerzu que nos dexará nes cabañes de la Rondiella (1378 m) onde les vistes de Torre Santa d'Enol son increibles.



Cerca de la Rondiella coles vistes de Torre Santa d'Enol detrás nuesa



Bona panorámica con la torre y el nuesu oxetivu a la mandrecha, el Cotalba

Ya nos queda puquiñín pa llegar al nuesu primer h.itu importante como ye'l Refuxu de Vegarredonda, polo qu'entainaremos pa pasando'l colláu la Gamonal y otru pasu nomáu Becerrera de Justillagar, agüeyar abaxu nuesa, esti guapu refuxu, onde pernocten bien de montañeros y salen dixebraes rutes de montaña.



Refuxu de Vegarredonda


En Vegarredonda (1460 m) descansaremos un ratín y xintaremos daqué, demientres nos informamos sobre precios pa posibles prósimes rutes, y ye que tan solo con mirar pa Torre Santa, ya nos pica enforma facer esti picu.



Xubiendo por Cueñe Cerrada

Salimos del refuxu pola so mandrecha en direición a otru de los pasos más cansaos como ye Cueñe Cerrada la cual alcontramos inda con vien de ñeve que nos dificulta un pelín más la xubida a los campos de Torga, pa posteriormente siguir xubiendo hasta Xerra Pelada (1673 m) onde tendremos unes vistes precioses del macizu del Tiatordos, Peña Taranes, así como del Pierzu y un pocu más allá'l Vizcares piloñés.



De camín a Xerra Pelada, el picu Cotalba y descansando col Tiatordos al fondu

Torceremos a la manzorga y al pocu tiempu ya acolumbraremos el refuxu d'Ordiales y siguiendo les señales llegaremos al mirador d'Ordiales (1760 m) onde como ya diximos descansa Pedro Pidal, Marques de Villaviciosa, qu'algamó que picos d'Europa fora'l primer parque nacional y sobretoo que xunto a Gregorio Pérez "El cainejo" foi capaz d'escalar el picu Urriellu. Ye una bona llectura cualquier llibru que faiga referencia a esti home ya que foi una persona polifacética y quiciás un adelantáu al so tiempu.


Llegando a Ordiales



Tumba nel Mirador d'Ordiales y esfrutando del día y les vistes

Dempués d'un ratín de descansu y picar daqué pa recuperar fuercies, dexamos el mirador y les ablucantes vistes de los valles d'Amieva, pa baxar un pelín hacia'l refuxu y encomencipiar un de les xubíes más prestoses que fice nunca. Quiciás ye la primer vegada que nos esponemos un pelín a la hora de facer dalgún pasu peligrosu, vamos que sudamos dalgún cachín y foi más de nervios que pol calor, jeje.



Pasu complicáu pela ñeve con trepada xusto dempués hasta llegar a un colláu

Como dixe ye una ascensión mui completa, y más na dómina del añu que yera, que tuvimos pasos complexos pola ñeve, que derretíase embaxu nuesa faciendo una V, xusto por onde pisábemos y desprendiéndose a los nuesos llaos, colo qu'hubo qu'estremar les precauciones. Tamién tuvimos trepadas bien guapes y los últimos metros d'ascensión foron con un cansanciu importante y salvando un desnivel que nos fizo llegar coles fuercies mui mermaes y el coral a cien por hora.



Los tres que ficimos cima y los llagos de Cuadonga dende'l Cotalba

Dempués de xintar con tola tranquilidá del mundiu ya que'l día taba preciosu na montaña, entamamos la baxada recuperando a parte de los compañeros que nun tuvieron fuercies pa xubir al Cotalba, y baxamos reposádamente comentando que nun diba ser la última vegada que fuéramos de monte por esa fastera del Cornión.



Un picu más, el Cotalba de 2020 m, y con él despedímonos hasta setiembre

Namái dar les gracies a los mios collacios que m'acompanguen nes distintes rutes así como faen el llabor fotográficu ya que soi de lo más vagu pa estes coses, jeje. En setiembre siguiremos caleyando caminos y camudando los nuesos caminos particulares na vida.

lunes, 1 de junio de 2009

Pendones (Casu) - Picu Tiatordos

31 de Mayu de 2009

Track: Pendones (Casu) - Picu Tiatordos



Al fin, dempués d'un iviernu casi infinitu, les ñeves ivernales remitieron, y pudimos facer esta ruta a la que tantes ganes teníemos. Esta vegada xuntábemos 8 persones pa llevala a bon puertu, pero dos delles nun fueron a ello. Namái dicir, qu'hai qu'animase y entamar a venir más vegaes de monte pa garrar fondu.

Como siempre, n'un día de monte, hai más d'una hestoria alternativa a la propia ruta. Nesti casu, tenemos la de Nilo, el perru montañeru. Nilo ye un pastor alemán preciosu, de los más guapos que vi na mio vida, y ye'l meyor guía pa los montes y rutes que parten de Pendones. Namás llegar col coche al aparcamientu, ya ta per ellí, a la gueta d'un grupín col que dirse de monte. Esta vegada teníemos ganes de tomar un cafetín enantes de salir y fuimos a Casa Juanín, dueñu del perru, onde como ya dixi na ruta del Cuyargayos, xíntase de manera increyible.



Vista de la vertiente norte del Tiatordos nalgun llugar de la ruta al Picu Pierzu

Da-y una alcordanza y un saludu a la xente de Casa Juanín, que nos facieron el despertar mañaneru muncho más agradable con hestories de "montañeros" y del propiu Nilo, que foi raptáu, nun se pue llamar d'otra manera, cuando tenía 3 mesinos. Impresentables hailos en tolos llaos... Tiempu dempués, supusimos que'l perrín convirtióse en perrón, colo que devolviéronlu al so pueblu y d'entós p'acá, ye'l perru más famosu de la montaña asturiana. Solo hai que poner en google, Nilo Pendones Tiatordos, y hai entraes p'aburrir. Una más equí dedicada a esti perru.

La ruta sal de Pendones (770 m) nel conceyu de Casu, y llégase a él, dende Xixón, garrando la minera, corredor del Nalón y en direición al puertu Tarna, tardando una hora y cuartu más o menos. Nel aparcamientu, demientres tas cambiandote, hai bon ambiente montañeru con grupos de montaña, pareyes de montañeros, etc...



Pista asfaltada de salida de Pendones col Tiatordos al fondu

Salimos per una pista asfaltada col arroyu Pendones siempre a la nuesa mandrecha, hasta llegar a una ponte onde travesamos otru regueru nomáu de Rinavea siempre nun continuu ascensu. Pocu dempués llegamos a un cruce tomando la direición más recta y un pelín en baxada que va a la drecha, para ascender en bona medía, con dalgunes vueltes del camín, hasta llegar a les cabañes del Sen de la Vara (988 m) les cuales dexaremos a la nuesa manzorga.



Senda del Sen de la Vara hacia la entrada a la Foz de la Palombar

Siguiremos caleyando por bona senda, hasta llegar a la entrada de la Foz de la Palombar la cual ta formada ente'l Picu La Palombar (1408 m) y la Peña L'Arcu (1284 m). Esta parte de la ruta fainos ganar altor, rápidamente, ya que tenemos qu'andar poles peñes, ente varios regatos, hasta que poquín a pocu va abriéndose hasta un mayáu con fonte y cabañes esbarrumbaes nomáu Pláganu.



Entrada de la Foz de la Palombar y en plena xubida




Fonte de la mayada de Pláganu y guapa viesca saliendo d'ella

D'equí empobinaremonos al fin hacia la mayá Tiatordos bordiando un pelín pola esquirda una paré y una vegada que llegamos a un pequeñu mayáu con un arbolón, siguiremos xubiendo pente cotoyes a un pequeñu colláu, pa llegar a la mayá Tiatordos (1508 m), bien marcada por un par de h.itos que nos amuesen per onde sigue la ruta. Ta bien dicir, que ye un bon sitiu pa que la xente que nun tea en condiciones pa l'ascensión final, quede a descansar y esperar a los demás del grupo.



Na mayá Tiatordos col propiu picu enriba nuesa

La ruta más marcada pa xubir a la cresta'l Tiatordos, nun ye la más afayaiza pol desnivel inicial a superar, por ello, nós preferimos arrodiar un pelín más caleyando por la mayada pa entamar a xubir d'una manera más progresiva hacia'l Cantu la Barriena (1700 m). Si tuviera qu'aconseyar dalgo sería que siguieran el track que nós ficimos, ya qu'aparte de que tamién ta marcáu por h.itos, l'otru ficímoslu pa baxar, y como bien dixi, ye muncho más farragosu, con malos pasos ente peñes y un camín a siguir pocu nidiu, al menos d'aniciu.



Dos istantes de la xubida pol Cantu la Barriena

Poco más queda por dicir, namás recomendar, que caún lleve'l so ritmu, porque son 400 ms dende la mayá Tiatordos hasta la Copa Tiatordos a superar, y nun día de calor como'l d'ayer, pue facese infernal. Una vegada que tamos na Copa del Tiatordos (1936 m) la primera impresión del corte que tien esti macizu ye ablucante y pelín acoyonante, poro hai que tener curiáu de nun facer fataes, mui cerca de la caída.



Sendes caídes na Copa'l Tiatordos y nel otru estremu na peña de les Narices del Malhome

Dempués de crestear sin nenguna dificultá ya se ve la cume'l Tiatordos (1945 m), con vértice xeodésicu, buzón de cumes y un pequeñu monumentu a los montañeros de rescate en forma de piolet de fierru.



Cresta del Tiatordos y cume del Tiatordos


Les vistes dende equí, nun bon día como foi ayeri, son increibles, acolumbrándose perfeutamente Peña Santa de Castiella, Torre Santa d'Enol y más a la mandrecha'l Picu Cabrones y Torrecerréu en Picos d'Europa. Tamién tendremos vistes de los picos más altos del parque de Redes (Torres, Retriñón, Maciédome, etc...), y cordales como'l Sueve, Cuera, y pal centru Aramu, Ubiñes,...


Vistes dende'l Tiatordos colos cimeros picos del Cornión y parte de los Urrieles



Casi tol grupu na cume del Tiatordos na llende de Casu y Ponga

Como final, pue decíse que nun ye una ruta pa principiantes, ya que'l desnivel a superar son unos 1175 m y d'ascensión acumulada pue llegar a los 1370 ms, colo que l'esfuerzu a facer ye abondo, en los sos 14 km d'ida y vuelta.



Dende'l Tiatordos camudando'l camín