lunes, 20 de abril de 2009

El Mazucu (Llanes) - Peña Blanca

19 d'Abril de 2009

Track: El Mazucu (Llanes) - Peña Blanca



Siempre hai una hestoria de la que deprender dalgo nos díes que tenemos la posibilidá de vivir y como non esti domingu foi otru día. Simplemente quiero dexar esto como una caxigalina, pa saber un pelín más de la nuesa hestoria, ya que d'un simple comentariu d'una señorina de la que tábemos camudándonos la ropa embarrada de dir de monte, tuvi la posibilidá d'interesame por esta batalla, qu'acaeció nel pueblu llaniscu d'El Mazucu: Batalla d'El Mazucu



Pueblu d'El Mazucu

Ehí vos lo dexo, porque tien abondo interés y quiciás n'esta dómina na que vivimos, sabemos mui puquiñín de lo que nuesos güelos tuvieron que padecer. Nesti casu, ye la batalla de 5000 asturianos contra 33000 facistes na redolada d'El Mazucu y los sos montes. Inda güei siguimos lluchando escontra'l facismu, como en Cangues d'Onís nel 2005, cola pitición de 35 años de prisión pa 14 mozos por protestar nuna concentración facista col beneplácitu de la delegación de gobiernu.

En fin, ya sea en Setiembre de 1937 o el 20 d'Abril del 2009, siguimos y siguiremos lluchando escontra'l facismu y poles llibertaes. Dende equí, l'alcordanza pa los combatientes asturianos que morrieron polos montes nos que tuve caleyando y como non, otru saludu y la norabona pa los 14 de Cangues qu'a la fin, a día de güei, retiróse-yos los cargos de prisión y serán multaos con delles perres por simplemente espresar lo que toos pensamos: PUXA ASTURIES LLIBRE DE FACISMU.

Bono, darréu diré a comentar esta ruta de montaña, tan prestosa, sinon fuera pola zuna que nos tien el cordal del Cuera, que siempre ufreznos una "hermosa" ñebla nes sos cumes, la cual atapeznos les vistes costeres de Llanes y los Picos d'Europa. En fin, ye lo qu'hai nos cordales costeros.



Valle d'El Mazucu y Peña Blanca enriba delli

Entamamos nel pueblu d'El Mazucu, aparcando cerca d'una pequeña capilla qu'hai averada a la cimera carretera, pero ya entrando hacia'l pueblu. D'ellí atravesamos el pueblu xubiendo a la so parte d'enriba para tornar a baxar hacia una zona de praos de pación nomada La Bobia. Siempre iremos por una pista bien marcada hasta qu'esta acábase pa entamar a xubir pel monte ente cotoyes hasta llegar a lo que nómase El Prau, onde dexaremos una cabaña con muria, a la nuesa manzorga, pa siguir xubiendo y pasar ente dos zarros de finques nomaes Las Llastrias nel Picu Sen del Calvo.



Xubiendo al Prau y dende enriba de Las Llastrias: La Bobia y el Mazucu

Equí depués de garrar resuellu ya que xubimos de 340 m d'altor nel pueblu a unos 560 m nun cachín piquiñín, vamos desvianos un pelín a la nuesa mandrecha hacia'l Jou Sabieyu col envís de nun superar tanta dificultá de desnivel. Magar que dexamos esti jou a la nuesa manzorga y les cabañes de La Grandiella a la mandrecha, siguimos xubiendo hacia'l siguiente descansu que sería nes cabañes del Reburdiayu. Pa ello siguimos caleyando ente praos y muries dexando'l Picu Cotayu (756 m) a la drecha, y faciendo bono l'esfuerzu vamos garrando altor hasta los 860 m del Reburdiayu.



Nes Cabañes del Reburdiayu y ya entainando hacia Peña Blanca

A partir d'equí ya quédanos l'esfuerzu final, pero como suel pasar nestos casos, nun hai un camín nidiu, ye dicir, xubas per onde xubas, da la impresión de qu'hai un sitiu más fácil per onde xubir, poro si tuviera qu'aconseyar, pues diría, que s'intente xubir ente'l pequeñu valle que fai Peña Blanca y una paré paralela a esta e intermedia de la Cabeza Bubena y el Picu Tiedu, los cuales queríemos facer pero la ñublina, nun mos dexó, ya que por momentos poníase zarrada, y preferimos dexalu pa otra vegada.



Llanes dende les crestes de Peña Blanca

Aún así, nós preferimos xubir pela parte más cercana a la costa, crestiando averaos a la paré norte de Peña Blanca (1176 m), acolumbrando siempre tola costa llanisca y el Pueblu de Llanes, demientres que nos daba un descansín la ñebla pa poder ver dalgo. Inclusu, nun istante de bona suerti, fuimos a columbrar el Picu Urriellu pente les ñubes, pero nun mos dio tiempu nin a sacar la cámara pa facer la semeya.



Nun había quien s'asitiase pa sacar la semeya... agora sí, nueu discu de los raperos montañeros

Déxovos como siempre'l track cola suxerencia de que si'l tiempu lo permite, depués de xintar en Peña Blanca, facer otra tiradina hasta la Cabeza Bubena con cruz y el Picu Tiedu, que tien vértice xeodésicu, y dempués de facer cume, baxar hasta el Reburdiayu, pa siguir hasta El Mazucu, y completar un pelín más esta guapa ruta.



Polos combatientes del 37 y los 14 de Cangues



P'abaxo que nos come la ñebla

miércoles, 15 de abril de 2009

Les Campes de Tolivia (Llaviana) - Peña Mea

27 de Setiembre de 2008

Track: Les campes de Tolivia - Peña Mea



Vamos p'alante con otra ruta del añu pasáu que voi comentando equí, y que por ciertu ye una de les rutes más guapes que se pue facer. Tien desnivel abondo, pero la rellación tiempu-esfuerzu ye mui bona, ya que con dalgo d'esfuerzu y de bon fondu físicu en 4 hores ta más que fecha.

Amás si sumamos que ye una ruta circular, apórtase inda si cabe, un granu más d'ánimu a facela, ya que les dos vertientes d'esti picu son bien guapes y distintes a la mesma vegada. Per onde xubimos, la collada de Pel.luno ye pal entamu bien soleyera tando'l día bono, y la baxada facémosla per la collada de Doñango, qu'hasta qu'arribamos nella, ye una zona más tapecía al sol y fresca.

Entamamos en Les Campes de Tolivia, llegándose dende esti pueblu (el de los grandísimos Berrones) tomando la carretera de Fresnéu, y dempués d'un ratín xubiendo ya veremos la Ermita de Les Campes (781 m), a lo que ya podemos aparcar el coche y preparanos a caleyar, siguiendo la mesma direición de la carretera hasta que llega'l cruce onde tomar ún u otru camín.

Nós como ya dixe, tiramos en direición a la campa o collada de Pel.luno, too ello, caleyando por camín bien visible que pasa pente una paré llamada Les Crepes y les cabañes del Bayu, pa pocu dempués llegar a un ziszas del camín nel Llanu Pachón (casa bien guapa como referencia), que nos dexará casi na Campa Pel.luno.


Campa de Pel.luno

Una vegada asitiaos n'esta guapa collada, con vistes bien guapes de los valles, ellí garramos un senderu a la manzorga que nos llevará paralelos a les parés del monte y a les cabañes de Cerréu, hasta unes canales, que nos empobinarán hacia'l L'Arcón de Peña Mea, ún de los llugares más impresionantes d'Asturies ya que tamos falando d'un furacu na roca d'unos 12 metros d'altor y d'unos 15 ms de diámetro de copa.

Equí hai dos posibilidaes: xubir pola Canalón del Arcón o pola Canal de Cueves un pelín más al fondu del camín. Lo normal, ye xubir pola del Arcón, pero nós por equivocación xubimos pola siguiente, que ta un pelín menos marcada, y personalmente encamiento a xubir pola de Cueves ya qu'anque seya un pelín más dura, la recompensa del final ye muncho más grande, al tar la canal encerrada ente parés y solo cuando llégase a la fin vese de sopetu l'arcón, lo cual impresiona sobromanera.

Canal de Cueves y a la so fin, l'ablucante Arcón de Peña Mea


Echando una trepada pa xubir al centru del Arcón

Rialmente solu por agüeyar esti peazu furacu, ya merez la pena facer esta ruta, pero bono, hai que siguir alantre dempués de munches semeyes y lo que toca como en tola ruta ye siguir xubiendo metros d'altor, ya que l'arcón ta a unos 1327 ms, polo que ascendemos poquín a pocu por un senderu bien marcáu, acolumbrando al fin, tol valle del Nalón.



Xubiendo con bon desnivel hacia la cume

Ensín más, con dalguna qu'otra trepaduca y abondo desnivel y cansanciu ya nes pates llegamos a la cume de Peña Mea de 1557 ms, y que mos ufrez unes vistes de fasteres d'Asturies bien dixebraes, como son los cordales de Peña Mayor, El Sueve, montes de Ponga y Amieva, Picos d'Europa, el Cuera, montes de Somiedu, así como Peña Ubiña en L.lena ... debíu a lo central d'esta peñona.


Na cima de Peña Mea tol grupu

La baxada, como bien diximos enantes, vamos facela pela otra cara de la peña, pa dar finalmente na Collada de Doñango. Poro, dempués de xintar nun día bien soleyeru pocu más abaxo de la cume en Trozos de Mea, entamamos a baxar en direición a la collada de los Palombos, bordiando pola so mandrecha'l Picu Bollica (1462 m), pa dar en dicha collada onde hai una cabaña bien guapa y bon sitiu, pa parar un ratín enantes de siguir.



Collada de los Palombos (1320 m) y baxada hacia la Canga'l Mayaón

Agora siguimos descendiendo per una zona bien distinta de la que xubimos, con bona vexetación, muncha sombra y humedá, y con dellos resbalones en consecuencia dello, hasta la siguiente parada na Canga'l Mayaón. Dende equí acolumbramos ya la Collada de Doñango na que tenemos una bona fonte pa echar un triagu y llegar al coche pa cambianos y atalantar reposádamente, lo que pue ser una de les rutes más prestoses de facer n'Asturies.




Collada de Doñango y Picu Prau Bra (1176 m) colo que paecen 4 implacables xueces dende la Canga'l Mayaón

martes, 14 de abril de 2009

Ermita de Hontanares (Riaza - Segovia) - Puerto de la Quesera

9 d'Abril de 2009

Track: Ermita de Hontanares - Puerto de la Quesera



Aprovechando que taba de vacaciones pel pueblu mio pa, Recuerda en Soria, y que tengo collacios nesa fastera que-yos presta la montaña, amañóse la forma de dir de monte. Nun yera pa perdelo ya qu'anque nun seya Asturies tamién hai montañes guapes n'otros llugares y conocer parte del sistema central, como ye la sierra d'Ayllón en Segovia yera una bona oportunidá. Hai que dicir que dende esta sierra les vistes del Parque Natural del Hayedo de Tejera Negra son impresionantes, ya qu'alcuentrase na mesma falda d'esta sierra.

Aparte d'esto, dir de monte con otra xente de los que pues deprender dalgo, y compartir esperiencies ya ye más que xustificáu p'averáme a esta ruta, y más cuando fales con xente que tien esperiencia en Pirineos y xubió montañes asturianes, a les qu'enantes o dempués me prestaría xubir, como ye'l Urriellu o cualesquiera de les Peñes Santes en Picos d'Europa.

Poro, dempués d'un bon madrugón, empobinámonos hacia'l pueblu de Riaza na provincia de Segovia, y d'ellí como diba ser una travesía, azotamos ún de los coches al final del puertu de la Quesera, y nel otru baxamos otra vegada hacia Riaza, pa dir dende ellí, al que sería l'entamu de la ruta, la ermita de Hontanares.



Ermita d'Hontanares cerca de Riaza
Ref: www.segovia-sp.com

Esti ye un sitiu bien guapu, pa dir inclusu a pasar el ratu per ellí, preparar una bona merienda, o lo que se tercie, debíu a l'área recreativa que tien na so redolada. Amás el nome, fizome alcordame d'un d'estes frases feches que se diz nel mus: la de Hontanares, 2 a grande, 3 a chica y 4 pares, jeje. Nun se si vien d'ellí, pero bono, ehí queda eso.

De primeres anque seya una bona ruta de senderismu, nós aprovechamos pa facer dalgo d'entrenamientu trepando en crestes, polo que'l track que dexo nesta entrada, va per enriba de tola cresta de picu en picu. Aún así pue servir d'aida pa los que quieran facelo igual pero más sele, ya que poco más abaxo hai pola falda'l monte senderu pol que dir.

Salimos de la ermita d'Hontanares y travesamos la viesca que tenemos enfrente de nós, por un senderu marcáu. Nun facer muncho caso del track nesti aniciu ya que se-y fue un pelín la pinza y tuve que retocalu nos mapas a güevu, así que lo importante ye dar bona cuenta de la viesca, la cual tien una bona pendiente pa calecer, y llegar al colláu de la Fuente. Nel cual garraremos aliendu y veremos les bones vistes qu'hai a tol llanu que supón Castiella, dalgo a lo que toi pocu avezáu.



Picu Merino, parte más alta del Colláu Cimero
Ref: www2.uah.es/senderismo/buitrera.htm

Una vegada ellí, disponémonos a echar la primer trepada dexando a la nuesa drecha la Cruz d'Hontanares pa xubir al Picu Merino (1799 m) que tien na su cume vértice geodésicu y que siguiendo a través del colláu Cimero (1787 m), daremos bona cuenta con una pequeña trepada del Cerro Gordo de 1905 ms.

Dende esti cerru, ya acolumbramos lo que vien a ser la nuesa cota másima en tola travesía, que ye'l Picu Buitrera de 2040 ms, nome que-y bien por tener bien dellos buitres volando al so alredore. Pa llegar a él siguimos col continuu xube y baxa ganando y perdiendo altor a cada colláu que pasamos hasta a la fin, pegar la xubida final a la Buitrera que corona'l cerru de la Mesa Peñota.


Picu Buitrera
Ref: www.pirineos3000.com - Ascensión desde Hontanares

Equí finalmente, ye onde paramos un ratín a xintar daqué y descansar viendo'l paisaxe de les provincies de Segovia y Guadalajara del que ye llende esta hermosa sierra. Dende equí ya decidimos guardar los bastones na mochila, pa dedicanos a facer toles crestes, con dalguna trepada bien guapa, baxando pol colláu de la Buitrera (1983 m) pa tornar a xubir a el alto del Cervunalillo (2016 m) hasta llegar al colláu del Cervunal que ya nos amuesa nuesu siguiente h.itu, el alto del Parrejón de 2011 ms.



Alto del Parrejón
Ref: Ángel L. Marcos Picasa

Equí ya, bebemos daqué y pensamos n'echar l'últimu esfuerzu pa dir baxando y caleyar pola falda de la sierra pasando pol colláu de Las Lagunas y xubir otru puquiñín bordiando la peña La Silla (1935 m) hasta llegar a la fin onde dexáremos el coche pola mañana, nel puertu de la Quesera.

Namái quédame dicir que foi una travesía fecha en 4 hores y cuartu, pero too sea dicho, fecha a una velocidá importante ya que los mios guíes yeren mui bonos montañeros, colos qu'espero poder facer dalguna ascensión por Asturies y deprender dellos tolos posible.

P.D: Escaecióseme llevar la cámara colo que nenguna semeya de los paisaxes ye mía. Pongo les referencies, Si dalguien quier que la esborre namái tien que dicímelo.

jueves, 2 de abril de 2009

Llagu La Ercina (Cangues d'Onís) - Peña'l H.ultayu

19 d'Ochobre de 2008

Track: Llagu La Ercina - Peña'l H.ultayu



Voi intentar dar preste a la ruta na que más sofrí de toles que llevo faciendo, que ye la que mos empobina del Llagu La Ercina (Llagos de Cuadonga en Cangues d'Onis a la Peña'l H.ultayu nel conceyu d'Onís, na mesma llende col país Llionés.

Esta ruta que n'ida y torna faese nunes 7 hores y media aprox. parte del Campu La Tiese nel Llagu La Ercina, colo que podemos dexar el coche nel parking, qu'agora ta remocicándose pa que seya más ecolóxicu. Esta ruta pue dividise en dos partes bien diferenciáes: Del Campu La Tiese a la Vega d'Ariu como se ve nel cartelu y d'ellí al Peña'l H.ultayu, pa los que siéntanse con fuercies inda.


Cartelu d'entamu de la ruta dende'l Campu La Tiese

Dende equí arrodiamos el llagu pola so manzorga hasta llegar a una zona de cabañes, nomada como la Veguina que xúntase al traviés d'El Brazu con otra conocía como la Vega Vieya un pelín más enriba. Siguiremos caleyando para pocu a pocu y con bon desnivel dir xubiendo hacia la Cueñe Las Bobias, dexando a la nuesa manzorga los Picos: Llúcia y Braña de Sotres, hasta llegar a una mayada bien grande conocía como Las Bobias onde echar el primer descansín y xintar daqué.



Mayada de Las Bobias

Dempués d'esti descansu llegamos a una parte que se fai bien dura pol desnivel a superar, ya que baxamos un puquiñín pasando pola fonte la Canaleta, hasta llegar al Reguerón y dempués de superalu, ya que ye una llamarga importante, va tocanos xubir polas Reblagas en ziszas hasta llegar al valle y posterior altu de Las Campizas, donde tornaremos a echar un breve respiru, con unes vistes de la costa asturiana espeutaculares.



Las Campizas, con vistes bien guapes del Sueve al fondu

Siendo sinceros, acabamos d'echar por delantre una bona parte de la ruta y a partir d'agora tenemos un camín cenciello hasta lo que se pue nomar metá de la ruta. Poro, siguimos dando pasu por unes camperes nomaes Les abedules pa xubir un puquiñín más hasta llegar al Colláu del H.itu. Nesti puntu, ya tamos bien cerquina de la Vega d'Ariu como nos amuesa un cartel al Refuxu del Marqués de Villaviciosa.



Vistes del Macizu de los Urrieles dende'l H.itu y de les Peñes Santes del Cornión

Dempués d'echar un vistazu a la mesa de piedra qu'atópase equí colos nomes de los picos que podemos acolumbrar d'ambos macizos (Cornión y Urrieles) baxamos un pelín ya hacia la Vega d'Ariu, onde echaremos un bon descansu y xintaremos daqué pa recuperar fuercies. Equí ye un bon sitiu pa que la xente del grupu, que nun s'agüeye bien físicamente de por zarrada la ruta, y descanse paseando polos verdes praos d'esta vega, disfrutando de lo increible del sitiu.



Orientándonos na Vega d'Ariu

Ensín llegar a les 3 hores de ruta, dando cera abondo, llegamos a esta primera parte de la ruta. Agora "simplemente" quédanos la xubida al Peña'l H.ultayu de 1940 ms. Pa xubir a esti, tenemos que dir averándonos al traviés de les marques que mos orienten pa la Canal de Trea, pa pocu dempués torcer a la mandrecha hacia un altu llamáu la Cabeza Corroble con un h.itu de piedres en tolo alto.

Nun fai falta xubir a él porque nos retrasaría, polo que con rodealu polo so drecha, y siguir tolos h.itos que van marcándonos el camín, llevaríamos una bona direición hacia la cume. Hai que dicir que la xubida ye durina, y que tenemos que dir pocu a pocu parando a garrar resuellu. Dos bonos sitios pa ello seríen el Colláu les Cruces y más enriba inda, dempués d'un ratín de xubir La Vallera.



Garganta'l Cares al fondu, dende La Vallera

Equí les vistes del cares son espeutaculares, de igual mena que la Canal del Agua amuésase infranqueable en su ascensu al macizu central de los Urrieles. Quedanos pocu ya pa la cume, asína qu'hai qu'echar l'últimu aliendu y tendremos la recompensa final.... Peña'l H.ultayu, con una caída hacia Caín de 1500 ms, que da ciertu respetu.



Na cima de la peña'l H.ultayu con Caín abaxu y el macizu de los Urrieles detrás na semeya de grupu

Namás dicir, que ye una ruta mui recomendable, y que simplemente lo meyor ye garrar una dómina del añu con munchu tiempu de lluz, pa llevala lo más sele posible y nun machacase n'escesu, ya que les 7 hores de caminar son casi segures, entre la ida y la torna. Esta fadráse pol mesmu sitiu, anque pue baxase más averáu al picu Cuvicente, pasando pol furacón del H.oracau, hasta llegar a la Vega d'Ariu.