viernes, 23 de enero de 2009

Escalada: Deporte total

Ún de los deportes que más me llamó l'atención fue la escalada. Nun ye que de pequeñu anduviese tol día esguilando pelos árboles nin nada asemeyáu, pero dempués d'unos años yendo al ximnasiu y viendo que tampoco ye que sea mui deportivu'l tema del gym, no que se refier a un deporte más aeróbicu envede tan anaeróbicu como ye llevantar peses. Pero del ximnasiu ya falaré notru momentu.

L'añu pasáu, como ún d'esos intentos de camudar la forma de vivir, y que la verdá, como siempre fice más o menos, lo qu'apetecióme nel momentu, (tocar la gaita, mercame un impreza, ... otres hestories pa cuntar, jeje), pues decidime y viendo que tenía dos hores paraes pa xintar nel curro, y que dalgunos collacios del trabayu, diben a la piscina y dixéronme qu'habia rocódromo decidí prebar a ver que tal se me daba.

Como non, fice un paséu pel Decathlon (tienda qu'atráeme enforma, nun soi a salir d'ella ensín mercar nada), y merqué unos gatos (los más baratos qu'había) y una bolsa pal magnesiu. Así d'entamu paez un deporte baratín, pal rocódromo al que voi, ya que nun ye n'altor, poro colos gatos, y magnesia, más ropa normal, tipu camiseta vieya y pantalón de deporte, amañaste de sobra. Llueu ya tocó mercar unos gatos meyores, que los primeros yeren una mierda fina, nun agarraben ni resfriaos.

Pues entamé a dir, y bono, los primeros díes, petes a les 5 minutos, pero ye mui adictivu, vas garrando fuerza, flexibilidá y equilibriu. Lo dicho, ye'l deporte total, mui completu, mui esplosivu, y hai que tar pa prauticalu finu, finu. Xusto lo qu'andaba guetando ya que'l gym entamaba a aburrime porque siempre yera lo mesmu al final.

Ye más aún, agora el gym sírveme pa entrenar meyor pa esguilar, colo que faigo entrenos específicos pa la escalada, lo cual, apórtame muncho más, y faime dir al gym con muncha más dedicación, ya que me lo tomo too, como un entreno, los de mediudía esguilando y los de la tarde, específicos de peses y carrera.

Espero poner, entraes, con dellos sitios a los que vaya esguilar, y comentar dalgo d'esti deporte, qu'anque llevo mui pocu tiempu n'el, ye lo que más me presta anguaño.

martes, 20 de enero de 2009

El Pedrosu (Onís) - Picu Hibéu

11 de Xineru de 2009:

Track: El Pedrosu - Picu Hibéu


Primer ruta del añu, que viendo la dómina del añu na que tamos, tuvimos la gran suerte de facela con una nevada curiosa. Pudiera decise que ye una ruta facilina, si nun tuviera ñeve, ya que percorremos la mayor parte del camín per una pista forestal que sal de la Robellada.

Poro, pa xente con un pelín d'esperiencia, val más dir con ñeve, porque meyora dafechu la belleza de los paisaxes, y en nengún momentu acaba siendo escesívamente dura, a pesar de caleyar p'enriba la ñeve.

Con esto quiero dicir, que pa dempués de tar muncho tiempo sin dar zapatu, o nun tener muncha esperiencia, vien xenial, pa dir recuperando sensaciones al caleyar pel monte. Podría dicise que ye una ruta asemeyada a la del Mofrechu dende'l Colláu d'Ixena.

Nesti casu salimos dende'l pueblu d'El Pedrosu nel conceyu d'Onis, dempués d'un viaxe en coche dende Xixón a Posada de Llanes pela autopista, y dempués pol Altu d'Ortigueru a Benia, y d'ehí a El Pedrosu.

Una vegada qu'atravesemos el pueblu siguimos hasta'l final d'un altu, nuna zona llamada Carapelu, enantes de baxar hacia les cabañes de Fresnéu, onde entama la pista forestal que garraremos postréramente.

Dende esti altu, que tien un cruce a la mandrecha, podemos dexar el coche ya qu'hai abondu sitiu, y namás cruzar la carretera vemos un camín que sal en xubida en direicción una cabaña. Al llegar a ella, cruzaremos la portiella, dexándola nel so estáu, y percorreremos un prau en ascensu hacia la pista que ta xusto embaxu de les torres d'alta tensión.

Ya por fin na pista forestal, tendremos un caleyar ascendente pero mui continuu, polo que se fai mui afayadizu pa esfrutar de les vistes que nos abluquen por momentos, ya sea'l macizu del Tiatordos en Ponga, o los macizos del Cornión y Urrieles en Picos d'Europa.



Vistes dende la pista forestal del Tiatordos

Durante'l nuesu paséu pola pista, diremos dexando delles ellevaciones a la nuesa mandrecha, como son la Cabeza Tebia (676 m) y la Cabeza Bustiellu (740 m) que se correspuende xusto cola mayor pendiente na zona del Recipáu, pa dempués d'esti esfuerzu llegar al fin a Los Llanos onde les vistes son si cabe más impresionantes, y el Picu Urriellu amuésase en tola so grandura.



El Picu Urriellu dende Los Llanos d'Hibéu

Equí descansamos un ratín, y xintamos daqué, pa facer un esfuercín más que mos empobina a la base del picu Hibéu, el cual va un ratu ya que lo llevamos acolumbrando. Una vegada que llegamos a un pequeñu llagu artificial (744 m) ya podemos dexar de siguir nengún caleyu visible, y entamar a esguilar hacia'l Picu Hibéu (872 m).



Grupu nos Llanos col Picu Hibéu al fondu

Nun hai un camín meyor qu'otru, eso sí, hai que tener curiáu ya que ye un picu de roca, con munchos cortes y furacos, colo qu'hai que dir sollerte d'onde se pisa, haya ñeve o non. L'ascensión faise dura, pero llegar a la cume ye toa un recompensa, viéndose praúticamente toa Asturies, dende la mar, hasta les llendes col país vecín de Llión.



El macizu del Cornión dende la cume del Hibéu



Vista del valle d'Ardisana y de la costa llanisca

Enriba la cume de la manzorga la más alta, tenemos un vértice xeográficu y buzón de cumes, mientres que na cume ximielga tendremos un gran h.itu. La baxada será pel mesmu sitiu, teniendo curiando de nun pisar mal nos cortes y furacos enantes comentaos, y ya dempués a partir de Los Llanos, siguiremos el nuesu paséu de vuelta al coche, esfrutando del paisaxe, y de la bona ruta recién fecha.

En definitiva, la ruta al Picu Hibéu, ye una ruta bien cenciella, pero de vistes impresionantes, y si vamos na dómina ivernal, tendremos un plus de belleza. Como siempre, dempués d'un día de monte, toca'l merecíu cafetín, y si se tercia una botellina sidre nunca vien mal, pa pensar cual será'l siguiente llugar d'Asturies en visitar.



Con mi collaciu del blog Solsticiu d'Iviernu



martes, 13 de enero de 2009

Rutes de montaña y senderismu

Esta entrada vien a ser simplemente un pequeñu entamu a lo que va ocupar gran parte del blog, ya que quiciás la mayor de les mios aficiones agora mesmu seya la montaña. Hai que dicir, que nun ye una afición que garrase fae munchos años, y de xuru que cuando afondó de gran manera en mi, foi de dos años p'acá.

Que dicir, d'Asturies y de la so montaña. Ye too, si una persona creese mui asturianu, y nunca tuvo de monte, ye que nun conoz Asturies nin la ama y respeta de verdá. Como diz un collaciu miu, equí nos altores d'Asturies, acolumbrando dellos paixases, dende la mar, hasta los montes que llinden col país vecín de Llión, ye onde ñaz el nacionalismu asturianu.

Equí, ye onde te pares a pensar, porque inda nun colé d'Asturies, a pesar de la crisis continua, que nos fae padecer el gobiernu asturianu, de los baxones morales que supón ver como s'estroza gran parte de la cultura, llingua y paixases astures, de los contratos basura, dempués d'años d'estudiu y preparación y d'un montón de coses más.

Esto ye, nun colé d'Asturies, porque ye too pa mi, ye tolo que soi, ye tolo que quiero ser, y ye onde siempre querré finar mis díes. Solo n'Asturies, pues xubir de monte pola mañana a más de mil metros d'altor y dempués de xintar un bocata na cume del monte, baxar a date un bañín a les playes asturianes.

Namái, dicir, que n'esta seición podréis alcontrar per onde voi de monte, que rutes faigo, que llugares me prestaron enforma, y les pequeñes hestories de conocer Asturies finde tras finde.

viernes, 2 de enero de 2009

Entamu

¿Quién nun camentó dalguna vegada en camudar el so xeitu de vida?

De xuru, que ca pocu tenemos la intención de llevalu a cabo, pero siempre acabamos llevando la nuesa vida, hacia lo que tábemos ya avezáos, y tornamos a repetir los mesmos erros una y otra vegada, ensín parar.

Nel mio casu, lo que se volvía a repetir hasta la saciedá, yera la folixa. Toles selmanes lo mesmu, trabayar o estudiar pola selmana, naguando porque llegáse'l fin de selmana pa salir de folixa, y siempre col mesmu resultáu, tayada fina, y total pa que, pa tar cagándose en too al día siguiente.

Esto yera así de mozu, porque cuando pasen los años, lo de al día siguiente, ye capaz d'allargase hasta los tres díes siguientes, y entos ya preocupa. Ya unu, nun se recupera como enantes, y les hores de trabayu faénse penoses, que cuando uno estudiaba aguantaba'l tirón como podía, a base de cafés na biblioteca.

A lo que díbemos, esto cuando ya tórnase en vezu, duel, y nun duel solu na tiesta pola resaca, duel nel alma, pol xeitu de vida que se ta llevando, y se supón que más tarde dolerá físicamente, porque tou pasa factura. Eso ta bien nidiu.

Pues a pesar, de que los años pasen ya inténtase madurar, hasta que nun ties dalgo que te fae camudar de golpe nun suel haber manera. Esto pasóme añu y mediu atrás casi, y bono nesi camín tamos dende entos, menos folixa y más deporte, que ye otra de les mios pasiones.

Y esi golpe d'efeutu de fae añu y picu, tendrá les sos consecuencies esti añu, d'ehí que decidiera esti añu, camudar el camín a tomar, cuando ties varies direiciones. La direición qu'intento tomar, ye la del deporte y l'aventura, y dexar al llau la folixa, l'alcohol y la vida de la nueche.

¿Sedrá posible? ¿Hai manera de dar una vuelta a la vida que se lleva?

Pocu a pocu, lo diré viendo, así qu'equí nesti cuadernu de bitácora de la mio vida, diré contando tolo que faigo en rellación a mis aficiones: deporte, aventura, música, ... y dalguna cosuca más qu'iré contando.